ރައީސުލްޖުމްހޫރިއްޔާ އަބްދުﷲ ޔާމީން ސިންގަޕޫރަށް ކުރައްވާ ދަތުރުފުޅުތަކުގެ މައުލޫމާތު ހޯދުމަށް އެދި އެމްޑީޕީން ނާއިބް ރައީސް ޑރ މުހައްމަދު ޖަމީލް އަހުމަދަށް ފޮޮނުވި ސިޓީގެ ޖަވާބު ދޭނެކަމަށް ރައީސް އޮފީހުން ބުނެފި އެވެ.
ރައީސް އޮފީހުގެ ތަރުޖަމާނު އިބްރާހިމް މުއާޒު ދުވަހަށް ވިދާޅުވީ، އެ ސިޓީ އޮންނަ އުސޫލުގެ ތެރެއިން ރައީސް އޮފީހަށް ލިބިފައިވާކަމަށާއި، އެ ސިޓީއަށް ނައިބް ރައީސް ޖަވާބު އަރުއްވާނެ ކަމަށެވެ. ސިޓީއަށް ޖަވާބު ދިނުމުގައި އެދިފައިވާ މައުލޫމާތުތަކަކީ މައުލޫމާތު ހޯދާ ލިބިގަތުމުގެ ގާނޫނުގެ ދަށުން ފޯރުކޮށްދޭންޖެހޭ މައުލޫމާތުތަކެއްތޯ ބަލާނެ ކަމަށާއި އެ ގާނޫނުގެ ދަށުން ހާމަ ކުރެވޭ މައުލޫމާތުތައް އެމްޑީޕީއަށް އަރުވާނެ ކަމަށް މުއާޒު ވިދާޅުވި އެވެ.
އޭނާ ވިދާޅުވީ، ބައެއް މައުލޫމަތުތަކަކީ އޭގެ ޒާތުގައި ސިއްރު ކުރަންޖެހޭ މައުލޫމާތުތަކެއް ކަމަށާއި، އެފަދަ މައުލޫމާތެއް ހޯދަން އެމްޑީޕީން އެދެފައިވާނަމަ އެ މައުލޫމަތެއް ފޯރުކޮށް ދެވެން ނޯންނާނެ ކަމަށެވެ.
“މައުލޫމާތުހޯދާ ލިބިގަތުމުގެ ގާނޫނުގެ ދަށުން  އާންމު ފަރުދުންނާއި ޖަމިއްޔާ ޖަމާއަތްތަކަށް ސަރުކާރުގެ މުއައްސާސަތުން ފޯރުކޮށްދޭނެޖެހޭ މައުލޫމާތު ފޯރުކޮށްދޭނަން. އެގޮތުން އެ ސިޓީގައިގައި އެފަދަ މައުލޫމާތަކަށް އެދިފައިވާ ނަމަ އެމްޑީޕީއަށް އެ މައުލޫމާތެއް ލިބޭނެ،” މުއާޒު ވިދާޅުވި އެވެ.
ނަމަވެސް އެމްޑީޕީން ހޯދަން އެދިފައިވާ މައުލޫމާތުތަކުގެ ތެރޭގައި އާންމު ނުކުރެވޭނެ މައުލޫމާތެއް ހުރިކަމެއް ނުވަތަ ނޫންކަމެއް މުއާޒު ވިދާޅެއް ނުވެ އެވެ.
އެމްޑީޕީގެ ޗެއާޕާސަންގެ ނާއިބް އަލީ ޝިޔާމް ސޮއިކުރައްވާ ނާއިބް ރައީސް ޑރ ޖަމީލަށް ފޮނުއްވި އެ ސިޓީގައި ވަނީ ރައީސް ޔާމީން ސިންގަޕޫރަށް ވަޑައިގެންފައިވާ އަދަދާއި، މިފަދަ ދަތުރުފުޅުތަކުގައި ސިންގަޕޫރުގައި ހޭދަވި ދުވަސްތަކާއި، މި ދަތުރުފުޅު ތަކުގައި ރައީސް އަރިހުގަ ބައިވެރިވެވަޑައިގެންނެވި ބޭފުޅުންގެ އަދަދާއި، ދަތުރު ތަކަށް ދައުލަތުން ހޭދަވި އަދަދާއި، ރައީސްގެ ސިއްހީ ހާލުކޮޅާ ގުޅޭ ތަފްސީލް އެމްޑީޕީއަށް ފޮނުވައިދިނުން އެދޭ ކަމަށެވެ. އަދި މިކަންކަން ރައްޔިތުންނަށް ތަފްސީލުކޮށް އެނގޭނެހެން ރައީސުލްޖުމްހޫރިއްޔާގެ އޮފީހުން އާންމު ކުރުމށް އެމްޑީޕީން އިހުލާސްތެރިކަމާއެކު އެދޭ ކަމަށްވެސް އެ ސިޓީގައި ވެއެވެ.
ރައީސް ޔާމީން މިހާރުވެސް ހުންނެވީ އަމިއްލަ ދަތުރުފުޅެއްގައި ސިންގަޕޫރުގައި އެވެ.