ހޯމް މިނިސްޓަރުކަމުގެ މަގާމުގައި ހުންނެވިއިރު، އެ މިނިސްޓްރީގެ އެއްވެސް ބިޑަކަށް، ކުރިމަތިލާފައި ނުވާނެ ކަމަށް އުމަރު ނަސީރު ވިދާޅުވެއްޖެއެވެ.
އުމަރު މިގޮތަށް ވިދާޅުވީ، އޭނާއާ ގުޅޭ މައްސަލައެއް އޭސީސީން ބަލަމުން އަންނަ ދަނޑިވަޅެއްގައެވެ.
އޭސީސީން އުމަރު އާ ގުޅޭގޮތުން ބަލަމުން ދަނީ، އޭނާ މިނިސްޓަރު ކަމުގައި ހުންނެވި ދުވަސްވަރު ނުރައްކާތެރި ކުށްވެރިން ފައިގައި އަޅުވާ ޓެގް ގެނައުމަށް އަމިއްލަ ކުންފުންޏަކާ ހަވާލު ކުރުމުގައި ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތު ކުރެވޭ މައްސަލައެކެވެ.
މިކަމާއި ގުޅޭގޮތުން އުމަރު މިއަދު ވިދާޅުވީ، އެ މައްސަލައަކީ ކުރީ ސަރުކާރުންވެސް ބަލާފައި އޮތް މައްސަލައެއް ކަމަށެވެ. އަދި އެ ބިޑް އެވޯޑް ކުރެވުނީ އިއުލާނުކޮށްގެން، އެންމެ ކުޑަ އަގެއް ހުށަހެޅި ފަރާތަކަށް ކަމަށެވެ.
"އެވޯޑް ކުރުމުގެ ކުރިން އޭސީސީއަށް ލިޔެ ކްލިއަރެންސްވެސް ހޯދިފައި ވޭ. އެވޯޑް ކުރެވުނީ އަޅުގަނޑުގެ ކުންފުންޏަކަށް ނޫން، އަދި އަޅުގަނޑުގެ އަތްބެއް ދަރިއެއްގެ ހިއްސާ އޮންނަ ކުންފުންޏެއްވެސް ނޫން". އުމަރު ނަސީރު ވިދާޅުވިއެވެ.
އުމަރު ނަސީރު ވިދާޅުވީ، އޭނާގެ ވަޒީރުކަމުގައި އޭނާގެ ނުވަތަ އަތްބެއް ދަރިއެއްގެ ހިއްސާ އޮންނަ ކުންފުންޏެއް ހޯމް މިނިސްޓްރީގެ އެއްވެސް ބިޑަކަށް ކުރިމަތިލާފައި ނުވާނެ ކަމަށެވެ. އަދި އެކަން ރެކޯޑްތަކުން ފެންނަން ހުންނާނެ ކަމަށް އޭނާ ވިދާޅުވިއެވެ.
"މިއީ /ހުދު ވަލުގެ ޓީމުގެ" ސިޔާސަތުތައް". ފޭސްބުކްގައި އޭނާ ކުރި ޕޯސްޓް ނިންމާލަމުން ބުނެފައި ވެއެވެ.
އުމަރުގެ މައްސަލައެއް އޭސީސީން ބަލަމުން އަންނައިރު، އޭނާ ވަނީ 2023 ވަނަ އަހަރު ރިޔާސީ އިންތިހާބަށް ކުރިމަތިލައްވާނެ ކަމަށް އިއްޔެ ވިދާޅުވެފައެވެ.