ހީޓު ހެލްތު އެންޑް ފިޓްނަސް އާއި ހޭންޑް ބޯލް މޯލްޑިވްސް ގުޅިގެން ބާއްވާ ދެ ވަނަ ހޭންޑް ބޯލް މުބާރާތް މިއަދު ހަވީރު ފަށަން ނިންމައިފި އެވެ.
ހީޓް ހެލްތު އެންޑް ފިޓްނަސްއިން ބުނީ، މުބާރާތުގައި ބައިވެރިވެފައި ވަނީ ހީޓަށް ކަސްރަތުކުރަން އަންނަ މެންބަރުންނާއި މުވައްޒަފުން ކަމަށެވެ.
މިއަދުން ފެށިގެން އަންނަ ހޮނިހިރު ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި އަންހެން 10 ޓީމާއި ފިރިހެން ދެ ޓިމް ވާދަ ކުރެއެވެ.
މިމުބާރާތަކީ ހީޓް ހެލްތު އެންޑް ފިޓްނަސްއިން ބާއްވާ ދެ ވަނަ މުބާރާތް ކަމަށްވީއިރު މުބާރާތް ބޭއްވުމުގެ އެންމެ ބޮޑު އެއް މަގްސަދަކީ ޒުވަނުން އަދި ހާއްސަކޮށް އަންހެނުން ކުޅިވަރު ކުޅުމަށް ހިތްވަރުދީ ކުޅިވަރާ ކަސްރަތައް ލޯބި ޖެއްސުމާއި ދުޅަހެޔޮސިއްހަތެއްގައި ބޭތިއްބުމަށް ބާއްވާ މުބާރާތެއް ކަމަށް ހީޓް ހެލްޓު ފިޓްނަސްއިން މައުލޫމާތު ދެއެވެ.
ހީޓް ހެލްތު ފިޓްނަސްގެ މެނޭޖާ އައިޝަތު އަފްރާ މުހައްމަދު ވިދާޅުވީ، މިމުބާރާތުގެ މެޗްތައް ކުޅެމުންދާ ވަގުތު އިމާދުއްދީންގެ ހާއްސަ އެހީއަށް ބޭނުންވާ ކުދިންނަށް ހާއްސަ ކުރެވިގެން ބަހައްޓާފައިވާ ފަންޑު ފޮއްޓެއް ހުންނާނެ ކަމަށާއި އެފޮއްޓަށް އެހީއެއް ވެދެއްވުމަކީ ހީޓްގެ ވަރަށް ބޮޑު އެދުމެއް ކަމަށެވެ.
މިމުބާރާތުގެ މެޗްތައް ކުޅުމަށް ހަމަޖެހިފައި ވަނީ އާޓިފިޝަލް ބީޗްގައި އޮންނަ ކުޑަހެންވޭރު ޓާފްދަނޑުގައެވެ. އަދި މުބާރާތުގެ ފައިނަލް މެޗް ކުޅުމަށް ހަމަޖެހިފައި ވަނީ އަންނަ ހޮނިހިރު ދުވަހުގެ ރޭ 20:00 ގައެވެ.