ކުރީގެ ޑިފެންސް މިނިސްޓަރު މުހައްމަދު ނާޒިމްގެ މައްޗަށް ދައުލަތުން ކޮށްފައިވާ ހަތިޔާރު އެތެރެކުރުމާއި ގެންގުޅުމުގެ ކުށުގެ ދައުވާގެ ޝަރީއަތެއް މަދާމާ ހަވީރު ބާއްވަން ތާވަލުކޮށްފި އެވެ. ތިން ދުވަހުގެ މެދުކެނޑުމަކަށް ފަހު މާދަމާ ބާއްވާ ޝަރީއަތް އޮންނާނީ ހަވީރު 4.00ގަ އެވެ. ކްރިމިނަލް ކޯޓުގައި ހިނގަމުންދާ އެ ޝަރީއަތުގައި މާދަމާ އޮންނާނީ ނާޒިމްގެ ފަރާތުން ހުށަހެޅި ދިފާއީ ހެކިންގެ ހެކިބަސް ނެގުމެވެ. ދައުލަތުން ހުށަހެޅި ހެކިންގެ ހެކިބަސް މިދިޔަ ބުރާސްފަތި ދުވަހު ބޭއްވި ޝަރީއަތުގައި ވަނީ ނަގާނިމިފަ އެވެ.ނާޒިމް ވަނީ ދިފާއީ ހެކީގެ ގޮތުގައި ރައީސް އަބްދުﷲ ޔާމިނާއި ހޯމް މިނިސްޓަރު އުމަރު ނަސީރާއި ޕޮލިސް ކޮމިޝަނަރު ހުސައިން ވަހީދުގެ އިތުރުން ސިފައިންނާ ފުލުހުންގެ އިސް ވެރިންތަކެއް ހާޒިކޮށްދޭން ހުށަހަޅާފަ އެވެ. ނަމަވެސް މާދަމާ ހާޒިރުކުރާނީ ކޮން ބައެއް ކަމެއް އަދި ހުރިހާ ފަރާތްތައް ހާޒިރުކުރާނެ ކަމެއް މައްސަލަ ބައްލަވާ ފަނޑިޔާރުން ވިދާޅެއްނުވެ އެވެ. ނާޒިމްގެ އެޕާޓްމަންޓް ބަލައި ފާސްކުރަން ދިޔަ ފުލުހުންގެ ތެރެއިން ހެކިބަސް ދިން ހުރިހާ ފުލުހުން ބުނެފައިވާ ގޮތުގައި ނާޒިމް ދިރިއުޅޭ އެ ޕާޓްމަންޓަށް އެމީހުން ވަންއިރު މޫނު ނިވާކޮށްގެން ތިބި ތިން ފުލުހުން އެ ތަނުގައި އޭރު ތިއްބެވެ. އަދި ތަހްގީގު ޓީމް ދިޔައިރު ނާޒިމާއި އޭނާގެ އާއިލާ ވަނީ ސިޓިންރޫމަށް ނެރިފަ އެވެ. ނާޒިމް މައްޗަށް ބޮޑެތި ތުހްމަތުތަކެއްކޮށް، އޭނާ ދިރިއުޅުއްވި އެޕާޓްމަންޓުން ހައްޔަރުކޮށްގެން ގެންދަނީ.---ހަވީރު ފޮޓޯ: މުހައްމަދު ޝަރުހާން ހަމަ އެހެންމެ ނާޒިމްގެ އެޕާޓްމަންޓް ބަލާ ފާސްކުރަން ހިންގި އޮޕަރޭޝަނުގެ ފޮޓޯ ނެގި ފުލުސް މީހާ ހެކިބަސްދެމުން ބުނެފައިވަނީ ފޮޓޯ ނަގަން ފެށީ ތަހުގީގު ޓީމު އައިސް ނާޒިމްގެ ކޮޓަރި ބަލައި ފާސްކުރަން ފެށުމުން ކަމަށެވެ. ނާޒިމްގެ ކޮޓަރި ތެރޭގައި އޮތް ދަބަހަކުން ފިސްތޯލައަކާއި ވަޒަނަކާއި ތިން މެގަޒިން ފެނިފައިވާއިރު އެ ވަޒަނަކީ ރަނގަޅު އެއްޗެއްތޯ ޓެސްޓް ކޮށްފައި ނުވާކަމަށް ވެސް މީހަކު ހެކިބަސްދީފައިވެ އެވެ. ނާޒިމްގެ ޝަރީއަތް މާދަމާ ބާއްވާއިރު އޭނާގެ ސިއްހީ ހާލަތު މިހާރު ހުރީ ފުރާނަ އަށް ނުރައްކާތެރިވާ ފަދަ ހާލެއްގައި ކަމަށާއި ޑޮކްޓަރު އެދެނީ ވީހާ ވެސް އަވަހަކަށް ރާއްޖެ އިން ބޭރަށް ގޮސް ޓެސްޓްތަކެއް ހެދުމަށްކަމަށް ނާޒިމްގެ ވަކީލުން ވަނީ ބުނެފަ އެވެ. ނަމަވެސް އަދި ނާޒިމަށް އެ ފުރުސަތު ހަމަ ޖެހިފައެއްނުވެ އެވެ.