މުއައްސަސާތަކަށް އިތުބާރުނެތްކަމަށް ވިދާޅުވެ ރައީސް ޞާލިހު އުފެއްދެވި ރިޔާސީ ކޮމިޝަންތަޖުގެ ތެރެއިން މަރު ކޮމިޝަނުން ތަހުގީގުކުރަމުން އަންނަ ރިލްވާން އާއި އަފްރާޝީމް އަދި އެނޫންވެސް މަރުތަކާއި ގުޅޭ މައްސަލަތަކުގައި މި ސަރުކާރަށް އެންމެ "މޮހޮރެއް" ހިސާބުވެސް ހޯދިފައިނުވާނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްްޖެއެވެ.
ވަގުތު ނޫހުގެ "ހަވާސް" ގައި ބައިވެރިވެ ވަޑައިން ކްލަބްހައުސް ގައި ރޭ ވާހަކަ ދައްކަވަމުން އުމަރު ވިދާޅުވީ ކުރީގެ ސަރުކާރުގައި މި މައްސަލަ ތަހުގީގުކުރީ ވަރަށް ކައިރިން ބަލައިގެން ކަމަށާއި އުމަރު ވެސް ވަރަށް ގާތުން ރިލްވާން އާއި އަފްރާޝީމްގެ މަރު ފަދަ ހައި ޕްރޮފައިލް މައްސަލަތައް ބަލަމުން ގެންދިޔަ ކަމަށެވެ.
މީގެ އިތުރުން މައްސަލަތަކުގެ ތަޙުޤީޤުތައް ކުރިއަށް ނުދާކަމަށާއި، މިސަރުކާރަށް އިތުރުވަކި ކުރިއެރުމެއް ހޯދިފައިނުވާކަމަށް އުމަރު ވިދާޅުވިއެވެ. އަދި މި ކޮމިޝަނަށް އެންމެ މޮހޮރެއްވެސް ހޯދިފައިނުވާ ކަމަށް އުމަރު ވިދާޅުވިއެވެ.
މީގެ އިތުރުން ރިލްވާނުގެ މައްސަލަ ބެލުން ހުއްޓާލުމަށް އުމަރަށް ރައީސް ޔާމީން އެންގެވިކަމަށް ދެކެވޭ ވާހަކަތަކަށްވެސް ދާދިފަހުން އުމަރުވަނީ ރައްދު ދެއްވާފައެވެ.
އެގޮތުން އުމަރު ތަކުރާރުކޮށް ވިދާޅުވީ މި މައްސަލަ ނުބެލުމަށް ނުވަތަ ހުއްޓާލުމަށް ރައީސް ޔާމީން ދުވަހަކުވެސް ވިދާޅުވެފައިނުވާ ކަމަށާއި،އޭރު މައްސަލަ ތަހުގީގުކުރަމުން ދިޔައީ އެއްވެސް ސިޔާސީ އަދި އެހެނިހެން އެއްވެސް ނުފޫޒެއް ނެތި ކަމަށެވެ.
ނޫސްވެރިޔާ ރިލްވާންގެ މައްސަލައިގައި މިސަރުކާރަށް މާބޮޑު ކުރިއެރުމެއް ހޯދިފައި ނުވިނަމަވެސް ކުރިއެރުންތަކެއް ލިބުނުކަން ރައްޔިތުންނަށް ހާމަކޮށްދިނުމުގެ ގޮތުން ދާދިފަހުން މި މައްސަލައިގެ ތަޙުޤީޤަށް ކުރީގެ ރައީސް ޔާމީން ވަނީ ހާޒިރުކޮށްފައެވެ.
ރައީސް ޔާމީން މަރުކޮމިޝަނަށް ހާޒިރުކުރީ ރިލްވާން މައްސަލައިގެ ތަހުގީގަށް ހުރަސް އެޅިކަމުގެ ތުހުމަތުގައެވެ.
އެހެންނަމަވެސް އެ ކޮމިޝަނުގެ ކުރީގެ ރައީސް ޙުސްނުއްސުޢޫދު މީގެ ކުރިން ވިދާޅުވެފައިވަނީ ރިލްވާންގެ މަރާއި ރައީސް ޔާމީންއާއި އެއްވެސް ގުޅުމެެއްނެތްކަމަށާއި، ރައީސް ޔާމީންގެ މައްޗަށް ދަޢުވާވެސް ނުކުރެވޭނެކަމަށެވެ.
މިކަމާއި ގުޅިގެން ގިނަ ޤާނޫނީ ވަކީލުންބުނަމުންދަނީ ރައީސް ޔާމީން މަރުކޮމިޝަނަށް ހާޒިރުކޮށް މި ހިންގާ ތަޙުޤީޤު ތަކަކީ ސިޔާސީ ގޮތުން ކުރާ ކަމެއްކަމަށެވެ.