ވެލެންސިއާ އަތުން ނިއު މިއަދު 5-0އިން މޮޅުވި މެޗުގައި މޭކަށިގަނޑަށް ލިބުނު އަނިޔާގެ ސަބަބުން ނިއުގެ އަލީ އުމަރަށް ދެ ހަފުތާ އަށް ކުޅުމާ ދުރުގައި ހުންނަން ޖެހިދާނެ ކަމަށް ބެލެވެން ފަށައިފި އެވެ.
ނިއުގެ މެނޭޖަރު ޝާޒް ހަބީބް ބުނީ ފަރުވާ އަށް ފަހު އަލީ އުމަރު މިހާރު ގެއަށް ދޫކޮށްލައިފި ކަމަށާއި ކުޅުމާ ދުރުގައި ދުވަސްކޮޅަކު ހުންނަން ޖެހޭނެ ކަމަށެވެ.
"މޭކަށިގަނޑުގައި ރެނދެއް ލައިފައިވާ ކަމަށް ޑޮކްޓަރު ލަފާކުރަނީ. އެހެންވެ މާދަމާ އަދި އެފްއޭއެމުގައި ޑޮކްޓަރަށް ދެއްކުމަށް ފަހު ވަކި ގޮތެއް ފައިނަލްވާނީ. ހީވަނީ ދެހަފުތާވަރުވެދާނެހެން،" ޝާޒް ބުންޏެވެ.
އަލީ އުމަރަށް އަނިޔާވީ ވެލެންސިއާގެ އަކުރަމް އަބުދުލްގަނީ އަތުން ބޯޅަ ހޯދަން އުޅުމުގެ ތެރޭގަ އެވެ. މި އަނިޔާ އަށް ފަހު އޭނާ ވަގުތުން ހޮސްޕިޓަލަށް ގެންދިޔަ އެވެ.