ވޯލްޑް ކަޕް ކޮލިފައިންގައި ބުރާސްފަތި ދުވަހު ރާއްޖެ އާއި ހޮންކޮން މާލޭގައި ކުޅޭ މެޗު ކުޅޭ ގަޑި މެންދުރުފަހު 3:50 އަށް އެފްއޭއެމުން ބަދަލުކޮށްފި އެވެ. ކުރިން ރޭގަނޑު 9 ޖަހާއިރު ފަށަން އޮތް މެޗު އަވަސްކުރީ، އެފްއޭއެމުން ބުނި ގޮތުގައި ފީފާ އިން އެދިގެންނެވެ. އެއީ މިހާރު ރާއްޖޭގައި ކުއްލި ހާލަތު އިއުލާންކޮށްފައިވާތީ އެވެ. އެފްއޭއެމުން ބުނީ ގަޑި ބަދަލުކުރުމުގެ ކުރިން ސަރުކާރާ ވެސް މަޝްވަރާކޮށްފައިވާނެ ކަމަށެވެ. ކުއްލި ހާލަތު އިއުލާންކޮށްފައިވާތީ މެޗު އެހެން ގައުމަކަށް ބަދަލުކުރަން ހޮންކޮން އިން ވަނީ އެދިފަ އެވެ. އެކަމަކު ފީފާ އިން ވަނީ ބަދަލުނުކުރަން ނިންމައިފަ އެވެ. ގަލޮޅު ދަނޑުގައި 2001 ވަނަ އަހަރު ފެންވަރު ރަނގަޅު ލައިޓް ސިސްޓަމެއް ގާއިމްކުރި ފަހުން ގައުމީ ޓީމުގެ ގިނަ މެޗުތައް ކުޅެނީ ރޭގަނޑެވެ.