ރާއްޖޭގައި އުފެދިފައިވާ މައްސަލަތަކަށް ހައްލު ހޯދުމަށް، ޕާޓީތަކުގެ އިސްވެރިން ބާއްވާ މަޝްވަރާތަކުގައި ރައީސް މުހައްމަދު ނަޝީދު ބައިވެރިވެވަޑައިގަންނަވާ ނަމަ ބައިވެރިވެވަޑައިނުގަންނަވާނެ ކަމަށް ރައީސް މައުމޫނު އަބުދުލް ގައްޔޫމު ވިދާޅުވެއްޖެއެވެ.
ޕީޕީއެމުން އައްޑޫ ސިޓީގައި ރޭ ބޭއްވި ޖަލްސާގައި ވާހަކަ ދައްކަވަމުން މައުމޫނު ވިދާޅުވީ، އެމެރިކާގެ ސަފީރތު ޕެޓްރީޝިއާ ބުޓޭނިސް ރާއްޖެއަށް ކުރެއްވި ދަތުރުފުޅުގައި ޕާޓީތަކުގެ އިސްވެރިން ބާއްވާ މަޝްވަރާތަކުގައި ބައިވެރިވެވަޑައިގެންނެވުމަށް ދެންނެވި ކަމަށެވެ. ނަމަވެސް ނަޝީދު ބައިވެރިވެވަޑައިގަންނަވާތީ އެކަމަށް ނޫނެކޭ ބުނެފައިވާނެ ކަމަށް މައުމޫނު ވިދާޅުވިއެވެ.
މައުމޫނު ވިދާޅުވީ، މަޝްވަރާތަކަށް ނަޝީދާއެކު ވަޑައިގެންނެވުމަށް ދެކޮޅު ހެއްދެވީ، ވެރިކަން ބަދަލުކޮށްލުމުގައި އަޑިގައި ހުންނެވީ މައުމޫނު ކަމަށް ތުހުމަތު ކުރައްވާ ބޭރު ދުނިޔޭގައި ހަގީގަތާއި ހިލާފު ވާހަކަ ދައްކަވާފައިވާތީ ކަމަށެވެ.
މިޖަލްސާގައި ވާހަކަ ދައްކަވަމުން ޕީޕީއެމްގެ ޕާލިމެންޓްރީ ގުރޫޕުގެ ލީޑަރު މުލަކު ދާއިރާގެ މެމްބަރު އަބުދުﷲ ޔާމީން ވިދާޅުވީ، އަވަސް އިންތިހާބެއް ބޭއްވުމަށް ބޭރުގެ ފަރާތްތަކުން ލަފާ ދެމުން ދިޔަ ނަމަވެސް ވެރިކަން ބަދަލުވެގެން ގޮސްފައިވަނީ ގާނޫނާ ހިލާފަށް ކަމަށް ބޭރުގެ އެއްވެސް ފަރާތަކުން ފާހަގަ ނުކުރައްވާ ކަމަށެވެ.
އެހެން ކަމުން މިއީ ބަޣާވާތެއް ކަމަށް ބުނެ އެމްޑީޕީން ދައްކަމުންދާ ވާހަކަތައް ސާބިތު ކުރަން ޖެހޭ ކަމަށް ވެސް ޔާމީން ވިދާޅުވިއެވެ.
ރޭގެ ޖަލްސާގައި އައްޑޫ ސިޓީން ޑީއާރޕީއަށް ތާއިދު ކުރާ ގިނަ މެމްބަރުންތަކެއް ޕީޕީއެމާއި ގުޅުނެވެ.