ދިވެހިރާއްޖޭގައި ސިޔާސީ ޕާޓިތަކުން ކުރި ވެރިކަމުން ރައްޔިތުންނަށް ލިބުނު ފައިދާއަށްވުރެ ދައުލަތަށް ލިބުނު ގެއްލުން ބޮޑު ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
"ޖަޒީރާ ނިއުސް"ގެ ވަންޓު ވަން ޕްރޮގްރާމްގައި ވާހަކަ ދައްކަވަމުން ދިވެހި ނެޝަނަލް އެކްޝަން( ޑީއެންއޭ) ހަރަކާތުގައި އިސްކޮށް އުޅުއްވާ އުމަރު ވިދާޅުވީ ރާއްޖޭގައި ސިޔާސީ ޕާޓީތައް އުފެދުނުފަހުން 16 އަހަރުވެފައިވާއިރު، އެމާޒީއަށް ބަލާއިރު ރައްޔިތުން އެންމެ ހައްލު ބޭނުންވާ މައްސަލަަތަކަށް ހައްލު ލިބިފައިނުވާ ކަމަށެވެ.
ރާއްޖޭގައި އޮންނަ މައި ދެޕާޓީކަމަށްވާ ޕީޕީއެމް އާއި އެމްޑީޕީންވެސް ވެރިކަން ހޯދުމަށްޓަކައި ރަނގަޅުވާހަކަތަކެއް ދެއްކިނަމަވެސް، ކޮރަޕްޝަނާއި، މަސްތުވާތަކެތީގެ މައްސަަަލަތައްވެސް ހައްލު ކުރެވިފައިނުވާ ކަމަށް އުމަރު ވިދާޅުވިއެވެ.
"ދެޕާޓީންވެސް ހަމަ ވަރަށް ރަނގަޅު ވާހަކަ ދައްކާ، ކޮންމެ ކެމްޕެއިނެއްގައިވެސް. ވަަރަށް ރީތި ސްލޯގަންތައްވެސް ބޭނުންކުރޭ. އެކަމަކު ވެރިކަމަށް އައުމަށްފަހު، އަމަލު ކުރަނީ ދާދި އެއްގޮތަކަށް" އުމަރު ވިދާޅުވިއެވެ.
އުމަރު ވިދާޅުވީ އޭނާއާއި ސިޔާސީ އެހެން ބައެއް ބޭފުޅުން ގުޅިވަޑައިގެން އުފެއްދެވި ޑީއެންއޭއަކީ ހަމައެކަނި އޭނާގެ ފިކުރެއް ނޫން ކަމަށާއި، އެއީ ވަރަށް ފުޅާ ފިިކުރެއް ކަމަށެވެ. އަދި އެ ފިކުރަކީ ޤައުމު "ޓްރާންސްފޯމް" ކުރާނެ ފިކުރެއް ކަމަށްވެސް ވިދާޅުވިއެވެ. ޑީއެންއޭގައި މަސައްކަތް ކުރަނީ "ކްލީން" ބޭފުޅުން ކަމަށާއި، ހުޅަނގުގެ ލިބަރަލް ވިސްނުމަށް ތާއިދު ކުރާ ފަރާތްތަކަށް ޑީއެންއޭއިން ޖާގައެއް ނެތް ކަމަށްވެސް ވިދާޅުވިއެވެ.