ހޭންޑްބޯލް އެސޯސިއޭޝަނުން އިންތިޒާމްކޮށްގެން މި މަހުގެ 4 ވަނަ ދުވަހުން ފެށިގެން މިއަދުގެ ނިޔަލަށް ކުރިއަށްގެންދިޔަ ފުރަތަމަ އިންޓަރ ސްކޫލް ހޭންޑްބޯލް މުބާރާތް ކާމިޔާބުކަމާއި އެކު ނިންމާލައިފި އެވެ.
ޖުމްލަ 6 ސްކޫލަކުން 16 ޓީމް ވާދަކުރި މި މުބާރާތުގައި އިއްޔެ ވަނީ 12 އަހަރުންދަށުގެ އުމުރުފުރާގެ އަންހެން އަދި ފިރިހެން ފައިނަލް ކުޅެފައެވެ. މި އުމުރުފުރާގެ ފިރިހެން ޗެމްޕިއަން ޓީމަކީ އިސްކަންދަރު ސްކޫލެވެ. އެޓީމު ޗެމްޕިއަންކަން ހޯދީ ފައިނަލުގައި ކަލާފާނު ސްކޫލު ބަލިކޮށްގެންނެވެ.
މީގެ އިތުރުން މި އުމުރުފުރާގެ އަންހެން ޗެމްޕިއަން ޓީމަކީ ކަލާފާނު ސްކޫލެވެ. އެ ސްކޫލް ޗެމްޕިއަންކަން ހޯދީ ފައިނަލުގައި ދަރުމަވަންތަ ސްކޫލު ބަލިކޮށްގެންނެވެ.
އަންހެން އަދި ފިރިހެން ކުދިންނަށް އަމާޒުކުރެވިގެން ބޭއްވި މި މުބާރާތުގައި މިއަދު ކުޅެފައި ވަނީ 14 އަހަރުންދަށާއި 16 އަހަރުންދަށުގެ ފައިނަލެވެ. މި ދެ އުމުރުފުރާގެ ޗެމްޕިއަންކަންވެސް ހޯދާފައި ވަނީ ދަރުމަވަންތަ ސްކޫލެވެ.
އެގޮތުން 14 އަހަރުންދަށުގެ ޗެމްޕިއަންކަން ދަރުމަވަންތަ ހޯދީ ފައިނަލުގައި މަޖީދިއްޔާއާއި ވާދަކޮށް 10 ލަނޑު 4 ލަނޑުގެ ތަފާތު ބޮޑު ނަތީޖާއަކުން މެޗު ކާމިޔާބުކޮށްގެންނެވެ. މި މެޗުގެ މޮޅު ކުޅުންތެރިޔާގެ މަގާމަށް ހޮވުނީ ދަރުމަވަންތަ ސްކޫލުގެ ޖާޒީ ނަމްބަރު 11 އިބްރާހިމް އައިމަން އަސްލަމެވެ.
މީގެ އިތުރުން މި މުބާރާތުގެ 16 އަހަރުންދަށުގެ އުމުރުފުރާއިން ދަރުމަވަންތަ ސްކޫލް ޗެމްޕިއަންކަން ހޯދީ ފައިނަލުގައި އަރަބިއްޔާ ސްކޫލާއި ވާދަކޮށް ވާދަވެރި ކުޅުމަކަށްފަހު 6 ލަނޑު 3 ލަނޑުން ކުރި ހޯދައިގެންނެވެ.
މިއަދުގެ ފައިނަލް މެޗަށްފަހު ޗެމްޕިއަން ޓީމުތަކަށާއި، އެކި މަގާމުތަކަށް ހޮވުނު ކުޅުންތެރިންނަށް ސްޓފިކެޓާއި، މެޑަލް އަދި ޗެމްޕިއަން ޓީމަށް ދޭ ތައްޓާއި ޝީލްޑް ހަވާލުކޮށްދެއްވީ ޝަރަފުވެރި މެހެމާން އެޑިއުކޭޝަން މިނިސްޓަރ ޑރ. އައިޝަތު ޝިހާމާއި، އެ މިނިސްޓރީގެ ސްޓޭޓް މިނިސްޓަރ ޑރ. އަބްދުﷲ ނަޒީރާއި، ޔޫތު މިނިސްޓަރ މުހަންމަދު މަލީހު ޖަމާލާއި، އެ މިނިސްޓްރީގެ ނައިބު އަލްފާޟިލް އަބްދުލް މުހުސިނާއި،ޗީފް އޮފް ޑިފެންސް ފޯސް މޭޖަރ ޖެނެރަލް އަހުމަދު ޝިޔާމާއި، ހޭންޑްބޯލް އެސޯސިއޭޝަންގެ ރައީސް އިބްރާހިމް އިސްމާލުގެ އިތުރުން ދިރާގުގެ މެނޭޖަރ ޕަވާރ އެންޑް އިންފްރާސްޓުރަކްޗާރ އަލްފާޟިލް މޫސާ މަނިކު އެވެ.
މި މުބާރާތުގެ 16 އަހަރުންދަށުގެ އެންމެ މޮޅު 7 ކުޅުންތެރިންނަކީ ދަރުމަވަންތަ ސްކޫލުގެ މުހަންމަދު އިމްރާން އިބްރާހިމާއި، ހާޝިދު ހުސައިން ރަޝީދާއި، އިބްރާހިމް ސާޖިއު އަލީއާއި، އަރަބިއްޔާ ސްކޫލުގެ މުހަންމަދު ދާނިޝް އާއި، އިސްމާއިލް އީމާން އަހުމަދާއި، މުހަންމަދު ބިން ސާޖީގެ އިތުރުން މަޖީދިއްޔާ ސްކޫލުގެ އަހުމަދު މަރޫޒް މުހަންމަދު އެވެ.
މީގެ އިތުރުން މި މުބާރާތުގެ 14 އަހަރުންދަށުގެ އެންމެ މޮޅު 7 ކުޅުންތެރިންނަށް ހޮވިފައިވަނީ، މަޖީދިއްޔާ ސްކޫލުގެ މުހަންމަދު މާހީއާއި، ހުސައިން އީލާފް އަލީ އާއި، އަހުސަން މުހަންމަދާއި، ކަލާފާނު ސްކޫލުގެ ފިރާޝް ލުގުމާންގެ އިތުރުން ދަރުމަވަންތަ ސްކޫލުގެ މުހަންމަދު ރިއުމާން ޝާކިރާއި، އިބްރާހިމް އައިމަން އަސްލަމް އަދި އަހުމަދު ވަފާދު ހިލްމީ އެވެ.
މި މުބާރާތުގެ މީޑިއާ ޕާޓްނަރަކީ ވީ މީޑިއާއެވެ.