ދުނިޔޭގެ ޖޫނިއާ ސްވިމިން މުބާރާތުގައި ރާއްޖެ ޖުމްލަ 10 ގައުމީ ރެކޯޑް ދުނިޔޭގެ ޖޫނިއާ ސްވިމިން މުބާރާތުގައި ރާއްޖެ ޖުމްލަ 10 ގައުމީ ރެކޯޑް

ރުމޭނިއާގައި ކުރިއަށްދިޔަ 10 ވަނަ، ދުނިޔޭގެ ޖޫނިއާ ފެތުމުގެ މުބާރާތް، ވޯލްޑް އެކުއަޓިކްސް ޖޫނިއާ ސްވިމިން ޗެމްޕިއަންޝިޕްގައި، ރާއްޖޭގެ ފެތުންތެރިން، ޖުމްލަ 10 ގައުމީ ރެކޯޑާ އެކު މުބާރާތް ނިންމައިލައިފި އެވެ.
މިއީ މިހާތަނަށް ދުނިޔޭގެ ލެވަލްގެ ޖޫނިއާ މުބާރާތެއްގައި ވާދަކޮށް، ރާއްޖޭގެ ސްވިމިން ޓީމުގެ އެންމެ ނަތީޖާތައް ރަނގަޅު ފަހަރެވެ. ޖުމްލަ 10 ރެކޯޑް އާ ކުރީ، ނުވަ އިވެންޓެއްގައި ވާދަކޮށްގެންނެވެ.
ޖޫނިއާ ގައުމީ ޓީމުން ފުރަތަމަ ދުވަސްތަކުގައި، އާކުރި ގައުމީ ރެކޯޑްތަކަކީ، އަންހެނުންގެ ލޯންގް ކޯސް 400 މީޓަރު އިންޑިވިޖުއަލް މެޑްލޭ އިވެންޓުން މެރާލް އައިން ލަތީފް ހެދި ރެކޯޑާއި ފިރިހެނުންގެ ލޯންގް ކޯސް 50 މީޓަރާއި 100 މީޓަރު އިވެންޓްގެ އިތުރުން، ފިރިހެނުންގެ ލޯންގް ކޯސް 50 މީޓަރު ބްރެސްޓްސްޓްރޯކް އިވެންޓުގައި، ލޫތު މުހައްމަދު ހުސެއިން ހެދި ރެކޯޑްް ހިމެނެ އެެވެ.
އަންހެނުންގެ ލޯންގް ކޯސް 4 ގުނަ 200 މީޓަރު ފްރީސްޓައިލް ރިލޭ އިވެންޓުގެ ގައުމީ ރެކޯޑް އާ ކޮށްފައިވާއިރު، އަންހެނުންގެ ލޯންގް ކޯސް 200 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރެކޯޑް، މެރާލް ހެދި އެވެ. ފިރިހެނުންގެ ލޯންގް ކޯސް 200 މީޓަރު ބްރެސްޓްސްޓްރޯކް އިވެންޓުގެ ޤައުމީ ރެކޯޑު އިޒްޔާން އާ ކުރިއިރު، ތަޒްކިޔާ ވަނީ އަންހެނުންގެ ލޯންގް ކޯސް 50 މީޓަރު ބެކްސްޓްރޯކް އިވެންޓުގެ ޤައުމީ ރެކޯޑް އާކޮށްފަ އެެވެ. އަދި، ނުވަ ވަރަކަށް އަހަރު ފަހުން، އަންހެނުންގެ ލޯންގް ކޯސް 4 ގުނަ 100 މީޓަރު ފްރީސްޓައިލް ރިލޭގެ ގައުމީ ރެކޯޑު ވެސް ވަނީ އާ ކޮށްފަ އެވެ.
މުބާރާތުގެ އެންމެ ފަހު ރެކޯޑަކަށް އާ ކުރީ، އަންހެނުންގެ ލޯންގް ކޯސް 4 ގުނަ 100 މީޓަރު މެޑްލޭ ރިލޭ އިވެންޓުންނެވެ. އެ އިވެންޓްގެ ރެކޯޑް މި ފަހަރު ހެދި ޓައިމިން އަކީ، 05:04.04 އެވެ. މި ރެކޯޑް އާކުރި ޓީމުގައި ހިމެނެނީ މަލައިކާ ލިންދާ ޢިމްރާން، ސާރާ މުޙައްމަދު، މެރާލް އަދި ތަޒްކިޔާ އެވެ. މި އިވެންޓުގެ ޤައުމީ ރެކޯޑު އެންމެ ފަހުން އާކޮށްފައިވަނީ މަޑަގަސްކަރާގައި 2023 ވަނަ އަހަރު ކުރިއަށްދިޔަ އިންޑިއަން އޯޝަން އައިލަންޑް ގޭމްސްގަ އެވެ. އެ ފަހަރު ރެކޯޑް ހެދި ޓައިމިން އަކީ، 05.15.09 އެވެ. ޓީމުގައި ހިމެނުނީ އައިޝަތު ސައުސަން، ޒައިނަބް އަބްދުﷲ ޝަފީޤް، ހަނާން ހުސެއިން ހަލީމް އަދި މެރާލް އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ