ޓިކްޓޮކްގެ ޑައިރެކްޓް މެސެޖަށް ވޮއިސް ނޯޓް ފޮނުވޭ ފީޗާއެއް ތައާރަފުކޮށްފި

މަޝްހޫރު ސޯޝަލް މީޑިއާ ޕްލެޓްފޯމް ޓިކްޓޮކްއިން ޑައިރެކްޓް މެސެޖް (ޑީއެމް)ތަކަށް ގިނަ އާ ފީޗާތަކެއް ތައާރަފުކޮށްފިއެވެ. މި ފީޗާތަކުގެ ތެރޭގައި ވޮއިސް ނޯޓްސް ފޮނުވުމާއި، އެއްފަހަރާ ނުވަ ފޮޓޯ ނުވަތަ ވީޑިއޯ ހިއްސާކުރުމުގެ ގާބިލިއްޔަތުކަން ހިމެނެއެވެ. މި އާ ފީޗާތަކާއެކު، ޓިކްޓޮކްއިން މަސައްކަތްކުރަނީ އެ އެޕަކީ ހަމައެކަނި މުނިފޫހިފިލުވުމުގެ ޕްލެޓްފޯމެއްގެ ގޮތުގައި ނުބަލައި، ބޭނުންކުރާ ފަރާތްތަކަށް އެކަކު އަނެކަކާ ގުޅުން ބަދަހިކުރާ ތަނެއްގެ ގޮތުގައި ތަރައްގީކުރުމަށެވެ. މީގެ ސަބަބުން ޓިކްޓޮކްގެ މެސެޖިން އެކްސްޕީރިއަންސް، ވަޓްސްއެޕް، އިންސްޓަގްރާމް، އަދި އެޕަލްގެ މެސެޖު ފަދަ އެހެން މަޝްހޫރު ސޯޝަލް އެޕްތަކާ އެއް ފެންވަރަކަށް އުފުލިގެންދާނެއެވެ. ވޮއިސް ނޯޓްސް ފީޗާގެ ދަށުން، ޓިކްޓޮކް ބޭނުންކުރާ ފަރާތްތަކަށް 60 ސިކުންތުގެ ދިގު އޯޑިއޯ މެސެޖް ރެކޯޑްކޮށް ފޮނުވޭނެއެވެ. މި ފީޗާ އަންނަ ހަފުތާގެ ތެރޭގައި ރޯލްއައުޓް ކުރެވޭނެކަމަށް ޓިކްޓޮކްއިން ބުނެއެވެ. ފޮޓޯ އަދި ވީޑިއޯ ހިއްސާކުރުމަށް ބޭނުންވާ ފަރާތްތަކަށް ކެމެރާއިން ފޮޓޯ އަދި ވީޑިއޯ ނަގައިގެން ނުވަތަ ކެމެރާ ރޯލުން ނުވަ ފޮޓޯ ނުވަތަ ވީޑިއޯ އެހެން މީހުންނާ ހިއްސާކުރެވޭނެއެވެ. އަދި ކޮންޓެންޓް ފޮނުވުމުގެ ކުރިން އެޑިޓް ކުރުމުގެ އިޚުތިޔާރުވެސް ލިބިގެންވެއެވެ. ޔޫޒަރުންގެ ސަލާމަތީ ފިޔަވަޅެއްގެ ގޮތުން ޓިކްޓޮކްއިން ވަނީ ބައެއް ފިޔަވަޅުތައް އަޅާފައެވެ. އެގޮތުން ފުރަތަމަ މެސެޖްގެ ގޮތުގައި ފޮޓޯ ނުވަތަ ވީޑިއޯ ފޮނުވުމުގެ ހުއްދައެއް ނުދެއެވެ. މާނައަކީ، އެއްވެސް މީހަކު ފުރަތަމަ ފަހަރަށް މެސެޖުކުރާނަމަ، އެމީހުންނަށް އަމިއްލައަށް ނަގާފައިވާ ފޮޓޯ ނުވަތަ ވީޑިއޯ ފޮނުވުމުގެ ބަދަލުގައި ހަމައެކަނި ޓިކްޓޮކްގައި ހުރި ކޮންޓެންޓް ހިއްސާކުރެވޭނެއެވެ. މީގެ އިތުރުން، ފޮޓޯ ނުވަތަ ވީޑިއޯއެއް ފޮނުވުމަށް ނަގައިފިނަމަ، ޓިކްޓޮކްއިން އެމީހުންގެ ޕްރައިވެސީ ރައްކާތެރިކުރުމަށް ހަނދާންކޮށްދީ، ކޮންޓެންޓް ފޮނުވަނީ ކޮންބަޔަކަށްތޯ ބެލުމަށް އިރުޝާދު ދޭނެއެވެ. ޓިކްޓޮކްގެ ޑީއެމްތައް 16 އަހަރުން ދަށުގެ ޔޫޒަރުންނަށް ނުލިބޭއިރު، 16 އަހަރާއި 18 އަހަރާ ދެމެދުގެ ޔޫޒަރުންނަށް ރައްކާތެރިކަން އިތުރުކުރުމަށް ޓިކްޓޮކްއިން ވަނީ ފިޔަވަޅު އަޅާފައެވެ. އެގޮތުން އިޖްތިމާއީ މިންގަނޑުތަކާ ޚިލާފު ފޮޓޯތައް ދެނެގަނެ، ބްލޮކްކުރުމަށް އޮޓޮމޭޓެޑް ސިސްޓަމްތައް ވަނީ ގާއިމްކޮށްފައެވެ. އޭގެ ސަބަބުން އެ ބާވަތުގެ ފޮޓޯ ފޮނުވާ އެކައުންޓު ބްލޮކުކުރެވޭނެއެވެ. އަދި އެ ފޮޓޯ ބަލާ އެކައުންޓަށް ނުފެންނާނެއެވެ. އެގޮތުން 18 އަހަރުން މަތީގެ ޔޫޒަރުންނަށް މި ސަލާމަތީ ފީޗާ އެޕްގެ ސެޓިން ތެރެއިން އޮންކުރެވޭނެއެވެ. ޓިކްޓޮކްއިން ދެކޭ ގޮތުގައި މި އާ ފީޗާތަކަކީ ބޭނުންކުރާ ފަރާތްތަކަށް އަމިއްލަ ނަފްސު ހާމަކުރުމާއި، އެހެން މީހުންނާ ގުޅުން ބަދަހިކުރުމަށް ލިބޭ ފުރުސަތެކެވެ. މި އާ ފީޗާތަކަކީ ޓިކްޓޮކްއިން އެޕްލިކޭޝަންގެ މެސެޖިން ޕްރޮޑަކްޓް ތަރައްގީކުރުމަށް ކުރަމުންދާ މަސައްކަތުގެ ބައެކެވެ. މިދިޔަ އަހަރު ޓިކްޓޮކުން ވަނީ ގްރޫޕް ޗެޓްތައް ތައާރަފުކޮށްފައެވެ. އެއާއެކު އެ އެޕް ބޭނުންކުރާ ފަރާތްތަކަށް އެއްފަހަރާ 32 މީހުންނާ ހަމައަށް ޗެޓްކުރުމުގެ ގާބިލިއްޔަތުކަން ލިބިގެންދިޔައެވެ. މީގެ އިތުރުން، ކްރިއޭޓަރުންނާއި އެމީހުންގެ ފޮލޯވަރުންނަށް ގުޅިގެން މަސައްކަތްކުރުމަށް ޚާއްސަ ކްރިއޭޓާ ޗެޓް ރޫމްތައް ވެސް ޓިކްޓޮކްއިން ވަނީ ތައާރަފުކޮށްފައެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ