އެންމެ ފަހުން ފަސް އަހަރު ގައުމީ ޓޭބަލް ޓެނިސް މުބާރާތުގެ އަންހެން ސިންގަލްސް ޗެމްޕިއަންކަން ހޯދި ފާތިމަތު ދީމާ އަލީގެ ރެކޯޑް ނިމުމަކަށް ގެނެސް އައިޝަތު ރަފާ ނާޒިމް އަނެއްކާ ވެސް ގައުމީ ޗެމްޕިއަންކަން ހޯދައިފި އެވެ.
ފަސް އަހަރު ވެސް ދީމާ ގައުމީ ތަށި އުފުލާލީ ފައިނަލުގައި ރަފާގެ މައްޗަށް ކުރިހޯދައިގެންނެވެ. އެކަމަކު، ހެންވޭރު މުނިއުފާ ޓީޓީ ހޯލުގައި މިއަދު ކުރިއަށްދިޔަ ފައިނަލުގައި، ދީމާގެ މައްޗަށް ރަފާ ކުރިހޯދީ، ސީދާ ހަތަރު ގޭމުންނެވެ. ރަފާގެ ފަރާތުން ތަފާތު ރޫހެއް ފެނިގެންދިޔަ މި މެޗުގެ ސެޓުތައް އޭނާ ގެންދިޔައީ، 11-09، 11-09، 11-06 އަދި 15-13 އިންނެވެ. މި މެޗުގެ އެކި ސެޓުތަކުގައި ދީމާ ހިތްވަރުކޮށް މެޗުގެ ތެރެއަށް އަންނަން މަސައްކަތް ކުރި ނަމަވެސް ރަފާ ވަނީ ހިތްވަރު ދައްކައި މޮޅު ކުޅުމަކާ އެކު މި ކާމިޔާބީ ހޯދައިފަ އެވެ.
މިއީ، ރަފާ، ގައުމީ ތަށި ހޯދި ތިން ވަނަ ފަހަރެވެ. މީގެ ކުރިން ރަފާ ވަނީ 2017 އާއި 2018 ވަނަ އަހަރު ގައުމީ ޗެމްޕިއަންކަން ހޯދައިފަ އެވެ. އިނގިރޭސިވިލާތުގައި އެމްބީބީއެސް ކިޔަވަމުން އަންނަ ރަފާ، ބްރޭކުގައި ޓީޓީ ޕްރެކްޓިސް ކުރަމުން އައިސް ރަނގަޅު ލެވަލެއްގައި ކުޅެ، އަލުން މި ވަނީ ގައުމީ ތަށި ހޯދައިފަ އެވެ.
ރަފާ ވަނީ މިކްސް ޑަބަލްސް ބައިން މޫސާ މުންސިފް އަހުމަދުއާ އެއް ޕެއާ އަކަށް ކުޅެ، ރަން މެޑަލް ހޯދައިފަ އެވެ. އަދި އަންހެން ޑަބަލްސް ބައިން ރަފާ އާއި މިންހާ މަހުޖޫބު ސުޖާއުގެ ޕެއާ އަށް ލިބުނީ ރިހި މެޑަލް އެވެ.
މި ފަހަރުގެ ގައުމީ މުބާރާތުގެ 13 އަހަރުން ދަށުގެ ޗެމްޕިއަނަކީ، އައިޝަތު މަލާކް ތާސީން އެވެ. ފަނަރަ އަހަރުން ދަށުގެ އަންހެން ސިންގަލްސް ޗެމްޕިއަންކަމާއި 17 އަހަރުން ދަށުގެ، އައިޝަތު އަލްސާ ނާފިޒު ހޯދިއިރު، އަލްސާ އާއި މަލާކް ވަނީ އަންހެން ޑަބަލްސް ޗެމްޕިއަންކަން ވެސް ހޯދައިފަ އެވެ. ސަތާރަ އަހަރުން ދަށުގެ މިކްސް ޑަބަލްސް ޗެމްޕިއަނަކީ، އަލްސާ އާއި މުހައްމަދު ހަލަފް ރާފިއު އެވެ.
ނަވާރަ އަހަރުން ދަށުގެ އަންހެން ސިންގަލްސް ޗެމްޕިއަންކަން ހޯދީ، ދީމާ އެވެ.
އަންހެން ޓީމު އިވެންޓްގެ ޗެމްޕިއަންކަން، ޓީރެކްސް ސްޕޯޓްސް އެކަޑަމީ ބަލިކޮށް ހޯދީ ޑަބްލިއު ސްޕޯޓްސް އެކަޑަމީ އެވެ.