މިދިޔަ ޑިސެމްބަރު މަހު ވަޒީރުންގެ މަޖިލީހަށް ގެނައި ބަދަލާއެކު ހަތަރު ވަޒީރަކަށް ރުހުން ހޯދުމަށް ރައްޔިތުންގެ މަޖިލީހަށް ފޮނުވައިފިއެވެ.
ރައީސް ޑރ. މުހައްމަދު މުއިއްޒު ވަނީ މިނިސްޓްރީ އޮފް ހައުސިންގ ލޭންޑް އެންޑް އާބަން ޑިވެލޮޕްމަންޓް އުވާލާ ހައުސިންގ މިނިސްޓަރުކަމުގެ މަގާމުގައި ހުންނެވި ޑރ. އަލީ ހައިދަރު މިނިސްޓްރީ އޮފް ހަޔާ އެޑިޔުކޭޝަން ލޭބާ އެންޑް ސްކިލްސް ޑިވެލޮޕްމަންޓްގެ މަގާމަށް އައްޔަން ކުރައްވާފައެވެ.
އަދި ހަޔާ އެޑިއުކޭޝަން މިނިސްޓަރު ކަމުގެ މަގާމުގައި ހުންނެވި ޑރ. މަރިޔަމް މާރިޔާ ވަނީ އެގްރިކަލްޗާ އެންޑް އެނިމަލް ވެލްފަޔާ މިނިސްޓަރު ކަމަށް އައްޔަން ކުރައްވާފައެވެ.
މީގެއިތުރުން، ޕްލޭނިން އާއި ހައުސިންގެ މަސައްކަތް ވަނީ ދެމިނިސްޓްރީއަކަށް ބަދަލުކޮށް، ފިނޭންސް މިނިސްޓްރީ އާއި ޕްލޭނިން އެއްކޮށްލައި މިނިސްޓްރީ އޮފް ފިނޭންސް އެންޑް ޕްލޭނިން އަށް އެ މިނިސްޓްރީގެ ނަން ވަނީ ބަދަލުކޮށްފައެވެ. އެ މިނިސްޓްރީއަށް އައްޔަންކުރެއްވީ މޫސާ ޒަމީރެވެ.
ހައުސިން އާއި އިންފްރާސްޓްރަކްޗާ އެއްކޮށްލައި އެ މިނިސްޓްރީގެ ނަން މިނިސްޓްރީ އޮފް ހައުސިން އެންޑް އިންފްރާސްޓްރަކްޗާ އަށް ބަދަލުކޮށް އެ މިނިސްޓްރީއަށް އައްޔަން ކޮށްފައިވަނީ ޑރ. އަބްދުﷲ މުއްތަލިބެވެ.
އެހެންކަމުން އެ ހަތަރު ވަޒީރުން އަލުން ކެބިނެޓަށް އައްޔަންކުރައްވާފައިވާތީ ރައީސް ވަނީ އެ ބޭފުޅުންނަށް ރުހުން ހޯދުމަށް މަޖިލީހަށް ފޮނުއްވާފައެވެ.
ދައުރުން ބޭރުން ކުރިއަށްދާ މިއަދުގެ ޖަލްސާގައި ރައީސް ފޮނުއްވި ސިޓީ ތަޅުމަށް އިއްވައި އެ މައްސަލަ ދިރާސާ ކުރުމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ވަނީ ފޮނުވާފައެވެ.