ބޮލީވުޑްގެ މަޝްހޫރު އެކްޓަރު ސައިފް އަލީ ހާނަށް ވަޅިން ހަމަލާދީ ޒަހަމް ކޮށްލައިފި އެވެ.
އިންޑިއާގެ ނޫސްތަކުން ބުނީ މުމްބާއީގައި ސައިފް ދިރިއުޅޭ ގޭގެ ތެރެއަށް ވަދެ އޭނާއަށް ވަލިން ހަމަލާދިނީ ވައްކަން ކުރަން ވަން މީހެއް ކަމަށެވެ.
ސައިފްއަށް ދިން ހަމަލާތަކަށް އޭނާއަށް މުމްބާއީގެ ލިލަވަތީ ހޮސްޕިޓަލުގައި ފަރުވާ ދެމުން އަންނައިރު، ފުންކޮށް ވަޅި ހެރުމާ ގުޅިގެން ސާޖަރީއެއް ވެސް ވަނީ ކޮށްފަ އެވެ.
"ސައިފަށް ހަ ޒަހަމެއް ލިބިފައިވަނީ. އޭގެ ތެރެއިން ފުންކޮށް ދެ ޒަހަމް ލިބިފައިވޭ. އެއް ޒަހަމް ލިބިފައި ވަނީ މައިބަދައާ ކައިރިއަށް," ލިލަވަތީ ހޮސްޕިޓަލުން ބުންޏެވެ.
ފުލުހުން ބުނީ ވައްކަން ކުރަން ވަން މީހާ ސައިފަށް ހަމަލާ ދިނުމަށްފަހު އެތަނުން ފިލާފައިވާ ކަމަށާއި އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށެވެ. އަދި މިހާތަނަށް އެއްވެސް މީހަކު ހައްޔަރު ކޮށްފައި ނުވާ ކަމަށް ވެސް ފުލުހުން ބުންޏެވެ.
ސައިފަށް ދިން ހަމަލާގެ އިންސާފުވެރި ތަހުގީގެއް ހިންގައި، ކުށްވެރިވާ މީހާ ނުވަތަ ބަޔަކު ބަންދުކޮށް އަދަބު ދިނުމަށް ގިނަ ބަޔަކު ދަނީ ގޮވައިލަމުންނެވެ.
ބޮލީވުޑްގައި 1993 އިން ފެށިގެން ފިލްމު ކުޅެން ފަށާފައިވާ ސައިފު ކައިވެނިކޮށްގެން އުޅެނީ ބޮލީވުޑްގެ އެކްޓްރެސް ކަރީނާ ކަޕޫރާ އެވެ. އެ ދެ މީހުންގެ ދެ ކުދިން ތިބެ އެވެ.