ދިވެހީންގެރާއްޖޭގެ ދެއުޅިއެއްނުވާ ރައީސް އަނެއްކާވެސް އަނެއް ނުރައްކަލުގެ ތެރެއަށް ގައުމު ވައްޓާލީއެވެ. ހިފިނުހުރެގެން މަވަރެއް ނެތިގެން ތެޅެގަންނައިރު ރާއްޖޭގެ ހާލަތަކަށް ކުޑައިކޮށްވެސް ވިސްނާނުލައެވެ. 
ވެރިކަމަށް އެރިގޮތަށްއަރާ އަވައްޓެރި އިންޑިއާ އާއި ވިއްދާލައިގެން ގައުމީ ސަލާމަތަށް ނުރައްކާ ވާވަރުކޮށްލިއެވެ. މުއިއްޒުގެ އަމަލުތައް ބެހެއްޓިގޮތުން ރާއްޖޭގެ ޓޫރިޒަމް މާކެޓްގެ އެއްވަނައިގައި އޮތް އިންޑިއާ ރާއްޖެ ބޮއިކޮޓްކޮށް އެތަން މިލިޔަން ޑޮލަރެއް ރާއްޖެއަށް ލިބުމުގެދޮރު ބަންދުކުރިއެވެ. ސަރަހައްދުގެ ބޮޑުބާރު އިންޑިއާ އިން ރާއްޖެއާ ދެކޮޅަށް ހަނގުރާމަ އިއުލާނު ނުކޮށް ސަލާމަތްވީ ކިރިޔާއެވެ. މުއިއްޒުގެ ނޭންގާނި ކަމުން އިންޑިއާ - މޯލްޑިވްސް ގުޅުމަށް ލިބުނު ހީނަރުކަމުން އަދިވެސް މިއުޅެނީ އަރައިނުގަނެވިއެވެ. 
ބައިނަލްއަގުވާމީ މަޝްރަހު ހިނގާގޮތް ނޭގިހުރެ ސައިޒަށްވުރެ ފުޅާވާން ހަދައިގެން ފަލަސްތީނު މައްސަލާގައިވެސް މުއިއްޒު ގޮއްވާލީ އަތަށެވެ. ފަލަސްތީނުގެ ހައްގުގައި މާގަދައަށް ބަސްބުނެވޭ މީހަކަށް ހެދިގެން އުޅެން ހަދައިގެން ބައިނަލްއަގުވާމީ މުޖުތަމައުގައި ރާއްޖެ ފަލީހަތްވެ ބޮޑެތި އުދަގޫތަކާ ކުރިމަތިލާން ޖެހުނެވެ. އިޒްރޭލް ޕާސްޕޯޓް މަނާ ނުކޮށް ތިބެ އިޒްރޭލް ޕާސްޕޯޓް ބޭންކުރި ގައުމެއްގެ ގޮތުގައި ދިވެހިރާއްޖެ ލޭބަލްވިއެވެ. ބައިނަލްއަގުވާމީ މުޖުތަމައާއި ދިވެހި ރައްޔިތުންގެ ކުރިމަތީގައި މުއިއްޒު ސަރުކާރަކީ ދެފުށް ދެގޮތް މުނާފިގު އިތުބާރު ގެއްލިފައިވާ ސަރުކާރަކަށް ވެގެން ދިޔައެވެ. 
ރަޝިޔާ ޔޫކްރޭން ހަނގުރާމާގައި މީގެކުރިން ރާއްޖެ އޮތީ ވަކިފަޅިއެއް ނަގައިގެންކަމަށް ދޭހަވާ އެއްވެސް އިޝާރާތެއް ވެފައެއް ނެތެވެ. ޔޫކްރޭން މައްސަލައިގައި ރަޝިޔާއަށް ކުޑައިމީސްވާ ރާގެއްގައި ކުރީގެ ރައީސް މައުމޫނަށް ކުރެއްވުނު ޓްވީޓަކާ ގުޅިގެން އުފެދުނު ނުތަނަވަސް ކަންވެސް މީދާކަށް ދުވަހު ވަނީ ފެނިފައެވެ. އެހެން އެކަން ވެފައިވަނިކޮށް ފާޅުގައި އިޒްރޭލާއި އަދި ޔޫކްރޭނަށް ބައިއަތު ހިފައިގެންއޮތް އެސްޓޯނިއާއަށް ދެވުމުންވެސް އާދައިގެމަތީން މުއިއްޒުގެ ދުނިޔެ ރަންވެއްޖެއެވެ.
ބައިނަލްއަގުވާމީ ގޮތުން ރާއްޖެ އޮތީ އެސްޓޯނިއާ އާއި އެއްވިސްނުމެއްގައި އެއްޓްރެކްގައިކަން މުއިއްޒު އެވަނީ އެތާނގެ ވެރިންނަށް ޔަގީންކަން ދީފައެވެ. ޔޫކްރެއިން ހަގުރާމާގައި އެސްޓޯނިޔާ އަކީ ރަޝިޔާއާއި ވަރަށް ދެކޮޅު ގައުމެކެވެ. އެސްޓޯނިޔާ އާއި އެއްގޮތަށް ބައިނަލްއަގުވާމީ މަޝްރަހުގައި ރާއްޖޭގެ ސްޓެންޑް އޮތުމަކީ ރާއްޖޭން ރަޝިޔާއާއި ދެކޮޅުވެރިވުމެވެ. އެކަން ޔަގީންވަނީ އެ ގައުމުގެ ގާނޫނުހަދާ މަޖިލީހުގެ ރައީސްއާއެކު ބޭއްވި ބައްދަލުކުރުމާ ގުޅޭގޮތުން އެ ގައުމުގެ ގާނޫނުހަދާ މަޖިލިސް (ރީގިކޮގު)އިން ކޮށްފައިވާ ރަސްމީ ޕޯސްޓް އިންނެވެ. 
ޔޫކްރޭން މައްސަލައިގައި ރާއްޖޭން ޔޫކްރޭންފަޅި ނެގުމަކީ އިންތިހާ ދަރަޖައިގެ ނުރައްކާތެރި ކަމެކެވެ. ކަމުގެ ނުރައްކާތެރިކަން ބޮޑުވަނީ ރަޝިޔާއަކީ ދުނިޔޭގެ ބޮޑުާރަކަށް ވާތީ އެކަންޏެއް ނޫނެވެ. ރާއްޖެއަށް އެންމެ ގިނައިން ޓޫރިސްޓުން އަންނަ އެއްގައުމަކީ ރަޝިޔާ ކަމަށްވުމެވެ. ރާއްޖެއަށް ޓޫރިސްޓުން އެންމެ ގިނައިން އަންނަ 5 ގައުމުގެ ތެރޭގައި އަބަދުވެސް ރަޝީޔާ ހިމެނުމެވެ. އެހެން ގިނަ ގައުމުތަކާ ހިލާފަށް ރަޝިޔާގެ ފަތުރުވެރިން ރާއްޖޭގައި ހޭދަކުރާ ފައިސާ ގިނަވުމަކީވެސް ރާއްޖެއަށް އެމީހުން މުހިންމުވާ އެއްސަބަބެވެ. އަނެއްކޮޅުން އެތައް ސަތޭކަ ދިވެހިން ތައުލީމު ހާސިލްކުރުމަށާއި އެހެނިހެން ބޭނުންތަކުގައި ރަޝިޔާގައި ތިބުމަކީ ރަޝިޔާ ރާއްޖެއަށް މުހިންމުވާ ސަބަބެކެވެ. އެނޫންވެސް އެތައް ސަބަބުތަކަކާ ހުރެ އިޒްރޭލް ނޫން އެއްވެސް ގައުމަކާ ފާޅުގައި ދިވެހިން ދެކޮޅުވުމަކީ އެއްވެސް އިރަކު ދިވެއްސަކު ބޭނުންވާނެ ކަމެއްނޫނެވެ.
އެއްވެސް ކަމަކަށް ވިސްނާލުމެއްނެތި ރާއްޖޭން ބައިނަލް އަގުވާމީ ދުނިޔޭގައި ފަޅިނެގުމަކީ ނުރައްކާތެރި ކަމެކެވެ. ބިރުވެރި ކަމެކެވެ. މިފަހަރު ރަޝިޔާއިން ކުރާނީ ކީއްކަމެއްވެސް ނޭނގެއެވެ. ދެރަގޮތެއް ނުވިއްޔާ ކިތަންމެހާވެސް ރަނގަޅެވެ.