އިލެކްޝަންސް ކޮމިޝަނުގެ ހުސްވެފައިވާ މެންބަރުކަމުގެ ދެ މަގާމަށް މުހައްމަދު ޒާހިދު، ދަފްތަރު ނަންބަރު ރސ. 1548 އާއި އަބްދުއްރަހުމާން ސޮލާހު ރަޝީދު، ރޯޒް، ކ. ހުރާ އައްޔަނު ކުރަން މަޖިލީހުން މިއަދު ފާސްކޮށްފި އެވެ.
އިލެކްޝަންސް ކޮމިޝަނުގެ މެންބަރުކަމަށް އެ ދެ ބޭފުޅުން އައްޔަނު ކުރަން ފާސްކުރީ ދައުރުން ބޭރުން މިއަދު ބޭއްވި މަޖިލީހުގެ ޖަލްސާއަށް ވަޑައިގެން މެންބަރުންގެ ތެރެއިން 68 މެންބަރުންގެ ވޯޓާއެކު އެވެ. އެ ދެ ބޭފުޅުން އައްޔަނު ކުރަން ނުފެންނަ ކަމަށް އެއްވެސް ބޭފުޅަކު ވޯޓެއް ނުދެއްވަ އެވެ.
އިލެކްޝަންސް ކޮމިޝަނުގެ ދެ މެންބަރެއްގެ ގޮނޑި ހުސްވީ އެ ކޮމިޝަނުގެ ނައިބު ރައީސްކަމުގައި ހުންނެވި އަލީ ނަޝާތު އާއި އެ ކޮމިޝަނުގެ މެންބަރު، މުހައްމަދު އާސިފް ވަކި ކުރަން މިދިޔަ ނޮވެމްބަރު 25، ގައި މަޖިލީހުން ފާސްކުރުމުންނެވެ.
އެ ދެ ބޭފުޅުން އިލެކްޝަންސް ކޮމިޝަނުން ވަކި ކުރަން ފާސްކުރީ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމުގެ މަރުހަލާއަށް ހުރަސް އެޅުމާއި 2023 ވަނަ އަހަރުގެ ރިޔާސީ އިންތިހާބަށް ނުފޫޒު ފޯރުވަން މަސައްކަތް ކުރުމުގެ އިތުރުން އިލެކްޝަންސްގެ ޑޭޓާބޭސްއިން މައުލޫމާތު ނަގައިގެން އެޕްލިކޭޝަންތަކެއް ހަދައި ވިއްކި ކަމުގެ ތުހުމަތުގަ އެވެ.