އާޖެންޓީނާގެ ދެކުނު ސަރަޙައްދު ޕެޓަގޯނިއާގެ އެޕުއޭން ސިޓީގައި ރޯވެ އަނދަމުންދާ އަލިފާނުގެ ހާދިސާގައި ގިނަ އަދަދެއްގެ ގެ އަނދައިފިއެވެ.
މި ނުރައްކާތެރި ހާދިސާއާ ގުޅިގެން، އެ ސިޓީގެ އެކި ސަރަޙައްދުތަކުގައި ދިރިއުޅޭ ރައްޔިތުން ވަނީ ރައްކާތެރި ސަރަޙައްދު ތަކަށް ބަދަލުކުރަން ޖެހިފައެވެ.
ޗުބުޓް ޕްރޮވިންސްގެ ހުޅަނގު އުތުރުގައި އޮންނަ އެޕުއޭން ސިޓީގައި ހިނގި މި ހާދިސާގައި އަލިފާން ނިއްވުމުގެ މަސައްކަތުގައި ސަލާމަތީ ޚިދުމަތްތަކުގެ އިތުރުން، ރަށުގެ ރައްޔިތުންވެސް ބައިވެރިވެފައިވެއެވެ.
މި އަލިފާނުގެ ހާދިސާއަކީ ވަށައިގެންވާ ސަރަޙައްދުގެ ބޮޑު ހިއްސާއެއް ހިމެނޭ ގޮތަށް ހިނގި ބޮޑު އަލިފާނުގެ ހާދިސާއެކެވެ. ހާދިސާގައި ގެއްލުން ލިބުނު މީހުންނަށް ވަގުތީ ހިޔާވަހިކަން ފޯރުކޮށްދިނުމުގެ މަސައްކަތް ސަރުކާރުގެ ކަމާބެހޭ ފަރާތްތަކުން ކުރިއަށް ގެންދެއެވެ.
މިފަދަ ބޮޑެތި އަލިފާނުގެ ހާދިސާތަކަކީ ޕެޓަގޯނިއާގެ ސަރަޙައްދުގައި އާންމުކޮށް ދިމާވާ ކަމެއްކަމަށް ވީނަމަވެސް، މިފަހަރުގެ ހާދިސާގައި ލިބުނު ގެއްލުމަކީ ވަރަށް ބޮޑު ގެއްލުމެކެވެ. ސަރަޙައްދުގެ ތިމާވެށްޓަށާއި މުދަލަށް ލިބުނު ގެއްލުން އަދި ވަޒަންނުކުރެވޭ ކަމަށް އޮފިޝަލުން ވިދާޅުވެފައިވެއެވެ.
މި ހާދިސާއާ ގުޅިގެން އާޖެންޓީނާގެ ސަރުކާރުން ވަނީ ކުއްލި ނުރައްކަލުގެ ހާލަތު އިއުލާންކޮށް، ސަރަޙައްދަށް އިތުރު އެހީތެރިކަން ފޯރުކޮށްދީފައެވެ. އަދި ރައްޔިތުންގެ ރައްކާތެރިކަމަށްޓަކައި އިތުރު ފިޔަވަޅުތަކެއް އަޅަމުންދާ ކަމަށްވެސް ސަރުކާރުން މައުލޫމާތު ދީފައިވެއެވެ.