ރާއްޖެއިން ބައިބަލްއަގުވާމީ މައިދާނުގައި ގެންގުޅޭ ސިޔާސަތުތައް ބަދަލު ނުވާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް މިއަދު ވިދާޅުވެއްޖެ އެވެ.
ވީ ކިހިނެއް؟ - ޔޫކްރެއިން-ރަޝިއާ ހަނގުރާމައާ ގުޅިގެން މީގެ ކުރިން ރާއްޖެއިން ވަކި ކޮޅެއް ނުނަގާ އޮތް ނަމަވެސް، ޔޫކްރެއިންއަށް ރާއްޖޭގެ ތާއީދު އޮތް ކަމަށް ރައީސް މުހައްމަދު މުއިއްޒު ހާމަކުރައްވާފައިވާ ކަމަށް ދޭހަވާ މޭރުމަކުން އެސްޓޯނިއާގެ ގާނޫނު ހަދާ މަޖިލީހުން އިއްޔެ ވަނީ ބުނެފަ އެވެ.
ބުނީ ކީކޭ؟ - އެކަމާ ގުޅިގެން ކަންބޮޑުވުން ފާޅުކުރަމުން ދަނިކޮށް ފޮރިން މިނިސްޓަރު ހަލީލް މިއަދު 'އެކްސް'ގައި ކުރެއްވި ޕޯސްޓެއްގައި ވިިދާޅުވީ ބައިނަލްއަގުވާމީ މައިދާނުގައި ރާއްޖޭން ގެންގުޅޭ ސިޔާސަތުތައް ބަދަލު ނުވާ ކަމަށެވެ.
"އދ.ގައި ރާއްޖެއިން ވޯޓު ދެމުންދާ ގޮތް ބައްލަވާލެއްވުމުން އެކަން ސާފުވާނެ. ކުދި ގައުމުތަކުގެ މިނިވަންކަމާއި ސިޔާދަތާއި އިސްތިގުލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް،" މިނިސްޓަރު ވިދާޅުވި އެވެ.
ފޮރިން މިނިސްޓަރު ވިދާޅުވީ ރާއްޖޭގެ ހާރިޖީ ސިޔާސަތު ބިނާވެގެން ވަނީ އެއްވެސް ގައުމަކާ ހަތުރުވެރި ނުވެ، ދިވެހި ރައްޔިތުންނަށް ލާބަ އާއި މަންފާ ލިބޭ ގޮތަށް ކަމަށެވެ.
"ރާއްޖޭގެ މިނިވަންކަމާއި ސިޔާދަތަށް ބުރޫ ނާރާ ގޮތަށް ހުރިހާ ގައުމަކާ އެކީ ވެސް ގާތް ގުޅުން ބޭއްވުމުގު މައްޗަށް،" އޭނާ ވިދާޅުވި އެވެ.