މިދުވަސްވަރަކީ އާދަޔާ ހިލާފަށް ހޫނު ގަދަ އަދި ރޯދަ މަހާ ދިމާވުމާއި އެކު މާލެ ސަރަހައްދުގައި ކަރަންޓު ބޭނުންކުރާ ވަރު އިތުރުވެފައިވާތީ، ކަރަންޓު ބޭނުން ކުރުމުގައި އިތުރަށް ސަމާލުކަން ދިނުމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.
ފަހުމީ ކުރެއްވި އެކްސް ޕޯސްޓެއްގައި، މިދުވަސްވަރަކީ މިއަހަރު ރާއްޖެއަށް އެންމެ ހޫނު ގަދަވާނެ ދުވަސްވަރު ކަމަށް މޫސުމާބެހޭ ގައުމީ އިދާރާއިން ލަފާކޮށްފައިވާ ކަމަށް ވިދާޅުވި އެވެ. އެގޮތުން ސްޓެލްކޯގެ ތަފާސް ހިސާބުތަކުން ދައްކާ ގޮތުން އެވްރެޖް މަހެއްގައި ގްރޭޓާމާލެ ސަރަހައްދުގައި 94 މެގަވޮޓާއި ހަމައަށް ކަރަންޓް ބޭނުން ކުރާއިރު، މިދުވަސްވަރު 104.7 މެގަވޮޓާއި ހަމައަށް ދަނީ ކަރަންޓު ބޭނުން ކުރަމުން ކަމަށެވެ.
މީގެ އިތުރުން ކޮންމެ އަހަރެއްގެ ވެސް ރޯދަ މަހަކީ ކަރަންޓުގެ ބޭނުންކުރާ މިންވަރު އެހެން މަސްމަހަށް ވުރެ އިތުރު މަހަކަށް ވުމުން މިދުވަސްވަރު ކަރަންޓު ބޭނުންކުރާއިރު ކޮންމެހެން ބޭނުންވާ މިންވަރަށް ކުރުމަށާއި، ކަރަންޓު އިގްތިސާދު ކުރެއްވުމަށް މަސައްކަތް ކުރުމަށް ވަނީ އިލްތިމާސް ކޮށްފަ އެވެ.
މޫސުމާ ބެހޭ ގައުމީ އިދާރާ (މެޓް) އިން ހިއްސާކޮށްފައިވާ ތަފާސްހިސާބުން ދައްކާ ގޮތުގައި މި އަހަރު އެންމެ ހޫނު ގަދަވި ދުވަހު ހުރީ 42 ޑިގްރީ ސެލްސިއަސްގަ އެވެ. މިދިޔަ އަހަރު އެންމެ ހޫނުގަދަވި ދުވަސްވަރު މާލޭ ސަރަހައްދުގައި އިހުސާސްކުރެވޭ ހޫނުމިން 45 ޑިގްރީ ސެލްސިއަސްއަށް ވެސް އެރި އެވެ. ރާއްޖެއަށް މިދުވަސްވަރު އެންމެ ހޫނު ގަދަވާނެ ކަމަށް މެޓް އޮފީހުން ލަފާކޮށްފައިވާ ވަގުތަކީ މެންދުރު 2 ޖަހާއިރު އެވެ.