ރައީސް މުއިއްޒުގެ މެނިފެސްޓޯގައިވާ ދީނީ ދާއިރާގެ ހުރިހާ ކަމެއް ވަނީ ފެށިފައި: މިނިސްޓަރު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ މެނިފެސްޓޯގައިވާ ދީނީ ދާއިރާއާ ގުޅޭ ހުރިހާ ކަމެއް ފަށައިފިއެވެ.
ޕީއެސްއެމްގެ ”ރާއްޖެ މިއަދު“ ޓޯކްޝޯގައި ވާހަކަ ދައްކަވަމުން އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވީ، ދީނީ ދާއިރާ އިން ކުރެވުނު ކަންކަމަށް ބަލާއިރު، ޒަކާތުގެ ނިޒާމު ހަރުދަނާ ކުރުމަށް ޒަކާތު ހައުސް އުފެއްދެވުން ހިމެނޭ ކަމަށެވެ. މިނިސްޓަރު ވިދާޅުވީ، ޒަކާތު ހައުސްގެ ކަންކަން ވަރަށް ތަރުތީބުކޮށް ކުރިއަށްދާ ކަމަށެވެ.
އަދި އެކި ކަންކޮޅުތަކުގައި ޒަކާތަށް ހޭލުންތެރިކަން އިތުރު ކުރުމަށް އެކި ޕްރޮގްރާމްތައް ހިންގަމުންދާކަން ފާހަގަކުރައްވައި، މިނިސްޓަރު ވިދާޅުވީ، ފާއިތުވި ހައެއްކަ މަސް ދުވަހުގެ ތެރޭގައި، ޒަކާތު ފަންޑަށް 50 މިލިއަނެއްހައި ރުފިޔާ ޖަމާވެފައިވާ ކަމަށެވެ.
”އަޅުގަނޑުމެންގެ އަމާޒަކީ، މިކަމުގަ، މި އަހަރު ނިމިގެންދާއިރުގަ، 100 މިލިއަނާ ގާތް ކުރުން. އެއީ ތާރީހީ ކަމަކަށް ވެގެންދާނެ، އެ އަދަދަށް އަޅުގަނޑުމެންނަށް ވާސިލު ވެވިއްޖެކަމުގައި ވަނީނަމަ.“ މިނިސްޓަރު ވިދާޅުވިއެވެ.
ޒަކާތު ހައުސްގެ ކަންކަމުގައި ރައީސް މުއިއްޒުގެ ފަރާާތްޕުޅުން ނުހަނު އެއްބާރުލުން ލިބިވަޑައިގަންނަވާކަން ފާހަގަކުރައްވައި، މިނިސްޓަރު ވަނީ، ރައީސްއަށް ޝުކުރު އަަދާ ކުރައްވައިފައެވެ.
މޯލްޑިވްސް ޒަކާތު ހައުސް އުފައްދަވާފައި ވަނީ، މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހުއެވެ. ޒަކާތު ހައުސްގެ ނަމުގައި ސަރުކާރުގެ އިދާރާއެއް ގާއިމުކުރެއްވީ، ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްގީ ކުރުމުގެ މަސައްކަތްކުރުމުގެ ބޭނުމުގައެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ