ހދ. ކުޅުދުއްފުށްޓަށް މަސްތުވާތަކެތި އެތެރެކުރަން އުޅުނު މީހަކު އުމުރަށް ޖަލަށްލާން، އެ ރަށު މެޖިސްޓްރޭޓް ކޯޓުން ހުކުމްކޮށްފިއެވެ. ދެހާސް ތޭވީސް ވަނަ އަހަރުގެ ޖަނަވަރީ މަހު، ކުޅުދުއްފުށްޓަށް މަސްތުވާތަކެތި ގެންދަން އުޅުނުކަމުގެ ތުހުމަތުގައި ހައްޔަރުކޮށް، ޝަރިއަތް ކުރުމަށް ފަހު އުމުރަށް ޖަލަށްލާފައިވަނީ ކުޅުދުއްފުށީ ލޫނާ، އަލީ މުހައްމަދެވެ. އަލީ މުހައްމަދުގެ މައްޗަށް، އާދިއްތަ ދުވަހު ހުކުމް ކުރިއިރު، އޭނާގެ މައްޗަށް ދައުލަތުން އުފުލާފައިވާ ދައުވާއަކީ، ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ. މި މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި އަލީ މުހައްމަދު، ކުޅުދުއްފުށްޓަށް މަސްތުވާތަކެތި ގެންދަން އުޅޭ ކަމުގެ މައުލޫމާތު ފުލުހުންނަށް ލިބުނީ ފުލުހުންގެ އިންޓެލިޖެންސްގެ ފަރާތުންނެވެ. އިންޓެލިޖެންސްއިން ލިބުނު މައުލޫމާތުގެ އަލީގައި، މާލޭ ނޯތު ހާބަރު ސަރަހައްދުން ފުލުހުން އޭނާ ހިފަހައްޓައި ޗެކު ކުރިއިރު، އޭނާގެ ޖީންސްގެ ޖީބުން 50 ގްރާމް ޑައިމޯފިން ފެނުނެވެ. މި މައްސަލައިގައި އަލީ މުހައްމަދުގެ މައްޗަށް ކުރެވުނު ތުހުމަތުތަކަށް އޭނާ އިންކާރު ކުރިއެވެ. އޭނާ ޝަރިއަތުގައި ބުނި ގޮތުގައި އެއީ މަސްތުވާތަކެތިކަން އެނގޭނަމަ އޭނާ އެއާ ކައިރިނުވީހެވެ. އޭނާ ބުނި ގޮތުން އެއީ، އަބްދުﷲ ކިޔާ މީހެއްގެ އެއްޗެކެވެ. މި މައްސަލައިގައި އަލީ މުހައްމަދުގެ ފަރާތުން ޝަރިއަތުގައި އެދިފައިވަނީ ލުއި އަދަބެއް ކަނޑައަޅައިދިނުމަށެވެ. އެކަމަކު ޝަރިއަތުން އަލީ މުހައްމަދުގެ މައްޗަށް އިއްވީ އުމުރު ދުވަހުގެ ޖަލު ހުކުމެކެވެ. އަލީ މުހައްމަދުގެ މައްޗަށް އުމުރު ދުވަހުގެ ޖަލު ހުކުމަކާއެކު، 100،000 ރުފިޔާގެ ޖޫރިމަނާއެއް ވެސް ކުރިއެވެ. މި މައްސަލައިގައި ކުރިން އަލީ މުހައްމަދު، ފަސް ދުވަހު ބަންދުކޮށްފައި ބަހައްޓާފައިވާތީ އެ މުއްދަތުވަނީ ހުކުމުން އުނިކޮށްފައެވެ. އެހެންކަމުން، އަލީ މުހައްމަދު މި މައްސަލައިގައި ތަންފީޒު ކުރަން ޖެހޭނީ 24 އަހަރާއި، 11 މަހާއި 24 ދުވަހުގެ ހުކުމެކެވެ.