އެމެރިކާއާއެކު ނިއުކްލިއާ މަޝްވަރާތައް އަލުން ފަށާނެ ކަމުގެ އިޝާރާތެއް އީރާނުން ދިން ކަމަށް ބުނާ ވާހަކަތައް އީރާނުގެ ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލާރިޖާނީ ދޮގުކުރައްވައިިފިއެވެ. ލާރިޖާނީ އެގޮތަށް ވިދާޅުވީ އީރާނުގެ އެންމެ މަތީ ލީޑަރު އާޔަތުﷲ އަލީ ހާމަނާއީ އަވާހަރާކޮށްލުުމުން އޮމާން މެދުވެރިކޮށް މަޝްވަރާތައް ކުރުމަށް އީރާނުން ބާރުއަޅާ ކަމަށް ވޯލް ސްޓްރީޓް ޖާނަލްގައި ރިޕޯޓުކުރުމުންނެވެ. "އެމެރިކާއާއެކު މަޝްވަރާއެއް ނުކުރާނަން." އެކްސްގައި ކުރެއްވި ޕޯސްޓެއްގައި ލާރިޖިނީ ލިޔުއްވާފައިވެއެވެ. އަދި މިއީ އީރާނުން ފެށި ހަނގުރާމައެއް ނޫން ކަމަށާއި އީރާނުން މިވަގުތު އަމިއްލަ ނަފްސު ދިފާއު ކުރަނީ ކަމަށްވެސް ލާރިޖިނީ ވިދާޅުވިއެވެ. މަޝްވަރާތައް ކުރުމަށް މިހާރުވެސް ދެ ފަހަރެއްގެ މަތިން މަސައްކަތްކޮށްފައިވާ ކަމަށް އީރާނުގެ ޚާރިޖީ ވުޒާރާގެ ތަރުޖަމާނާ ހަވާލާދީ އަލް ޖަޒީރާއިން ރިޕޯޓުކޮށްފައިވެއެވެ. މިދިޔަ އަހަރު ކުރި މަޝްވަރާތައް މެދުކަނޑާލަން ޖެހުނީ އިސްރާއީލުން އީރާނަށް ހަމަލާ ދިނުމުން ކަމަށާއި، މިފަހަރުވެސް މަޝްވަރާތަކުގެ އާ ބުރަކަށް އުންމީދުކުރަމުން ދަނިކޮށް ހަމަލާ ދިނީ ކަމަށް އީރާނުން ބުނެފައިވެއެވެ. މިދިޔަ ހޮނިހިރު ދުވަހު އެމެރިކާ އާއި އިސްރާއީލުން އިސްވެ އޮވެ, އީރާނަށް ދިން ހަަމަލާގައި އެ ގައުމުގެ ރޫހާނީ ލީޑަރު ޝަހީދު ކޮށްލާފައިވާއިރު ރައްދުގައި އީރާނުން އަންނަނީ އިސްރާއީލާއި އެމެރިކާގެ ވައިގެ ބޭސްތައް ހުރި އަރަބި ގައުމުތަކަށް ވެސް ގިނަ ހަމަލާތަކެއް ދެމުންނެވެ. އޭގެ ސަބަބުން މެދުއިރުމަތި އޮތީ ބޮޑު ނުރައްކަލެއްގެ ތެރޭގައެވެ.