ފާއިތުވި ތިން އަހަރުދުވަހުގެ ތެރޭގައި ތެލުގެ އަގު އެންމެ މައްޗަށް ދިޔަ ދުވަހަށް ފަހު، ތެލުގެ އަގު މިއަދު ދަށްވާން ފަށައިފި އެވެ.
މިއީ މެދުއިރުމަތީގެ ހަމަނުޖެހުންތައް އުންމީދު ކުރި ވަރަށް ވުރެ އަވަހަށް ނިމިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޝާރާތް ކުރެއްވުމާ ގުޅިގެން، ދުނިޔޭގެ ހަކަތަ ފޯރުކޮށްދިނުމަށް ކުރިމަތިވެދާނެ ހުރަސްތަކާ މެދު އުފެދުނު ބިރުވެރިކަން ކުޑަވުމުގެ ނަތީޖާއެކެވެ.
މި ބަދަލާ އެކު ބްރެންޓް ކްރޫޑްގެ އަގު %4.2 ދަށްވެ ފީފާއެއް 94.79 ޑޮލަރަށް ތިރިވިއިރު، އެމެރިކާގެ ވެސްޓް ޓެކްސަސް އިންޓަރމީޑިއޭޓްގެ އަގު ވަނީ %4 ދަށްވެ ފީފާއެއް 90.96 ޑޮލަރަށް ވެއްޓިފަ އެވެ. އީރާނާއި އެމެރިކާ އަދި އިޒްރޭލުގެ ބާރުތަކާ ދެމެދު ހިނގަމުންދާ ހަނގުރާމަ ފުޅާވެ، ތެޔޮ ސަޕްލައި ކުރުމަށް ބުރޫއަރާފާނެ ކަމުގެ ބިރު އޮތުމުން، ތެލުގެ އަގު އިއްޔެ ފީފާއެއް 100 ޑޮލަރަށް ވުރެ މައްޗަށް އެރި އެވެ.
ސީބީއެސް ނިއުސްއަށް ދެއްވި އިންޓަވިއުއެއްގައި ޓްރަމްޕް ރޭ ވިދާޅުވީ، އީރާނާ ދެކޮޅަށް ކުރާ ހަނގުރާމަ ވަރަށް ބޮޑަށް "ފުރިހަމަވެފައިވާ" ކަމަށާއި، މި ހަނގުރާމަ ހަތަރު ފަސް ހަފުތާއަށް ދެމިގެންދާނެ ކަމަށް ކުރިން އުންމީދުކުރި ނަމަވެސް، މިހާރު ކަންތައްތައް ދަނީ އެއަށް ވުރެ މާ ބާރަށް ކަމަށެވެ.
މީގެ އިތުރުން، ރަޝިޔާގެ ރައީސް ވްލަޑިމިއާ ޕުޓިން، ޓްރަމްޕާ އެކު ފޯނުން ގުޅުއްވައި މި މައްސަލައަށް އަވަސް ހައްލެއް ހޯދުމުގެ ހުށަހެޅުންތަކާ ބެހޭ ގޮތުން މަޝްވަރާ ކުރެއްވި ކަމަށް ކްރެމްލިންއިން ހާމަކުރުމާ ގުޅިގެން ވެސް ތެލުގެ އަގު ވަނީ ދަށްވެފަ އެވެ.
ތަޖުރިބާކާރުން ވިދާޅުވާ ގޮތުގައި، ޓްރަމްޕްގެ މި ވާހަކަތަކުގެ ސަބަބުން އިއްޔެ ހަލުވިކަމާ އެކު އުފުލުނު ބާޒާރު ވަނީ ހަމައަކަށް އެޅިފަ އެވެ.
"ހަނގުރާމަ ކުރުވާނެ ކަމަށް ޓްރަމްޕް ވިދާޅުވި ވިދާޅުވުމުން ބާޒާރަށް ހަމަޖެހުން ލިބިއްޖެ،" ޑީބީއެސް ބޭންކުގެ ހަކަތައާ ބެހޭ ތަޖުރިބާކާރު ސުވްރޯ ސަރުކާރު ވިދާޅުވި އެވެ.
ނަމަވެސް، މިހާރު ހުރި ނުރައްކާތަކަށް ބާޒާރުން ދޭ ސަމާލުކަން ކުޑަވުމަކީ އެކަށީގެންވާ ކަމެއް ކަމަށް އޭނާ އިންޒާރު ދެއްވި އެވެ.
ތެލުގެ އަގު ދަށްވި ނަމަވެސް، މެދުއިރުމަތީގެ ބައެއް ބާވަތްތަކުގެ ތެލުގެ އަގު އަދިވެސް ހުރީ ފީފާއެއް 100 ޑޮލަރަށް ވުރެ މަތީގަ އެވެ. މިއީ ސަޕްލައިއާ މެދު އޮތް ކަންބޮޑުވުންތައް މުޅިން ފިލައިނުދާކަމުގެ ނިޝާނެކެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްއިން މިކަމަށް ރައްދުދީ ބުނެފައިވަނީ، ހަނގުރާމަ ނިމޭނެ ގޮތް ނިންމާނީ ތެހެރާނުން ކަމަށާއި، އެމެރިކާ އާއި އިޒްރޭލުގެ ހަމަލާތައް ކުރިއަށްދާ ނަމަ، އެ ސަރަހައްދުން ތެޔޮ ބޭރުކުރުން ހުއްޓުވާނެ ކަމަށެވެ.
މީގެ އިތުރުން، ރަޝިޔާގެ ތެލަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދިނުމަށާއި އެމެރިކާގެ ރިޒާވްގައި ހުރި ތެޔޮ ބާޒާރަށް ނެރުމަށް ވޮޝިންޓަނުން ވިސްނަމުންދާ ކަމުގެ ރިޕޯޓުތަކާ އެކު، ތެލުގެ އަގަށް ވަނީ އަސަރު ކޮށްފަ އެވެ. އެއާ އެކު، ޖީ7ގެ ގައުމުތަކުން ބުނެފައިވަނީ ބާޒާރު ހަމައަކަށް އެޅުވުމަށްޓަކައި އަޅަންޖެހޭ ކޮންމެ ފިޔަވަޅެއް އެޅުމަށް ތައްޔާރަށް ތިބި ކަމަށެވެ.