މާލޭގެ ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދަށުން، މަސްވެރިންގެ ޕާކުން ފެށިގެން ބީއެމްއެލް އާއި ހަމައަށް އޮންނަ ސަރަޙައްދު ފަޅުގައި އޮތް އުޅަނދުތައް ނެގުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އަންގައިފިއެވެ.
ބޮޑުތަކުރުފާނު މަގުގެ މަސައްކަތުގެ ތެރެއިން މިހާތަނަށް އިއްޒުއްދީން ފާލަމުން ފެށިގެން ނޯތު ހާބަރާ ހަމައަށް 380 މީޓަރުގެ ސަރަޙައްދެއް ވަނީ ތަރައްގީކޮށް ނިންމާފައެވެ. އެ ސަރަޙައްދުތައް މިހާރު އާންމުންނަށް ހުޅުވާލާފައިވާއިރު، މަގުގެ ޖާގަ ތަނަވަސްވުމުގެ ސަބަބުން ދުއްވާ އުޅަނދުތަކާއި ހިނގާބިނގާވެ އުޅޭ މީހުންނަށް ބޮޑެތި ލުއިތަކެއް ލިބެމުންދާކަން ފާހަގަކުރެވެއެވެ.