އީރާނުން ހުރްމުޒް ކަނޑުއޮޅި ބަންދުކޮށް، ގަތަރުގެ މުހިންމު ގޭސް ކާރުޚާނާއަކަށް ދިން ހަމަލާތަކާ ގުޅިގެން ދުނިޔޭގެ ބާޒާރުގައި ހަކަތައިގެ އަގުތައް އިންތިހާއަށް އުފުލިފައިވަނިކޮށް، އެ ކަނޑުއޮޅީގެ ސަލާމަތްތެރިކަން ކަށަވަރުކުރުމަށް ވިލާތުގެ ފަސް ގައުމަކާއި ޖަޕާނުން ގުޅިގެން މަސައްކަތްކުރަން ނިންމައިފިއެވެ. އިނގިރޭސިވިލާތް، ފަރަންސޭސިވިލާތް، ޖަރުމަނުވިލާތް، އިޓަލީ އަދި ނެދަލޭންޑްސްގެ އިތުރުން ޖަޕާނުން މިއަދު ނެރުނު ގުޅިފައިވާ ބަޔާނެއްގައި ބުނެފައިވަނީ، ހުރްމުޒް ކަނޑުއޮޅިން އަމާންކަމާއެކު ދަތުރުކުރެވޭނެ މަގު ފަހިކުރުމަށް ކުރެވޭ މަސައްކަތްތަކުގައި ބައިވެރިވުމަށް އެ ގައުމުތަކުން ތައްޔާރަށް އޮތް ކަމަށެވެ. އަދި އީރާނުން ވިޔަފާރި ބޯޓުފަހަރަށާއި މަދަނީ އުމްރާނީ ވަސީލަތްތަކަށް ދެމުންދާ ހަމަލާތައް ހަރުކަށި އިބާރާތުން ކުށްވެރިކޮށް، އެ އަމަލުތައް ވަގުތުން ހުއްޓާލުމަށް އެ ގައުމުތަކުން ވަނީ ގޮވާލާފައެވެ. މިދިޔަ ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައިގެ ތެރެއިން، އިސްރާއީލުން އީރާނުގެ ސައުތު ޕާސް ގޭސް ފީލްޑަށް ހަމަލާދިނުމާ ގުޅިގެން، ބަދަލުހިފުމުގެ ގޮތުން އީރާނުން ވަނީ ދުނިޔޭގެ އެންމެ ބޮޑު އެލްއެންޖީ ހަބް ކަމަށްވާ ގަތަރުގެ ރާސް ލަފާން އިންޑަސްޓްރިއަލް ސިޓީއަށް ވަރުގަދަ ހަމަލާތަކެއް ދީފައެވެ. މި ހަމަލާތަކާ ގުޅިގެން ގަތަރުން ވަނީ އެ ގައުމުގައި ތިބި އީރާނުގެ އަސްކަރީ ޑިޕްލޮމެޓުން 24 ގަޑިއިރުގެ ތެރޭގައި ގައުމުން ފޭބުމަށް އަންގާފައެވެ. ގަތަރު އެނާޖީގެ ސީއީއޯ ސައދު އަލް-ކާބީ ވިދާޅުވީ، އީރާނުގެ ހަމަލާތަކުގެ ސަބަބުން އެ ކުންފުނީގެ އެލްއެންޖީ އެކްސްޕޯޓުގެ 17 އިންސައްތަ އުފައްދާ ވަސީލަތްތަކަށް ގެއްލުންވެފައިވާ ކަމަށާއި، އެ ތަންތަން މަރާމާތުކުރުމަށް ތިނެއް ނުވަތަ ފަސް އަހަރު ނަގާނެ ކަމަށެވެ. މި ހާދިސާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފައެވެ. އެގޮތުން ބްރެންޓް ކްރޫޑް ފީފާއެއްގެ އަގު 119 އެމެރިކާ ޑޮލަރަށް އެރުމަށްފަހު، މިހާރު ހުރީ 113 ޑޮލަރުގައެވެ. އަދި ވިލާތުގެ ގޭހުގެ އަގުތައް ވަނީ 25 އިންސައްތަ އުފުލިފައެވެ.