އަންނަ އޭޕްރީލް މަހު ބާއްވާ ކައުންސިލް އިންތިހާބަށް ކުރިމަތިލާން ހުޅުވާލި ދެ ހަފުތާއަކީ މާ ކުރު މުއްދަތަކަށް ވުމުން، އިތުރު 10 ދުވަސް ދިނުމަށް އިލެކްޝަންސް ކޮމިޝަން (އީސީ)ގައި އެދިފައިވާނެ ކަމަށް އިދިކޮޅު އެމްޑީޕީން މިއަދު ބުނެފި އެވެ.
ވީކިހިނެއް؟ - ކައުންސިލްތަކުގެ އިންތިހާބުގައި ވާދަކުރުމަށް ހުޅުވާލާފައިވަނީ މި މަހުގެ 17 އިން ފެށިގެން އަންނަ މަހުގެ 1 ވަނަ ދުވަހުގެ ނިޔަލަށެވެ. އެއީ 14 ދުވަހެވެ.
އެ މުއްދަތު ކުރުވުމުން އެމްޑީޕީން އިއްޔެ ވެސް ކަންބޮޑުވުން ފާޅުކޮށްފައިވާއިރު، މިއަދު ބޭއްވި ނޫސްވެރިންގެ ބައްދަލުވުމެއްގައި ވެސް މައިގަނޑު ގޮތެއްގައި ދެއްކީ އެ ވާހަކަ އެވެ.
ބުނީ ކީކޭ؟ - ކައުންސިލް އިންތިހާބަށް އެމްޑީޕީން ކަނޑައެޅި ތަރުޖަމާނު އަދި ދިއްދޫ ދާއިރާގެ ކުރީގެ މަޖިލިސް މެންބަރު އަބްދުﷲ ވަހީދު ވިދާޅުވީ ކުރިމަތިލުމުގައި ދިމާވާ އެންމެ ބޮޑު ގޮންޖެހުމަކީ ކުށުގެ ރެކޯޑު ސާފުކުރުމުގައި މާ ލަސްވަމުންދާތީ ކަމަށެވެ.
"ކުށުގެ ރެކޯޑު ސާފުކުރުމަށްޓަކައި ގުޅުން ހުރި މުއައްސަސާތަކުން، ކަރެކްޝަންސް އިންނާއި ޖުޑިޝަލް ސާވިސް ކޮމިޝަނުން އިންތިހާއަށް އެބަ ލަސްވޭ. މި ތަންތަނުން އިންތިހާބަށް ތައްޔާރުވެފައިވާ ކަމަކަށް ލަފައެއް ނުކުރެވޭ،" އަބްދުﷲ ވަހީދު ވިދާޅުވި އެވެ.
ފުރަތަމަ ފަހަރަށް އީފާސް މެދުވެރިކޮށް ކުރިމަތިލާން ހުޅުވާލާފައިވާތީ ވެސް ގޮންޖެހުންތަކެއް ހުރިކަން އޭނާ ފާހަގަކުރެއްވި އެވެ. ވަރަށް ގިނަ ފަހަރު ފޯމު އިސްލާހުކުރަން ޖެހިގެން ވެސް ވަގުތުތަކެއް ހޭދަވަމުންދާ ކަމަށް ވިދާޅުވި އެވެ.
އޭނާ ވިދާޅުވީ މީގެ ސަބަބުން ގިނަ މީހުންގެ އިންތިހާބީ ހައްގަށް އުނިކަން ލިބިގެންދާ ކަމަށެވެ.
"އެހެންވެގެން ވަރަށް އިހުލާސްތެރިކަމާ އެކު އިލެކްޝަންސް ކޮމިޝަނުގައި ދަންނަވަން އިތުރު 10 ދުވަސް ދިނުމަށް،" އޭނާ ވިދާޅުވި އެވެ.