ވަލަށް ގެންގޮސް ގަދަކަމުން އަންހެނަކާ ބެހުނު ކަމަށް ތުހުމަތު ކުރެވޭ މައްސަލައަކާ ގުޅިގެން ހައްޔަރުކޮށްފައިވާ މީހަކު، ހައިކޯޓުން މިނިވަންކޮށްފައި ވަނިކޮށް އަނެއްކާ ވެސް އޭނާ ހައްޔަރު ކޮށްފިއެވެ. މިއީ މިދިޔަ ފެބްރުއަރީ މަހުގެ ކުރީކޮޅު ހިނގި ހާދިސާއެކެވެ. މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މިއީ، މާލޭން ދެކުނުގެ ރަށެއްގެ މީހަކު، ހަމަ އެ ރަށު އަންހެނަކު ގަދަކަމުން ސައިކަލަށް އަރުވައިގެން ވަލުތެރެއަށް ގެންގޮސް ގަދަކަމުން ބަދުއަހުލާގީ އަމަލު ހިންގި ކަމަށް ތުހުމަތު ކުރެވޭ މައްސަލައެކެވެ. މި ހާދިސާ ހިނގާފައިވަނީ ފެބުރުއަރީ މަހުގެ ހަތަރުވަނަ ދުވަހުގެ ރޭގަނޑުއެވެ. ޖެހިގެން އައި ދުވަހު ފުލުހުން ވަނީ ކޯޓު އަމުރަކާއެކު އެ ފިރިހެން މީހާ ހައްޔަރުކޮށްފައެވެ. https://www.sun.mv/218794 ފިރިހެން މީހާ ހައްޔަރުކޮށް، ބަންދާ މެދު ގޮތެއް ނިންމުމަށް، ފެބްރުއަރީ މަހުގެ ހަވަނަ ދުވަހު ކޯޓަށް ހާޒިރުކުރުމުން ކޯޓުންވަނީ، ކުށް ކުރިކަމަށް އެކަށީގެންވާވަރަށް ހެކި ލިބިފައިވާ ކަމަށް ބަލައި، 30 ދުވަހަށް އެ ފިރިހެން މީހާ ބަންދު ކުރަން އަމުރުކޮށްފައެވެ. ކުރިން ކުށުގެ ރެކޯޑެއް ނެތް މި މީހާ، 30 ދުވަހަށް ބަންދު ކުރުމުން އޭނާގެ ފަރާތުން އެ މައްސަލަ ހުށަހެޅީ ހައިކޯޓަށެވެ. ހައިކޯޓުގައި އޭނާ އިސްތިއުނާފުކޮށް ބުނީ، އޭނާ 15 ދުވަހަށްވުރެ އިތުރަށް ބަންދު ނުކުރެވޭނެ ކަމަށެވެ. ޖިނާއީ އިޖުރާއަތުގެ ގާނޫނާ ހަވާލާދީ އޭނާގެ ފަރާތުން ހުށަހެޅި މި ނުކުތާއަށް ދައުލަތުންވެސް ވަނީ ހައިކޯޓުގެ ޝަރިއަތުގައި އިއުތިރާފުވެ، ދަށު ކޯޓުގެ އަމުރު ބާތިލު ކުރަން އެދޭ ކަމަށް ބުނެފައެވެ. އެއާއެކު އޭނާ ބަންދުން ދޫކޮށްލަން ހައި ކޯޓުން އަމުރު ކުރިއެވެ. ފުލުހުންގެ މީޑިއާ އޮފިޝަލް މިއަދު "ސަން" އަށް ވިދާޅުވީ މި މައްސަލައިގެ ތުހުމަތު ކުރެވޭ މީހާ މިދިޔަ ބުރާސްފަތި ދުވަހު ބަންދުން ދޫކޮށްލުމަށް ފަހު, އިތުރު ކޯޓު އަމުރެއްގެ ދަށުން އަނެއްކާ ވެސް އެ ދުވަހު އޭނާ ހައްޔަރު ކޮށްފައިވާ ކަމަށެވެ. އޭގެ ފަހުން އޭނާގެ ބަންދުގެ މުއްދަތު ޖެހުމަށް ކޯޓަށް ހާޒިރު ކުރުމުން 15 ދުވަހަށް ބަންދު ކުރަން ވަނީ އަމުރު ކޮށްފައި ކަމަށް އޮފިޝަލް ވިދާޅުވިއެވެ. މައްސަލައާ ގުޅޭ އިތުރު ތަފްސީލެއް ފުލުހުން ނުދެއެވެ.