ޕެރިސް (މާޗް 3) - ފުޓްބޯޅައިގެ ވަރުގަދަ ދެ ބައްރު ކަމަށްވާ ދެކުނު އެމެރިކާ އާއި ޔޫރަޕްގެ ޗެމްޕިއަނުންގެ މެދުގައި ކުޅޭ، "ފައިނަލިސިމާ" ގައި އާޖެންޓީނާ އާއި ސްޕެއިން ބައްދަލުކުރާ މެޗު، މި މަހު ގަތަރުގައި ކުޅެގެން ނެތުމުން ފަސްކުރަން ނިންމާފައިވާ ކަމަށް ރިޕޯޓްތައް ބުނެފި އެވެ.
މި މަހު 27 ވަނަ ދުވަހު ދޯހާގައި ކުޅެން އޮތް ފައިނަލިސިމާ މެޗު ފަސްކޮށްފައިވާއިރު، އެ މެޗު އެހެން ސިޓީއެއްގައި ކުޅުމަށް އަންނަނީ މަޝްވަރާކުރަމުންނެވެ. އެެއީ، މެދުއިރުމަތީގައި މިހާރު ހިނގަމުން އަންނަ ހަނގުރާމައިގެ ސަބަބުންނެވެ.
އެ ގޮތުން، ފައިނަލިސިމާ މެޗު ކުޅުމަށް މި ވަގުތު އެންމެ ބޮޑަށް މަސައްކަތްކުރަމުން އަންނަނީ، މި އަހަރުގެ ފީފާ ވޯލްޑް ކަޕް ހޯސްޓްކުރާ އެއް ގައުމު ކަމަށްވާ އެމެރިކާގަ އެވެ. އެ ގޮތުން، މިއާމީގައި އެ މެޗު މިހާރު ވެސް ކަނޑައަޅާފައި އޮތް ތާރީހުގައި ކުޅެވޭތޯ މަސައްކަތް ކުރަމުން އަންނަ ކަމަށް ރިޕޯޓްތައް ބުނެ އެވެ.
އެންމެ ފަހުން، "ފައިނަލިސިމާ" މެޗެއް ކުޅެފައިވަނީ، 2022 ވަނަ އަހަރު އެެވެ. އެ ފަހަރު ޔޫރަޕްގެ ޗެމްޕިއަން އިޓަލީ އަތުން 3-0 އިން މޮޅުވެ، ތަށި އުފުލާލީ އާޖެންޓީނާ އިންނެވެ. މިއީ، ދެކުނު އެމެރިކާގެ ގައުމުތަކުގެ މެދުގައި ކުޅޭ ކޮޕަ އެމެރިކާގެ ޗެމްޕިއަނުންނާއި ޔޫރަޕްގެ ގައުމުތަކުގެ މެދުގައި ކުޅޭ ޔޫރަޕްގެ ޗެމްޕިއަނުން މެޗެއްގައި ނުކުތް ތިން ވަނަ ފަހަރެވެ.
އެ ގޮތުން، އޭގެ ކުރިން، 1985 ވަނަ އަހަރު އުރުގުއޭ އަތުން ފްރާންސް މޮޅުވިއިރު، 1993 ވަނަ އަހަރު ޑެންމާކް އަތުން އާޖެންޓީނާ ވަނީ ޕެނަލްޓީ ޖަހައިގެން މޮޅުވެފަ އެވެ.