ބޭންކް އޮފް މޯލްޑިވްސް (ބީއެމްއެލް) އިން ދ. ކުޑަހުވަދޫގައި އާ ބްރާންޗެއް ރަސްމީކޮށް ހުޅުވައިފިއެވެ. ބީއެމްއެލްއިން ބުނީ މިއީ އެ ބޭންކުގެ ޚިދުމަތް ފުޅާކުރުމަށާއި، އަތޮޅުތެރޭގެ އިގްތިސާދީ ކުރިއެރުމަށް އެ ބޭންކުން ދެމުންގެންދާ އެއްބާރުލުން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެއް ކަމަށެވެ. އެ ބަރާންޗް ހުޅުވުމަށް ކުޑަހުވަދޫގައި މިއަދު ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވާފައި ވަނީ ފިނޭންސް މިނިސްޓަރު މޫސާ ޒަމީރެވެ. ބީއެމްއެލްގެ ބުރާންޗެއް ދ. ކުޑަހުވަދޫގައި ހުޅުވައިފި--- ފޮޓޯ ބީއެމްއެލް ބީއެމްއެލްއިން ބުނީ ކުޑަހުވަދޫގައި ހުޅުވި އާ ބްރާންޗަކީ މީގެ ކުރިން އެ ރަށުގައި ހިންގަމުން އައި ބްރާންޗުގެ ބަދަލުގައި، ޒަމާނީ ވަސީލަތްތަކާއެކު ބިނާކުރެވުނު ތަނެއް ކަމަށެވެ. އަދި ކުޑަހުވަދޫގެ އިތުރުން ކައިރި ރަށްރަށުގެ ރައްޔިތުންނަށް ދެމުންދާ ޚިދުމަތްތައް އިތުރަށް އަވަސްވެ، ފަސޭހަކަމާއެކު ބޭންކިން ޚިދުމަތްތައް ލިބިގެންދާނެ ކަމަށް އެ ބޭންކުން ވަނީ ބުނެފައެވެ. ކުޑަހުވަދޫގައި ހުޅުވުނު އާ ބްރާންޗަކީ ރަށްރަށުގެ އިންފްރާސްޓްރަކްޗާ ތަރައްގީކުރުމަށާއި ޒަމާނީ ބޭންކިންގް ޚިދުމަތްތައް ފޯރުކޮށްދިނުމަށް ބޭންކުން ކުރަމުންދާ މަސައްކަތުގެ ހެއްކެއް. އަދި މިއީ ކަރުދާސް ބޭނުންކުރުން މަދުކޮށް ޑިޖިޓަލްކޮށް ޚިދުމަތް ދޭ ބްރާންޗަކަށް ވުމުން ކަސްޓަމަރުންނަށް ލިބޭ ޚިދުމަތްތައް އިތުރަށް ފުރިހަމަވެގެންދާނެ. ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް އެ ބޭންކުން ވަނީ މި އަހަރުގެ ތެރޭގައި ރާއްޖޭގެ އެކި ސަރަހައްދުތަކުގައި އަލަށް 12 ބްރާންޗެއް ހުޅުވައި ބޭންކުގެ ޚިދުމަތްތައް ފުޅާކުރުމަށް ނިންމާފައިވާ ކަމަށް ބުނެފައެވެ. ބީއެމްއެލްއިން މިހާރުވެސް ދަނީ 20 އަތޮޅު ހިމެނޭހެން ޖުމްލަ 42 ބްރާންޗާއި، 267 އޭޓީއެމްގެ އިތުރުން ޒަމާނީ ޑިޖިޓަލް ބޭންކިންގް ވަސީލަތްތައް މެދުވެރިކޮށް ފުޅާ ދާއިރާއެއްގައި ޚިދުމަތް ދެމުންނެވެ.