ގާޒާގައި އިޒްރޭލުން ކުރަމުންދާ ހަނގުރާމައާ ގުޅިގެން ދެ ގައުމުގެ ދެމެދުގައި އުފެދިފައިވާ ނުތަނަވަސްކަން އިތުރަށް ބޮޑުވެ، ދެކުނު އެފްރިކާއިން އެ ގައުމުގައި ހުރި އިޒްރޭލުގެ އެންމެ އިސް ޑިޕްލޮމެޓް ގައުމުން ބޭރުކޮށްލައިފި އެވެ.
ދެކުނު އެފްރިކާގެ ޑިޕާޓްމަންޓް އޮފް އިންޓަނޭޝަނަލް ރިލޭޝަންސް އެންޑް ކޯޕަރޭޝަނުން އިއްޔެ ބުނީ، ޕްރިޓޯރިއާގައި ހުންނަވާ އިޒްރޭލުގެ ޗާޖް ޑި އެފެއާޒް އާރިއަލް ސެއިޑްމަންއަކީ އެ ގައުމުން ބަލައިނުގަންނަ ފަރާތެއް ކަމަށް ކަނޑައަޅައި، 72 ގަޑިއިރު ތެރޭގައި ގައުމުން ފޭބުމަށް އަންގާފައިވާ ކަމަށެވެ.
އެ މިނިސްޓްރީން ތުހުމަތުކުރި ގޮތުގައި، ސެއިޑްމަން ވަނީ ދެކުނު އެފްރިކާގެ އިސްތިގުލާލަށް އުނިކަން ލިބޭ ފަދަ ގޮތަކަށް، ހާރިޖީ އުސޫލުތަކާ ކަނޑައެޅިގެން ހިލާފުވެފަ އެވެ.
އެ ޑިޕާޓްމަންޓުގެ ބަޔާނުގައިވާ ގޮތުން، އިޒްރޭލުގެ މަންދޫބު ވަނީ ސޯޝަލް މީޑިއާގައި ރައީސް ސައިރިލް ރަމަފޯސާއަށް އަމާޒުކޮށް އިހާނެތި ބަސްތަކުން ހަމަލާދީފަ އެވެ. އަދި އިޒްރޭލުގެ އިސްވެރިން އެ ގައުމަށް ކުރެއްވި ޒިޔާރަތްތަކުގެ މައުލޫމާތު ކަމާބެހޭ ފަރާތްތަކަށް ހިއްސާކޮށްފައި ނުވާކަން ވެސް ފާހަގަކުރި އެވެ.
"މިފަދަ އަމަލުތަކަކީ ހާރިޖީ އިމްތިޔާޒުތަކުގެ ނާޖާއިޒު ފައިދާ ނެގުމާއި ވިއެނާ ކޮންވެންޝަނާ ކަނޑައެޅިގެން ހިލާފު ކަންކަން،" ބަޔާނުގައިވެ އެވެ.
މީގެ އިތުރުން، މި އަމަލުތަކުގެ ސަބަބުން ދެ ގައުމުގެ ގުޅުމަށް ބޭނުންވާ އިތުބާރާއި އުސޫލުތަކަށް ވަރަށް ބޮޑަށް ހުރަސްއެޅިފައިވާ ކަމަށް ވެސް ބުނެފައިވެ އެވެ.
މީގެ ރައްދުގައި އިޒްރޭލުން ވެސް ވަނީ ދެކުނު އެފްރިކާގެ އިސް ޑިޕްލޮމެޓް ޝޯން އެޑްވާޑް ބައިނެވެލްޑަކީ ބަލައިނުގަނެވޭ ފަރާތެއް ކަމަށް ކަނޑައަޅައި 72 ގަޑިއިރު ތެރޭގައި ގައުމުން ފޭބުމަށް އަމުރުކޮށްފަ އެވެ. އިޒްރޭލުގެ ފޮރިން މިނިސްޓްރީން ބުނީ ކުރިއަށް އޮތް ތަނުގައި މިކަމާ ގުޅޭ އިތުރު ފިޔަވަޅުތައް އެޅުމާ މެދު ވިސްނާނެ ކަމަށެވެ.
ބައިނެވެލްޑަކީ ފަލަސްތީނުގައި ހުންނަވާ ދެކުނު އެފްރިކާގެ ސަފީރެވެ. އޭނާ މަސައްކަތް ކުރައްވަނީ އިޒްރޭލުން ހިފާފައިވާ ހުޅަނގު އައްސޭރީގެ ރާމައްލޯގަ އެވެ.
ދެކުނު އެފްރިކާގެ ފޮރިން މިނިސްޓްރީގެ ތަރުޖަމާނު ކްރިސްޕިން ފިރީ ވިދާޅުވީ، އިޒްރޭލުގެ މި ނިންމުމުން ފެނިގެންދަނީ ފަލަސްތީނުގެ ދައުލަތް ބަލައިގަތުމަށް އެ ގައުމުން އިންކާރުކުރާ މިންވަރު ކަމަށެވެ.
މި ހަމަނުޖެހުންތައް ހިނގާފައި މިވަނީ ގާޒާ ހަނގުރާމައާ ގުޅިގެން ދެ ގައުމުގެ ގުޅުން ގޯސްވެފައިވާތާ މަސްތަކެއް ވެފައިވަނިކޮށެވެ. ދެކުނު އެފްރިކާއިން ވަނީ ޑިސެމްބަރު 2023ގައި، އިޒްރޭލުން ނަސްލު ނައްތާލުމުގެ އަމަލުތައް ހިންގަމުންދާ ކަމަށް ތުހުމަތުކޮށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)އަށް މައްސަލައެއް ހުށަހަޅާފަ އެވެ.
ދެކުނު އެފްރިކާގެ އިދިކޮޅު ޕާޓީ، އިކޮނޮމިކް ފްރީޑަމް ފައިޓާސް އިން ވަނީ އިޒްރޭލުގެ މަންދޫބު ބޭރުކުރުމަށް ނިންމި ނިންމުމަށް މަރުހަބާ ކިޔާފަ އެވެ. އެ ޕާޓީން ވަނީ، އިޒްރޭލަކީ "ނުލަފާ ދައުލަތެއް"ގެ ގޮތުގައި ސިފަކޮށް، އިޒްރޭލާ އެކު އޮތް ހުރިހާ ޑިޕްލޮމެޓިކް އަދި އިގްތިސާދީ ގުޅުންތަކެއް ކަނޑާލުމަށް ސަރުކާރަށް ގޮވާލާފަ އެވެ.