މެޗުގެ 98 ވަނަ މިނިޓެވެ. ބެންފީކާގެ ކޯޗު ހޯސޭ މޮރީނިޔޯ، އޭނާގެ ގޯލްކީޕަރު އެންޓޮލީ ޓްރޫބިންއަށް ވެސް އަމުރުކުރީ، ރެއާލް މެޑްރިޑްގެ ޕެނެލްޓީ އޭރިޔާ ތެރެއަށް ދާށެވެ. އޭރު 3-2 އިން ކުރީގައި އޮތީ ވެސް ބެންފީކާ އެވެ. ޓްރޫބިންއަށް ވެގެން އުޅޭ ގޮތެއް ނޭނގެ އެވެ. އެކަމަކު ބެންޗުން އެގޮތަށް އެންގުމުން އޭނާ ދުވެފައި ގޮސް، ދެ ޓީމުގެ ކުޅުންތެރިންގެ ތެރެއަށް ވަދެގަތެވެ.
ބެންފީކާގެ ހިލޭ ޖެހުން ޕެނެލްޓީ އޭރިޔާގެ ތެރެއަށް އޮއްސާލުމާ އެކު އެހާމެ ރީތި އަދި ބާރަށް ބޮލުން ޖަހާ ލަނޑަކަށް ހަދައިދިނީ ޓްރޫބިން އެވެ. އެހާ ހިސާބުން ވެގެން އުޅޭ ގޮތް ސާފުވީ އެވެ.
މެޗުން މޮޅުވި ނަމަވެސް އެ ލަނޑު ނުޖެހުނު ނަމަ ޗެމްޕިއަންސް ލީގުގެ ޕްލޭ-އޮފްގެ އެންމެ ފަހު ޖާގަ ބެންފީކާއަަށް ނުލިބުނީ އެވެ. އޭރުން ބެންފީކާގެ ބަދަލުގައި އެ ޖާގަ ލިބުނީހީ ފްރާންސްގެ މާސޭއަށެވެ.
ހަމައެކަނި އެ ނަތީޖާއެއް ނޫނެވެ. މެޗުން ބަލިވުމުން ރެއާލްއަށް ލީގު ބުރުގެ ގަދަ އަށް ޓީމުގެ ތެރެއަށް ނުވަދެވި، ނުވަވަނައަށް ވެއްޓުނީ އެވެ. އަށް ވަނަ ޖާގަ ލިބުނީ މެންޗެސްޓަ ސިޓީއަށެވެ.
ރެއާލް އާއި ބެންފީކާގެ މެޗު ނިމުމުގެ ކުޑައިރުކޮޅެއް ކުރިން ސިޓީ ވަނީ ގަލަތަސަރޭ ބަލިކޮށް 16 ޕޮއިންޓް ހޯދައިފަ އެވެ. އެކަމަކު ރެއާލްއަށް ބެންފީކާއާ އެއްވަރުކުރެވުނު ނަމަ ސިޓީ އޮންނާނީ ނުވަ ވަނައިގަ އެވެ. ޕޮއިންޓްގެ ގޮތުން އެއްވަރުވެ، ލަނޑުގެ ތަފާތުން ރެއާލްއަށް އަށްވަނަ ކަށަވަރުވާނެ އެވެ.
ބެންފީކާގެ ކީޕަރު ކުރިއަށް އެރުމުން ސިޓީގެ ކުޅުންތެރިންނާއި ސިޓީގެ ކޯޗު ޕެޕް ގާޑިއޯލާއަށް ވެސް ވަމުން ދާ ގޮތެއް ނޭނގުނެވެ. އެ މީހުން ބިރުގަތީ ކީޕަރު ކުރިއަރައިފައި ހުއްޓާ ލިބޭ ބޯޅައެއް ބެންފީކާގެ ގޯލަށް ވައްދާލައި، މެޗު އެއްވަރުކޮށްފާނެތީ އެވެ. އެހެންވެ ސިޓީގެ ބައެއް ކުޅުންތެރިންނަށް ބޭއިހުތިޔާރުގައި ބުނެވުނެވެ: 'އޭނާ ކީއްވެ ކުރިއަށް އެ އަރަނީ؟"
އިތުރު ލަނޑެއް ޖަހައިގެން ބެންފީކާއަށް ތާވަލްގެ 24 ވަނަ ލިބިދާނެ ކަމަކަށް ގާޑިއޯލާ އާއި ސިޓީގެ ކުޅުންތެރިންނަކަށް ވެސް ނޭނގެ އެވެ.
އެކަމަކު ޗެމްޕިއަންސް ލީގުގެ 36 ޓީމުގެ ފަހު 18 މެޗު އެއްފަހަރާ ކުޅެމުން ދިޔަ އިރު މާސޭ އޮތީ ލަނޑުގެ ތަފާތުން ބެންފީކައަށް ވުރެ ކުރީގައިކަން ބެންޗަށް އެނގެ އެވެ. 
ގަދަ އަށަކަށް ނުގޮސް ރެއާލް ކެޓި އަނެއް ސަބަބަކީ އެތުލެޓިކް ކްލަބް އާއި ސްޕޯޓިންގެ މެޗުގެ ފަހު ވަގުތު ސްޕޯޓިންއިން ނެރުނު 3-2ގެ ނަތީޖާ އެވެ. އެ މޮޅާ އެކު ސްޕޯޓިންއަށް 16 ޕޮއިންޓް ލިބި ހަތް ވަނައަށް އެރި އެވެ. މެޗު އެއްވަރުވި ނަމަ ސްޕޯޓިން އޮންނާނީ، ރެއާލްއަށް ވުރެ އެއް ޕޮއިންޓް ދަށުން، 14 ޕޮއިންޓްގަ އެވެ.
ޕްލޭ-އޮފްގައި ބެންފީކާ އަނެއްކާވެސް ނުކުންނާނީ ރެއާލްއާ ދެކޮޅަށެވެ. ފެބްރުއަރީ މަހު އޮންނަ ދެ މެޗުގެ މި ވާދަކުރުމަށް ދުނިޔޭގެ ލޯ ހުއްޓުން ކައިރި އެވެ.
ޗެމްޕިއަންސް ލީގު މިހާރު ރާވާފައި އޮންނަ ގޮތުން ލީގު އުސޫލުން ކޮންމެ ޓީމެއް އަށް މެޗު ކުޅޭނެ އެވެ. ތާވަލްގެ ގަދަ އަށް ޓީމު ސީދާ ދާނީ ގަދަ 16އަށެވެ. ތާވަލްގެ ނުވަ ވަނައިން 24 ވަނައަށް ތަރުތީބުވާ ޓީމުތައް ކުޅޭނީ ޕްލޭ-އޮފް ދެ މެޗެވެ. ގަދަ 16ގެ ބާކީ އަށް ޖާގަ ލިބޭނީ ޕްލޭ-އޮފް މެޗުތަކުން މޮޅުވާ އަށް ޓީމަށެވެ.
ޕްލޭ-އޮފް މެޗުތައް
ރެއާލް މެޑްރިޑް/ބެންފީކާ
ބޯޑޯ-ގްލިމްޓް/އިންޓަ މިލާން
މޮނާކޯ/ޕީއެސްޖީ
ގަރަބަގް/ނިއުކާސަލް
ގަލަތަސަރޭ/ޔުއެންޓަސް
ކްލަބް ބުރުގޭ/އެތުލެޓިކޯ މެޑްރިޑް
ބޮރޫޝިއާ ޑޯޓްމުންޑް/އެޓަލަންޓާ
އޮލިމްޕިއަކޯސް/ބަޔާ ލެވަކޫސަން