ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް މިދިޔަ އަހަރު ޖުމްލަ އާމްދަނީގެ ގޮތުގައި 15.5 ބިލިއަން ރުފިޔާ ލިބިފައިވާ ކަމަށް އެ ކުންފުނީގެ މާލީ ރިޕޯޓުން ދައްކައިފިއެވެ. މިއީ 2024 ވަނަ އަހަރު އެ ކުންފުންޏަށް ލިބުނު 15.4 ބިލިއަން ރުފިޔާއާ އަޅާބަލާއިރު 98 މިލިއަން ރުފިޔާގެ ކުރިއެރުމެކެވެ.
އެސްޓީއޯއިން އާންމުކޮށްފައިވާ ހިސާބުތަކަށް ބަލާއިރު، އާމްދަނީ އިތުރުވުމާ ގުޅިގެން ކުންފުނީގެ ފައިދާ ވެސް ވަނީ އިތުރުވެފައެވެ. އެގޮތުން ޓެކްސްއަށް ކެނޑުމުގެ ކުރިން 910 މިލިއަން ރުފިޔާ ލިބިފައިވާއިރު، ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި 762 މިލިއަން ރުފިޔާ ވަނީ ލިބިފައެވެ. މިއީ އޭގެ ކުރީ އަހަރާ އަޅާބަލާއިރު 3 ޕަސަންޓުގެ ކުރިއެރުމެކެވެ.
ކުންފުނީގެ ވިޔަފާރި ރަނގަޅުވުމުގެ މައިގަނޑު ސަބަބަކީ ހުރިހާ ދާއިރާއަކުން ވެސް ލިބުނު އާމްދަނީ އިތުރުވުމެވެ. ހާއްސަކޮށް މިދިޔަ އަހަރުގެ ފަހު ކުއާޓަރުގައި އެކަނި ވެސް 4.1 ބިލިއަން ރުފިޔާގެ އާމްދަނީއެއް ލިބިފައިވެއެވެ. ތަފާސްހިސާބުތައް ދައްކާ ގޮތުން ފަހު ކުއާޓަރުގައި ތެލުގެ ވިޔަފާރިން ލިބުނު އާމްދަނީ 4 ޕަސަންޓު އިތުރުވިއިރު، އެހެނިހެން ވިޔަފާރިތަކުން ލިބުނު އާމްދަނީ ވަނީ 19 ޕަސަންޓު އިތުރުވެފައެވެ.
ރާއްޖޭގެ އެންމެ ބޮޑު ވިޔަފާރި ކުންފުނީގެ ގޮތުގައި ހަރަކާތްތެރިވާ އެސްޓީއޯއިން އަންނަނީ ތެލާއި ބޭހުގެ އިތުރުން، ކާބޯތަކެއްޗާއި ކޮންސްޓްރަކްޝަން ދާއިރާއަށް ބޭނުންވާ ސާމާނު އެތެެރެކޮށް ވިއްކަމުންނެވެ. ކުންފުނީގެ މާލީ ހާލަތު ރަނގަޅުވުމަކީ އިގްތިސާދަށް ވެސް ލިބޭ ކުރިއެރުމެއް ކަމަށް ތަޖުރިބާކާރުން ދެކެއެވެ.