ގޫގުލް މެޕްސްގެ އާޓިފިޝަލް އިންޓެލިޖެންސް (އޭއައި) "ޖެމިނައި" ގެ އެހީތެރިކަން، ހިނގާފައި ނުވަތަ ބައިސްކަލުގައި ދަތުރުކުރާ މީހުންނަށް ވެސް ލިބޭ ގޮތަށް އެ ކުންފުނިން ފުޅާކޮށްފިއެވެ. މިދިޔަ ބުރާސްފަތި ދުވަހު ގޫގުލްއިން އިޢުލާންކުރި މި ބަދަލާއެކު، މީގެ ކުރިން ހަމައެކަނި ކާރާއި ސައިކަލު ދުއްވާ މީހުންނަށް ލިބެމުންދިޔަ މި ޚިދުމަތް މިހާރު ވަނީ ހިނގާފައިދާ މީހުންނާއި ބައިސްކަލު ދުއްވާ މީހުންނަށް ވެސް ބޭނުންކުރެވޭ ގޮތަށް ހުޅުވާލާފައެވެ. https://sun.mv/213612 މި އައު އަޕްޑޭޓާއެކު ދުނިޔޭގެ ކޮންމެ ތަނެއްގައި ހުރި މީހަކަށް ވެސް އެންޑްރޮއިޑް ނުވަތަ އައިއޯއެސް ފޯނު މެދުވެރިކޮށް މި ޚިދުމަތް މިހާރު ހޯދޭނެއެވެ. މެޕްސްގައި މި ފީޗާ ބޭނުންކުރުމަށްޓަކައި، މަންޒިލް ސެޓްކުރުމަށްފަހު މަތީގައި އިންނަ މައިކްރޯފޯން އައިކަންއަށް ފިއްތާލުމުން ނުވަތަ "ހޭއި ގޫގުލް" އޭ ބުނުމުން ޖެމިނައިގެ އެހީތެރިކަން ލިބޭނެއެވެ. ޖެމިނައިގެ މި ޚިދުމަތް މި ވަގުތު ލިބެނީ ހަމައެކަނި އަޑުން ސުވާލުކޮށްގެން ކަމަށާއި، ޓައިޕްކޮށްގެން ސުވާލުކުރުމުގެ ފުރުޞަތު ނުވަތަ ޖަވާބު ލިޔުމުން ފެންނާނެ ގޮތެއް އަދި ނެތް ކަމަށް ގޫގުލްއިން ބުނެއެވެ. ހިނގާފައި ދާއިރު "މިއީ ކޮން ސަރަހައްދެއް؟" ނުވަތަ "ކައިރީގައި ހުރި އެންމެ ރަނގަޅު ރެސްޓޯރެންޓަކީ ކޮބައި؟" ފަދަ ސުވާލުތައް ކުރެވޭނެ ކަމަށާއި، މި މަޢުލޫމާތުތައް ސްކްރީނުން ފެންނާނެ ކަމަށްވެސް އެ ކުންފުނިން ބުނެފައިވެއެވެ. ބައިސްކަލުގައި ދާއިރު މަންޒިލަށް ފޯރާނެ ވަގުތު އަހާލުމުގެ އިތުރުން، ފޯނުގައި އަތްނުލައި އެހެން މީހުންނަށް މެސެޖު ފޮނުވުމާއި ދެން އޮތް މީޓިން އޮތް ގަޑި ބަލައިލުން ފަދަ ކަންކަން ވެސް ޖެމިނައި މެދުވެރިކޮށް ކުރެވޭނެއެވެ. މިދިޔަ ނޮވެމްބަރު މަހު މި ޚިދުމަތް ފުރަތަމަ ތަޢާރަފުކުރި އިރު ހިމެނި ފޮލޯ-އަޕް ސުވާލުތައް ކުރުމުގެ ފުރުޞަތާއި، އިލެކްޓްރިކް ވެހިކަލް (އީވީ) ޗާޖުކުރާ ތަންތަން ހޯދުމުގެ ޚިދުމަތް ވެސް މިހާރު އިތުރަށް ފުޅާވެގެންދާނެއެވެ.