އެމެރިކާއާއެކު މަޝްރަހު ގޯސްވެފައިވަނިކޮށް ދެ ދުވަހުގެ މުއްދަތަށް ކުރިއަށްގެންދާ "ލައިވް-ފަޔާ" ނޭވީ ތަމްރީނުތަކެއް މާދަމާ ފެށުމަށް އީރާނުގެ އަސްކަރިއްޔާއިން ނިންމައިފިއެވެ. މި ތަމްރީނުތައް ބޭއްވުމަށް ހަމަޖެހިފައިވަނީ ބައިނަލްއަގުވާމީ ގޮތުން މުހިންމު މަގެއް ކަމަށްވާ ހޯރްމޫޒް ކަނޑުއޮޅީގައެވެ. މި ތަމްރީނުތައް އިއުލާންކޮށްފައި މިވަނީ އެމެރިކާގެ އަސްކަރީ މަނަވަރުތަކާއި ވަސީލަތްތައް އެ ސަރަހައްދަށް ފޮނުވާފައިވާ ދަނޑިވަޅެއްގައެވެ. މީގެ ތެރޭގައި އެމެރިކާގެ މަތިންދާބޯޓު އުފުލާ މަނަވަރު "އަބްރަހަމް ލިންކަން" ވެސް ހިމެނެއެވެ. https://sun.mv/217350 އަނެއްކޮޅުން އެމެރިކާގެ ސެންޓްރަލް ކޮމާންޑުން ވަނީ އީރާނުގެ އަސްކަރިއްޔާއަށް ހަރުކަށި އިންޒާރެއް ދީފައެވެ. އެމެރިކާގެ މަނަވަރުތަކުގެ މަތިން އީރާނުގެ ބޯޓުތައް އުދުހުމާއި، މަނަވަރުތަކާ ކައިރިން ނުރައްކާތެރި ގޮތަކަށް ލޯންޗުފަހަރު ދުއްވުން ފަދަ އަމަލުތަކަކީ "ނުރައްކާތެރި" ކަންތައްތަކެއް ކަމަށާއި، އެފަދަ ކަންކަމަށް ކެތްނުކުރާނެ ކަމަށް އެމެރިކާއިން ބުނެފައިވެއެވެ. ވައިޓް ހައުސްއާއި އީރާނާ ދެމެދު މަޝްރަހު ގޯސްވާން ފެށީ، އީރާނުގެ ނިއުކްލިއާ ޕްރޮގްރާމް ހުއްޓުވުމަށް އެމެރިކާގެ ރައީސް ޑޮނަލްޑް ޓްރަމްޕް ބާރުއަޅުއްވަމުން ގެންދަވާތީއެވެ. މީގެ އިތުރުން، އީރާނުގައި ދާދިފަހުން ކުރިއަށްދިޔަ ސަރުކާރާ ދެކޮޅު މުޒާހަރާތަކާ ގުޅިގެން ވެސް ޓްރަމްޕް ވަނީ އީރާނަށް ހަމަލާދީފާނެ ކަމުގެ އިންޒާރު ތަކުރާރުކޮށް ދެއްވާފައެވެ. މިކަމާ ގުޅިގެން އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، އިންސާފުވެރި މަޝްވަރާތަކަކަށް އީރާނުން އޮތީ ތައްޔާރަށް ކަމަށެވެ. ނަމަވެސް، އެމެރިކާގެ މައިގަނޑު ޝަރުތުތަކަށް އޭނާ ވަނީ އިންކާރު ކުރައްވާފައެވެ. އަދި އީރާނުގެ ދިފާއީ ސިޔާސަތުތަކާއި މިސައިލް ނިޒާމުތަކަކީ ދުވަހަކުވެސް މަޝްވަރާ ކުރެވޭނެ މައުޟޫއުތަކެއް ނޫން ކަމަށް އޭނާ ވިދާޅުވިއެވެ. ހޯރްމޫޒް ކަނޑުއޮޅިއަކީ ދުނިޔޭގެ ތެލުގެ ވިޔަފާރީގެ ގާތްގަނޑަކަށް 20 އިންސައްތަ އުފުލާ މުހިންމު މަގަކަށް ވާތީ، އެ ސަރަހައްދުގައި ހިންގާ މިފަދަ އަސްކަރީ ހަރަކާތްތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށް ބޮޑެތި ބަދަލުތަކެއް އައުމުގެ ފުރުސަތު އޮވެއެވެ. މީގެ ކުރިން ވެސް މި ސަރަހައްދުގައި ތެޔޮ ބޯޓުތަކަށް ހަމަލާދިނުމާއި، އެމެރިކާގެ ޑްރޯންއެއް އީރާނުން ވައްޓާލުން ފަދަ ހާދިސާތައް ހިނގާފައިވެއެވެ. މިފަދަ ކޮންމެ ހާދިސާއަކާއެކު ދެ ގައުމުގެ ދެމެދުގައި ހަނގުރާމައެއް ފެށިދާނެ ކަމުގެ ބިރު ބައިނަލްއަގުވާމީ މުޖުތަމައުގައި ބޮޑުވެގެންދެއެވެ. އެމެރިކާއިން އީރާނުގެ ނިއުކްލިއާ އެއްބަސްވުމުން ވަކިވެ، ދަތިކުރުމުގެ ފިޔަވަޅުތައް އަޅާފައިވާތީ އީރާނުގެ އިގްތިސާދަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. ނަމަވެސް، އީރާނުން އަންނަނީ އެ ގައުމުގެ ބެލިސްޓިކް މިސައިލް ޕްރޮގްރާމަކީ ދިފާއީ ކަމެއް ކަމަށް ބުނެ އެކަން ވަރުގަދަ ކުރަމުންނެވެ.