"މާދަންވެސް އާކިލް ހިނގައިދާނެ... އޭރުން އަހަންނަށް ހެލްޕްވާނީ ކާކު؟..." އިވްލީން ހިނގައިގަތެވެ. އިވްލީންގެ ޖުމުލައިން އާކިލްގެ ހިތަށް ތަދުވިއެވެ. އޭނާ ބޭނުންވީ އިވްލީން އޭނާގެ އަތްދަނޑި މައްޗަށް އުފުލައިލާށެވެ. އަބަދުގެ އަބަދަށް ކައިރީގައި ހުންނަން ބޭނުންވާކަން ހާމަކޮށްދޭށެވެ. އެކަމަކު، އެ ހިތްވަރެއް ނުލިބުނެވެ. ******** އިވްލީނެކޭ އެއްވަރަށް ހިނގަމުންދިޔައިރު އާކިލް ހުރީ ކުށްވެރިއަކު ފަދައިން އިސްޖަހާލައިގެންނެވެ. އޭނާގެ ހިތަށް އެތައް އެއްޗެއް އަރާ ފައިބަމުން ދިޔައެވެ. މާޒީގައި އާކިލްގެ ސަބަބުން އިވްލީނަށް ލިބިފައިވި ޒަހަމު ދުވަހަކުވެސް ފިލައިގެން ހިނގައިދާނޭ ހެއްޔެވެ؟ ގެއްލުނު އިތުބާރު އަލުން ލިބިދާނެ ހެއްޔެވެ؟ މިއަދު އިވްލީންގެ ހިތަށް މާ އަސަރު ކުރާނެއެވެ. އެދުވަހު އާކިލްއެވެ. އިވްލީންގެ އަލަތު ލޯބިވެރިޔާއެވެ. އިވްލީންގެ ކުށެއް ނެތި، އާކިލް އޭނާ ދޫކޮށް މާދުރަށް ދިޔައީއެވެ. މިއަދު މިރާހެވެ. އެންމެ ގާތް އެކުވެރިޔާއެވެ. ކޮންމެ މީހަކުވެސް ހަލާކުކޮށްލީ އިވްލީންގެ ހިތެވެ. އިވްލީން އެންމެ އިތުބާރުކުރި މީހުން އެ އިތުބާރު ގެއްލުވާލައިފިއެވެ. "ގުޑް ނައިޓް..." ގޭގެ ދޮރާއި ހަމައަށް ގޮސްފައި، އިވްލީން ހުއްޓުނެވެ. އިސްޖެހިފައި ހުރި އާކިލްއަށް ބަލައިލިއެވެ. އާކިލް އޭރުވެސް ހުރީ ހިޔާލަކަށް ގެއްލިފައެވެ. "އީވް!..." އިވްލީން އެތެރެއަށް ވަދެވަދެ ހުއްޓައި، އާކިލް އޭނާގެ އަތުގައި ހިފެހެއްޓިއެވެ. އިވްލީން އަވަސް އަވަހަށް އަތް ދަމައިގަތެވެ. ވަށައިގެން ނަޒަރު ހިންގައިލިއެވެ. އެހާ ލަސް ގަޑިއެއްގައި އެ މަންޒަރު މީހަކަށް ފެނިއްޖެނަމަ، އެ ހަބަރު މުޅި ރަށަށް ފެތުރިގެން ދާނެއެވެ. އިވްލީނަށް ހަމަޖެހުމެއް ލިބުނީ އެއިން ހިސާބަކުންވެސް މީހަކު ފެންނަން ނެތުމުންނެވެ. މުޅި ރަށް ހީވަނީ ނިދާފައި އޮތް ހެންނެވެ. މާހައުލަށް ވެރިވެފައިވީ ހިމޭންކަމެވެ. މަގު ބައްތީގެ ފަނޑު އަލިކަން ފިޔަވައި އިތުރު އަލިކަމެއް ނެތެވެ. "މީހަކަށް ފެނިދާނެ..." ހާސްވެގެން އިވްލީނަށް ބުނެވުނެވެ. އާކިލްވެސް ވަށައިގެން ނަޒަރު ހިންގައިލިއެވެ. އޭރު އޭނާގެ ތުންފަތުގައިވީ ލުއި ހިނިތުންވުމެކެވެ. އިވްލީން ހާސްވެފައި ހުރުމުން، އާކިލް ކުރިއަށްވުރެ ބޮޑަށް އިވްލީންގެ ކައިރިއަށް ޖެހިލިއެވެ. "ފޯނު..." އާކިލް ދައްކައިލީ އިވްލީންގެ ފޯނެވެ. "ފޯނު ނެތްކަން ހަނދާނެއްވެސް ނެތްދޯ؟... ކައުންޓަރުމަތީ ބާއްވާފަ އޮއްވާ ހިފައިގެން މިއައީ..." "އޯހްހް..." އިވްލީން އަވަސް އަވަހަށް ފޯނު އަތުލިއެވެ. "އަހަރެން ގޯސްކަމެއް ކުރަން އުޅެނީއޭ ހީވީތަ؟... އަދިވެސް ހާދަ ގޯސްކޮށް ވިސްނާ ކުއްޖެކޭދޯ މީ...." އާކިލް ޖަހައިލީ ލުއި ހިނިގަނޑެކެވެ. އާކިލްގެ ސަމާސާއިން އިވްލީންގެ މޫނު ލަދުން ރަތްވިއެވެ. ކަންތައް ކުރެވުނުގޮތުން، އިވްލީނަށް އަމިއްލަ ނަފުސު ކުށްވެރި ކުރެވުނެވެ. މިހާރު އާކިލް އޭނާއާއި ދޭތެރޭގައި ހީކުރާނީވެސް ކީކޭ ހެއްޔެވެ؟ އަދިވެސް އިވްލީންގެ ހިތުގައި އިހުސާސްތަކެއް ވާކަން އާކިލްއަށް އެނގޭނެއެވެ. އެކަމަކު، އާކިލްގެ ކުރިމަތީގައި އެކަން ހާމަކުރަން އޭނާ ޖެހިލުންވަނީއެވެ. އެސްފިޔަ ޖަހާލާހައި މަދު ވަގުތުކޮޅެއްގެ ތެރޭގައި އާކިލް ގެއްލިދާނެއޭ ހީވަނީއެވެ. "ގުޑް ނައިޓް..." އާކިލް ހުރީ ދެޖީބަށް އަތް ޖަހާލައިގެންނެވެ. "މިރޭ ގޮސް ނިދާނީ އިނގޭ... މިރޭ އެއްވެސް މަސައްކަތެއް ނުކުރާތި!" އިވްލީން ބޯ ޖަހައިލާފައި އަވަސް އަވަހަށް އެތެރެއަށް ވަނެވެ. ދޮރު ލައްޕައި، ދޮރުގައި ލެނގިލިއިރު އޭނާގެ ހިތުގެ ތެޅުން ވަނީ އިތުރުވެފައެވެ. އާކިލްގެ ލުއި ބީހިލުންތަކާއި، ބުނެލާ ޖުމުލަތަކުން، އިވްލީންގެ ހިތް ފިދާކުރުވައެވެ. ކޮންމެ ޖުމުލައަކުން ހާމަކޮށްދެނީ އިވްލީނަށް އަޅާލާ މިންވަރެވެ. އިވްލީން ދެލޯ މަރައިލިއެވެ. އެވަގުތު އޭނާގެ ކަރުގައި އަޅާފައިވާ ފަށުގެ ފޫ ދިއްލުނެވެ. އިވްލީން ދިޔަ ދިމާއަށް ބަލަން ހުރެފައި، އެނބުރި ހިނގައިގަތް އާކިލްގެ ތުންފަތުގައިވީ ލުއި ހިނިތުންވުމެކެވެ. އިވްލީން ލަދުން އުޅުނުގޮތުން އޭނާ ހަނދާންވީ މާޒީގެ ދުވަސްތަކެވެ. އެދުވަސްތަކުގައި އިވްލީން ކިހާ ލޯބި ހެއްޔެވެ؟ އަބަދުވެސް ހުންނަނީ ހިނިތުންވެލައިގެންނެވެ. "އަހަރެން އީވްގެ ތުންފަތަށް އެ ހިނިތުންވުން ގެންނާނަން... އައި ޕްރޮމިސް..." އާކިލް އަމިއްލަ ނަފުސަށް ވައުދު ވިއެވެ. ******** ފަތިސް ނަމާދު ކޮށްގެން އާކިލް ކެފޭއަށް ދިޔައިރު، އިވްލީން ހުރީ ކައުންޓަރުގެ ކައިރީގައެވެ. ކެފޭއަށް އައިސް ތިބި ދެތިން މީހަކު ބޭރުގައި ތިއްބެވެ. އެހެން ދުވަސް ދުވަހަށްވުރެ ބޮޑަށް އިވްލީންގެ މޫނުން ވަރުބަލިކަން ފެންނަން ހުއްޓެވެ. އިވްލީން ރޭގައި އެއްވެސް ވަރަކަށް ނުނިދާ ހުރިކަން އާކިލްއަށް އެނގުނެވެ. އާކިލް ހަލުވި ފިޔަވަޅުތަކެއްގައި ގޮސް އިވްލީންގެ ކުރިމަތީގައި ހުއްޓުނެވެ. ހިތްހަމަނުޖެހުމުގެ އަސަރުތައް ފެންނަން ހުރިއިރު، އާކިލް ހުރީ ސީދާ އިވްލީންގެ ދެލޮލަށް ނަޒަރު ހުއްޓާލައިގެންނެވެ. "ރޭގަ ނުނިދަން ދޯ؟..." އާކިލް ދެލޯ ހަނިކޮށްލިއެވެ. އިވްލީން ދިޔައީ ސިއްސައިގެންނެވެ. އޭނާ ނުނިދާ ހުރިކަން އާކިލްއަށް އެނގުނީ ކިހިނެއް ހެއްޔެވެ؟ އިވްލީން އާކިލްއަށް ބަލައިލާފައި، އަވަސް އަވަހަށް އިސްޖަހައިލިއެވެ. "ނޫން ނިދިން..." ދޮގު ހަދަން ޖެހުމުން، އިވްލީނަށް އުނދަގޫވިއެވެ. "ކީއްވެ ދޮގު ހަދަނީ؟..." އާކިލްއަށް އެނގުނެވެ. އިވްލީން އުނދަގޫ ގޮތަކަށް ހިނިތުންވެލިއެވެ. އޭނާ މަސައްކަތްކުރީ އާކިލްއަށް ނުބަލާށެވެ. އާކިލް ކުޑަކޮށް ގުދުވެލާފައި އިވްލީންގެ މޫނަށް ބަލައިލިއެވެ. "އާކިލްއަށް އަބަދުވެސް އެނގޭ..." އިވްލީން ދޫކޮށްލީ ފުން ނޭވާއެކެވެ. އިވްލީން އުޅުނީ އަވަހަށް އާކިލްގެ ކައިރިން ސަލާމަތްވާށެވެ. ތަބަށް ހިފައިގެން އަވަސް އަވަހަށް ހިނގައިގަތް ވަގުތު، އެތެރެއަށް ވަދެގެން އައި މީހެއްގެ ގައިގައި ލައިގަތެވެ. އެމީހާ އައީ ކޮފީތައްޓެއް ހިފައިގެންނެވެ. އެމީހާގެ ކޮފީތަށި އިވްލީންގެ ގަޔަށް ބަންޑުންވުމުގެ ކުރިން، އާކިލް ހުށިޔާރުކަމާއިއެކު، އިވްލީންގެ ގައިގައި ހިފައި، އޭނާ އާއި ގާތަށް ދަމައިލިއެވެ. ކޮފީތަށި ބަންޑުންވީ ތަޅުންމައްޗަށެވެ. އިވްލީން ހުރީ ނޭވާ ހުއްޓުނުގޮތަށް ލާންވެސް ހަނދާންނެތިފައެވެ. އާކިލް އާއި އެހާ ގާތުގައި، އެ ބާރުގަދަ އަތުގެ ތެރޭގައި ހުންނައިރު، ވަށައިގެން ހިނގާ އެއްވެސް ކަމެއް އޭނާއަށް ނޭނގެއެވެ. އިވްލީންގެ އިހުސާސްތައް ހުރީ އޭނާގެ މޫނުން ފެންނާށެވެ. "ސޮރީ!.. ސޮރީ!..." އިވްލީންގެ ކުރިމަތީގައި ހުރި މީހާ މާފަށް އެދުނެވެ. އޭރުވެސް އާކިލް ހުރީ އިވްލީންގެ ގައިގައި ހިފަހައްޓާލައިގެންނެވެ. އިވްލީން ކަރުކެހިލި ނަމަވެސް އާކިލް އޭނާގެ ގައިން ދޫކޮށެއް ނުލިއެވެ. "އާކް!..." އިވްލީން މަޑުމަޑުން ގޮވައިލިއެވެ. އާކިލް އިވްލީންގެ ގައިން ދޫކޮށްލިއެވެ. "ސޮރީ..." އާކިލް ދޫކޮށްލީ ފުން ނޭވާއެކެވެ. އަވަސްވެފައިވާ އާކިލްގެ ހިތުގެ ހިނގުން ހަމައަކަށް އެޅެން އިރުކޮޅެއް ނެގިއެވެ. "އިޓްސް އޯކޭ...." ކުރިމަތީގައި ހުރި މީހާއަށް ބުނެލި ނަމަވެސް އިވްލީނަށް ސިއްރުން ބަލައިލެވުނީ ފަހަތުގައި ހުރި އާކިލް އަށެވެ. "އަހަރެން އޯޑަރު ދިނީ މިލްކް ކޮފީއަކަށް... ބްލެކެއް ލިބުނީ... އެހެންވެ ޗޭންޖްކޮށްލަން މިއައީ..." އެމީހާ ވާހަކަ ދެއްކީ އިނގިރޭސިންނެވެ. އިވްލީންމެންގެ ހަރަކާތްތަކަށް ބަލަން ހުރި މިރާހުގެ މޭގައި އުފެދިފައިވީ ދިލަ ރިހުމެކެވެ. އޭނާގެ ސަބަބުން އިވްލީނަށް އެއްވެސް ދެރަގޮތެއް ވެއްޖެނަމަ، އަމިއްލަ ނަފުސަށް ދުވަހަކުވެސް މައާފު ނުކުރެވޭނެއޭ އެ ހިތް ބުނަނީއެވެ. މިއަދު އޭނާއަކީ އިވްލީނާއިއެކު އެ ކެފޭގައި މަސައްކަތް ކުރަން އެކަށީގެންވާ މީހެއް ނޫނެވެ. އޮފީސް ނިންމާފައި ރިމްޝާ އައިއިރު، މިރާހު ހުރީ މޭޒު ފޮހޭށެވެ. އެއް ދިމާއަކަށް ބަލަހައްޓައިގެން ހުރެ، މޭޒު ފޮހެމުންދިޔަ މިރާހަށް، އެ މޭޒު ފޮހެން ހުރެވުނީ ކިހާ އިރެއް ވަންދެން ކަންވެސް ނޭނގޭ ކަހަލައެވެ. އޭނާގެ ސިކުނޑީގައި އެނބުރެމުންދިޔަ ހައިޖާނުގަނޑު އެއަށްވުރެ ބޮޑުކަން ބަލަން ހުންނަ ކޮންމެ މީހަކަށް އެނގޭހައި ވެއެވެ. ރިމްޝާގެ ހިތަށް ތަދުވިއެވެ. އެ ހާލުގައި މިރާހު އުޅޭތަން ބަލަން އޭނާއަށް ފަސޭހައެއް ނުވިއެވެ. އެތެރެއަށް ވަނުމުގެ ބަދަލުގައި ރިމްޝާ ދިޔައީ މިރާހުގެ ކައިރިއަށެވެ. މީހަކު އައިކަންވެސް މިރާހަށް ނޭނގުނެވެ. "ހާދަ މަޑުން ތިހުންނަނީ..." ރިމްޝާ ކަރު ކެހިލިއެވެ. މިރާހު ދިޔައީ ސިއްސައިގެންނެވެ. ފޮހެން ހުރި މޭޒަށް ބަލައިލާފައި، ޖެހިގެން ހުރި މޭޒާއި ދިމާއަށް ދިޔައެވެ. "ކިހިނެއްވީ؟..." ރިމްޝާ މިރާހުގެ ފަހަތުން ދިޔައެވެ. "ވިސްނަނީ.." މިރާހު ދިނީ ކުރު ޖަވާބެކެވެ. "ނުރައްކާތެރި އާދައެއް..." ރިމްޝާ ސަމާސާކޮށްލީ، މާހައުލުގެ ނުތަނަވަސްކަން ފިލުވައިލުމަށެވެ. މިރާހުގެ ތުންފަތަށް ލުއި ހިނިތުންވުމެއް ވެރިވިއެވެ. ރިމްޝާގެ ހިތަށް ފިނިވެގެން ދިޔައެވެ. ފަހަކަށް އައިސް މިރާހުގެ ހިނިތުންވުން ވަނީ ގެއްލިފައެވެ. ކުރިން ހުރި މަޖާގޮތް އެއްވެސް ވަރަކަށް ނެތެވެ. "ކޮންމެ މީހަކު ކޮންމެ އެއްޗެއް ކިޔަސް، އަހަރެން މިރާހަށް ޓްރަސްޓް ކުރަން..." ރިމްޝާ ބުނެލިއެވެ. "ތިހާ ފަސޭހައިން މީހުންނަން އިތުބާރު ކުރާކަށް ނުވާނެ..." މިރާހުގެ ނަޒަރު ރިމްޝާގެ ދެލޮލަށް ހުއްޓުނެވެ. "ބައެއް ކަހަލަ މީހުންނަށް އިތުބާރުކުރަން މަޖުބޫރު ކުރުވާ... އަހަރެންގެ ހިތް ނުބުނާނެ ގޯސް މީހަކަށް އިތުބާރު ކުރާކަށް..." އަމިއްލަ ނަފުސާއިމެދު އޮތް ޔަގީންކަން ހާމަކޮށްދެމުން ރިމްޝާ ބުނެލިއެވެ. މިރާހުގެ ހިތުގެ ހިނގުން އަވަސްވިހެން އޭނާއަށް ހީވިއެވެ. ރިމްޝާގެ ޖުމުލަތައް އޭނާގެ ހިތުގައި ބިންވަޅު ނެގިގެން ދިޔައެވެ. އެއީ އެހެން އަންހެން ކުއްޖެއްގެ ދުލުން ދުވަހަކުވެސް ބުނި ވާހަކައެއް ނޫނެވެ. އަމިއްލަ އާއިލާގެ ތެރެއިންވެސް އޭނާއަށް އިވިފައިވާފަދަ ޖުމުލަތަކެއް ނޫނެވެ. އަމިއްލަ ހިތުގެ އިހުސާސްތައް ފޮރުވަމުން، މިރާހް އަވަސް އަވަހަށް އެހެން ދިމާއަކަށް ނަޒަރު ހުއްޓާލިއެވެ. އޭނާ ބިރުން އުޅޭފަދަ އިހުސާސެއް ހިތުތެރޭގައި އުފަންވެދާނެތީ މިރާހް ބިރުގަތެވެ. "އީވް!.... ކަމް..." ކެފޭއިން ނުކުތް އިވްލީން ފެނުމުން، ރިމްޝާ އަތުން ހަނާ އަޅައިލިއެވެ. "އެބަ އަންނަން ކޮފީ ހިފައިގެން..." ރިމްޝާ ކޮފީ ބަލައި ދިޔުމުން، އިވްލީނާއި މިރާހު އެކަނިވިއެވެ. "އަހަރެން ބޭނުން މިރާހަށް އިތުބާރު ކުރަން..." މާހައުލުގެ ހިމޭންކަން ގެއްލުނީ އިވްލީންގެ އަޑުންނެވެ. "އެކަމަކު، ކޮންމެ ފަހަރަކު އެ ދުވަހުގެ މަތިން ހަނދާންވަނީ..." އިވްލީން ބޭނުންވީ އެންމެ ކަމެކެވެ. މިރާހްގެ ދުލުން ހަގީގަތް ހާމަކުރުވާށެވެ. ދެމީހުންގެ ދެމެދުގައި އުފެދިފައިވި ޝައްކު ފިލުވައިލާށެވެ. މިރާހް މަޑުމަޑުން ބޯ ޖަހައިލިއެވެ. "އިނގޭ..." އިވްލީން ދެއްކި ވާހަކަ އާއި ގުޅުވައިގެން ބުނާނެ އެއްޗެއް މިރާހަކަށް ނޭނގުނެވެ. އިވްލީން ހީކުރީ މިރާހުގެ ފަރާތުން އިތުރު ތަފްސީލެއް ލިބޭނެ ކަމަށެވެ. އެކަމަކު، ދެން އެދެމެދަށް ވެރިވި ހިމޭންކަމުން އިވްލީނަށް އެއް ކަމެއް ޔަގީންވިއެވެ. އިވްލީނަށް އެއްވެސް ކަމެއް ހިއްސާކުރަން މިރާހް ބޭނުން ނުވާ ކަމެވެ. ރިމްޝާ ކޮފީ ހިފައިގެން އައުމުން، ކޮފީތަށި ހިފައިގެން އިވްލީން އެތަނުން ދިޔައެވެ. "ކިހިނެއްވީ؟..." އިވްލީން ނުރުހިފައި ދިޔަގޮތުން ރިމްޝާ ހައިރާންވެފައި މިރާހަށް ބަލައިލިއެވެ. މިރާހުވެސް އިނީ އިވްލީން ދިޔަ ދިމާއަށް ނަޒަރު ހުއްޓާލައިގެންނެވެ. ދެލޮލުގައި ކަރުނައިގެ އަސަރުވީއިރު، އިވްލީން ހުއްޓުވަން ބޭނުންވެފައި އިންވަރު އޭނާގެ މޫނުން ހާމަކޮށްދެއެވެ. "އަހަންނާ ވާހަކަ ދައްކާހިތްވާނެ މީހެއް ނުވާނެ..." މިރާހް އިސްޖަހައިލިއެވެ. "އެ ލިސްޓްގަ އަހަރެންވެސް އިންކްލޫޑްކުރީތަ ތި؟..." ރިމްޝާ ތުން ފިއްތައިލިއެވެ. "ނޫން..." އަމިއްލަ އިހުތިޔާރުން ބޭރުގައި މިރާހަށް ބުނެވުނެވެ. "ދެން ކީއްވެ އެހެން ބުނީ..." ރިމްޝާ މިރާހްގެ ކޮނޑުގައި ޖަހައިލިއެވެ. މިރާހް ހައިރާންވެފައި ބަލައިލިގޮތުން ރިމްޝާ ހިނިގަނޑެއް ޖަހައިލާފައި މިރާހުގެ އަނެއް ކޮނޑުގައިވެސް ޖެހިއެވެ. އެ މަންޒަރު ބަލަން ހުރި އިވްލީންގެ ހިތަށް އުނދަގޫވިއެވެ. އެންމެން މިރާހަށް ޝައްކުގެ ނަޒަރަކުން ބަލާއިރު، ރިމްޝާ އެގޮތަށް ނުދެކެނީ ކީއްވެ ހެއްޔެވެ؟ އިވްލީނަށް ހިތި ގޮތަކަށް ހިންދިރުވައިލެވުނެވެ. އިވްލީންގެ ހަރަކާތްތަކަށް ބަލަން ހުރި އާކިލްއަށް ނެގުނީ މުޅީން ގޯސް މާނައެކެވެ. އޭނާއަށް ފެނުނީ އިވްލީން މިރާހަށް ބެލިގޮތެވެ. ރިމްޝާ އާއި މިރާހުގެ ގާތްކަމުން އިވްލީނަށް އުނދަގޫވާންވީ ކީއްވެ ހެއްޔެވެ؟ އިވްލީންގެ ހިތުގައި އާކިލްއަށް ދެވުނު މަގާމް ފަނޑުވެ، އެ މަގާމް މިރާހަށް ދިނީ ހެއްޔެވެ؟ އެކުވެރިކަމަށްވުރެ ބޮޑު ގުޅުމެއް އެދެމެދުގައި ވަނީ ހެއްޔެވެ؟ މިރާހްގެ ސަބަބުން އިވްލީންގެ ހިތަށް އެހާ ތަދުވާނީ، އެ ހިތުގައި އެހެން އިހުސާސެއް ވާތީއެވެ. އެއީ އާކިލްއަށް ވިސްނުނު ގޮތެވެ. (ނުނިމޭ)