އޭނާގެ ކަމަކީ ދެބަސްވުމެވެ. އަބަދުވެސް އިވޭނީ ފިރިމީހާއާއި ދިމާއަށް އަނބިމީހާ އެއްޗެތިގޮވާއަޑެވެ. އެކަމަކު ފިރިމީހާއަކީ ވަރަށް ބަލި މީހެކެވެ. ތަންތަނަށް ގޮސް އުޅެވޭނީވެސް މީހުންގެ އެހީތެރިކަމާއިއެކުގައެވެ.
ދެމަފިރިންނަށް 2 ދަރިންވެސް ލިބިފައިވެއެވެ. ކުދިންގެ އުމުރަށް ބަލައިފިނަމަ ވާނީ 10، 12 އަހަރުވަރެވެ. އެކުދިން ރޯއަޑުވެސް ވަރަށް ގިނައިން އިވޭނެއެވެ. އެހެންކަމުން އަވަށްޓެރިންނަށް އެކަންކަން އޮންނަނީ ވަރަށް ބޮޑު ކަމަކަށްވެފައެވެ.
އަންހެން މީހާއަކީ މީހުންނާއި ވާހަކަދައްކައި އުޅޭ މީހެއް ނޫނެވެ. ފިރިމީހާގެ ޙާލު ބަލާލަން އަވަށްޓެރިއަކު ގެއަށް ވަނަސް އެމީހަކަށްވެސް އެއްޗެތިކިޔާތީ އެގެއަކަށް އެކަކުވެސް ނުވަދެއެވެ. ދުވަސްތަކެއް އެގޮތަށް ފާއިތުވުމަށްފަހު ފިރިމީހާ ނިޔާވެއްޖެއެވެ.
ފިރިމީހާ ނިޔާވުމުން ޖަނާޒާގެ ކަންކަން ފުރިހަމަކޮށްފައި އައިސް ފިރިމީހާގެ ބޭބެ ލިޔުމެއްދީފައި ކިޔާލަން ބުންޏެވެ. "އަހަރެންގެ 2 ދަރިންގެ މަންމާއެވެ! އަހރެންގެ އަނބިމީހާއެވެ. ކަލޭގެ އަނިޔާވެރިކަމުގައި ވަރަށް ގިނަ ދުވަހު އުޅެފައި ދުނިޔެ ދޫކޮށް މިދަނީއެވެ. އަހަރެންގެ ގެދޮރާއި މުދަލުން ކަލެއަށް ލިބޭނީ ހަމައެކަނި ޝަރީޢަތުން ދިން އެއްޗެކެވެ. ގެދޮރު އެހެރީ ކުދިން ބޮޑުވަންދެން ބޭބެގެ ބެލުމުގެދަށުގައެވެ. އެކައުންޓުގައި ހުރި ފައިސާވެސް ހުންނާނީ ބޭބެ އާއި ޙަވާލުކޮށްފައެވެ."
އަނބިމީހާ ވަރަށް ރުޅިގަދަވިއެވެ. މިއީ ކޮން އިރަކު ކޮންގޮތަކުން ލިބުނު ލިޔުމެއްތޯ ސުވާލުކުރުމުން ބޭބެ ބުނީ އިތުރު މައްސަލއެއް އޮތްނަމަ ޝަރީޢަތަށް ދިއުމަށެވެ. އެވަގުތު އަނބިމީހާއަށް އަޑެއް އިވުނެވެ. "އަނބިމީހާއެވެ. ގެދޮރާއި ފައިސާގެ ދަހިވެތިކަމުގައި ކުރަމުން އައި އަނިޔާތަކުގެ ސަބަބުން އަހަރެން ދުނިޔެއާއި ވަކިވިނަމަވެސް ގެދޮރާއި ފައިސާ ނުލިބުމުން ވަރަށް ދެރަވެއްޖެދޯއެވެ! މިއަށްވުރެ މާބޮޑަށް ދެރަވާންޖެހޭނެ ދުވަސް އޮތީ ކުރިއަށެވެ. އެއީ އެހާ ބަލިޙާލުގައި އަހަރެން އޮތް އިރުވެސް އަހަރެންނަށް ކުރި އަނިޔާތަކަށް ﷲ ކަލެއަށް ޖަޒާ ދެއްވަވާނެ ދުވަހެވެ!"
ދެކަންފަތުގައި އަތްއަޅައިގެން ބާރުބާރަށް ތެޅިގެންފައި އަނބިމީހާ އަވަސް އަވަހަށް ގެއިން ނުކުމެގެން ހިނގައްޖެއެވެ. އެއިގެ ފަހުން މުޅި ޢުމުރުގައިވެސް އޭނާއުޅުނީ ދެކަންފަތުގައި ދެއަތް އަޅައިގެންނެވެ. މީހަކު ނައްޓުވަން އުޅުނަސް ނެއްޓިއަކައެއް ނުދެއެވެ. އޭނާ ނިޔާވީ ވަރަށް ނިކަމެތި ޙާލުގައި މަގުމަތީގައި އުޅެމުންނެވެ.
މިއީ އަޅުގަނޑު ކިޔާފައިވާ ވާހަކައެއްގެ ވަރަށް ކުރުކުރު ޚުލާޞާއެކެވެ. މިއަދުނޫހުގެ ކިޔުންތެރިންނަށް ބުނެލަން ބޭނުންވަނީ ބައިވެރިޔާގެ ތަނަވަސްކަމަށް ދަހިވެތިވެ އަވަހަށް ދުނިޔެއިން ބޭރުކޮށްލަން މަސައްކަތްކުރާ މީހުން ބިރުވެތިވާށެވެ. ކޮންމެ މީހަކަށް އެފަދަ އަޑެއް ނުއިވިދާނެއެވެ. ނަމަވެސް މީހަކާއިމެދު ނުބައިކޮށް ކަންކަން ކޮށްފިނަމަ އަޑުގައި އެއިވުނު ފަދައިން ﷲ ތަޢާލާގެ ޢަޛާބާއި ކުރިމަތިލާން ނުޖެހިއެއް ނުދާނެއެވެ. އެއީ ހަމަ ޔަޤީނަށް އެނގެން އޮތް ކަމެކެވެ.
މަރުވެ ވަޅުލެވުނު މީހަކަށް ކައްވަޅުން ތެދުވެގެން އެހެން ބުނަން ނައުދެވިދާނެއެވެ. ނަމަވެސް އެފަދަ އަޑެއް އަނބިމީހާއަށް އިއްވެވުމަށް ﷲ ތަޢާލާ ކުޅަދުންވަންތައެވެ. ވިސްނައި ބިރުވެތިވާށެވެ. އެއަޑު އެދިން މެސެޖަކީ ހަމަ އެންމެންނަށްވެސް ދިން ވަރަށް ބިރުވެތި މެސެޖެކެވެ.
- ފަރުޒާނާ / މިއަދުނޫހުގެ ކިޔުންތެރިއެއް