ވަރަށް އަވަހަށް ޖުމްހޫރީ ޕާޓީއާ ރައްޔިތުންގެ މަޖިލީހުގެ މެމްބަރުންތަކެއް ގުޅިވަޑައިގަންނަވާނެ ކަމަށް އެ ޕާޓީގެ ލީޑަރު އަދި މާމިިގިލީ ދާއިރާގެ މެމްބަރު ގާސިމް އިބްރާހިމް ވިދާޅުވެއްޖެއެވެ.
ޖޭޕީއަށް ބައެއް މީހުން މިއަދު ސޮއިކުރުމަށް އެ ޕާޓީގެ އޮފީހުގައި ބޭއްވި ބައްދަލުވުމުގައި ވާހަކަދައްކަވަމުން ގާސިމް ވިދާޅުވީ އެ ޕާޓީއާ ގުޅުމަށް ގިނަ އަދަދެއްގެ ބަޔަކު ޝައުގުވެރިކަން ފާޅުކުރަމުންދާ ކަމަށާއި އޭގެ ތެރޭގައި ބައެއް މަޖިލިސް މެމްބަރުން ވެސް ހިމެނޭ ކަމަށެވެ. މީގެއިތުރުން ވެސް ތަފާތު އެކި ފަންތީގޭ ބޭފުޅުން އެ ޕާޓީއަށް ވަރަށް އަވަހަށް ސޮއިކުރައްވާނެ ކަމަށްވެސް ގާސިމް ވިދާޅުވި އެވެ.
މިރޭ ޕީޕީއެމް އިން ބާއްވާ ބޮޑު ޖަލްސާގައި ޖުމްހޫރީ ޕާޓީގެ ރައްޔިތުންގެ މަޖިލީހުގެ ދެ މެމްބަރަކު ގުޅިވަޑައިގަންނަވަން އުޅުއްވާ ކަމަށް ދެކެވޭ ވާހަކަތަކާ ގުޅޭގޮތުން ގާސިމް ވިދާޅުވީ އެއީ މިރޭގެ ޖަލްސާއަށް މީހުން "އެއްކުރަން" ކުރާ ކަމެއް ކަމަށެވެ.
"އަޅުގަނޑުމެން ޖުމްހޫރީ ޕާޓީއަކުން އަޅުގަނޑަށް ކަށަވަރުކުރެވޭ ގޮތުގައި މަޖިލިސް އެއްވެސް މެމްބަރަކު ހަމަ ގައިމު ވެސް ޕީޕީއެމަށް ސޮއިކުރާކަށް ނެތް" ގާސިމް ވިދާޅުވި އެވެ.
ސަރުކާރު ކޯލިޝަނުން ޖުމްހޫރީ ޕާޓީއިން ރަސްމީކޮށް ދާދިފަހުން ވަކިވެފައިވާއިރު، އެކަމަށް އިޝާރާތްކުރައްވާ ގާސިމް ވިދާޅުވީ ސަރުކާރު ކޯލިޝަނުން ވަކިވާން ޖެހުނީ ރައްޔިތުންގެ އަސާސީ ހައްގުތައް ހަނިވަމުން ދާތީ ކަމަށެވެ. ސަރުކާރުގައި ތިބިއިރު ވެސް އެ ޕާޓީއިން ދިޔައީ ސަރުކާރު ޒިންމާދާރުކުރުމުގެ މަސައްކަތް ކުރަމުން ކަމަށާއި ނަމަވެސް "މިންގަނޑުން ބޭރުވުމުން" އެންމެފަހުން ސަރުކާރުން ނިކުތީ ކަމަށްވެސް ގާސިމް ވިދާޅުވިއެވެ.
ގާނޫނު އަސާސީ ހިމާޔަތް ކުރުމަށް އެމްޑީޕީއާ އެކު ޖޭޕީ އިން މަޝްވަރާ ކުރަނީ މަގުމަތި ހަލަބޮލިކުރުވަން ކަމަށް ޕީޕީއެމްގެ ނައިބް ލީޑަރު އަބްދުއްރަހީމް އަބްދުﷲ ވިދާޅުވި ވާހަކަތަށް ރައްދުދެއްވަމުން ގާސިމް ވިދާޅުވީ "އެބޭފުޅާ ކަންތައް ކުރައްވަން ވިސްނަވާފައި އޮތް ގޮތް ކަންނޭނގެ" ކަމަށެވެ.
ގާނޫނު އަސާސީ ހިމާޔަތްކުރުމަށް ކުރާ މަސައްކަތުގައި ކޮންމެ ބަޔަކާ އެކީ ވެސް މަސައްކަތްކުރައްވަން ތައްޔާރަށް ހުންނެވި ކަމަށާއި ގާނޫނުއަސާސީ ހިމާޔަތްކުރަން  ކުރާ މަސައްކަތުގައި، އޭނާ އަށް ދަތިކުރުމަށް ސަރުކާރުން އަޅާފާނެ އެއްވެސް ފިޔަވަޅަކަށް ފަރުވާލެއް ނެތް ކަމަށެވެ.
ޖުމްހޫރީ ޕާޓީއާ އެމްޑީޕީއާ ދެމެދު ގާނޫނު އަސާސީ ހިމާޔަތްކުރުމާ ގުޅޭ މަޝްވަރާތަށް ފެށިފައިވާއިރު ދެ ޕާޓީއިން ވެސް ވަނީ ގުޅިގެން މި މަސައްކަތްކުރުމަށް ނިންމާފަ އެވެ.