އަހުމަދު އިބްރާހިމް
ރާއްޖޭގެ ސިޔާސީ މަޝްރަހާއި ގުޅޭގޮތުން ބޭރު ދުނިޔޭގައި މިހާރު އެންމެ ނުބައި ތަސައްވުރެއް ފަތުރަނީ ރައްޔިތުންގެ މަޖިލީހުގެ ރައީސް އަބްދުﷲ ޝާހިދުކަމަށް ވިލުފުށީ ދާއިރާގެ މެމްބަރު ރިޔާޒް ރަޝީދު ވިދާޅުވެއްޖެއެވެ.
ދިޓީވީގެ ހަބަރު ތެރެއިން ޕްރޮގްރާމްގައި ރޭ ވާހަކަފުޅު ދައްކަވަމުން ރިޔާޒް ވިދާޅުވީ ރައްޔިތުންގެ މަޖިލިސް ނުހުޅުވިދަނީވެސް ޝާހިދުގެ ސަބަބުންކަމަށެވެ. އަދި އެކަމުގެ ސަބަމުން އައިޕީޔޫއާއި ކޮމަންވެލްތުގެ އިތުރުން ބޭރު ދުނިޔޭގައި ރާއްޖެއާއި ބެހޭގޮތުން ފެތުރެމުންދާ ނުބައި ތަސައްވުރަކީ މަޖިލީހުގެ ރައީސް އަބްދުﷲ ޝާހިދުގެ ސަބަބުން ފެތުރެމުންދާ ތަސައްވުރެއްކަމަށްވެސް ރިޔާޒް ވިދާޅުވިއެވެ. އަދި އަބްދުﷲ ޝާހިދު ބޭނުންފުޅުވެލައްވާނަމަ މާދަމާވެސް މަޖިލީހުގެ ޖަލްސާތައް ފެށޭނެކަމަށާއި ނަމަވެސް މަޖިލީހުގެ ޖަލްސާތައް ފަށާއިގެން ކުރިއަށް ގެންދިއުމަށް އަބްދުﷲ ޝާހިދު ބޭނުންފުޅުވެ ނުލައްވާކަމަށްވެސް ރިޔާޒް ވިދާޅުވިއެވެ.