ސްޓެލްކޯއިން އަލަށް ބަހައްޓާފައިވާ ދެ ޖެނަރޭޓަރުގެ ޕާފޯމަންސް ޓެސްޓެއް ހެދުމަށް މަސައްކަތް ކުރަމުންދާތީ މިރޭ ފަތިހު 4 ޖަހާއިރުން ފެށިގެން 5 ޖަހަންދެން މާލޭގެ ބައެއް ސަރަހައްދުތަކުން ކަރަންޓު ކަނޑައިގެން ހިންގައިދާނެ ކަމަށް ސްޓެލްކޯއިން ބުނެފިއެވެ.
ސީއެންއެމަށް މައުލޫމާތު ދެއްވަމުން ސްޓެލްކޯގެ އޮފިޝަލަކު މިއަދު ވިދާޅުވީ މިހާރު ވެސް އޮޕަރޭޓް ކުރަމުން ގެންދާ ދެ ޖެނަރޭޓަރު ގެ ޕާފޯމަންސް ޓެސްޓެއް ހެދުމުގެ ގޮތުން ސްޓެލްކޯގައި މިހާރު ބޭނުން ކުރަމުންދާ ހުރިހާ ވަސީލަތްތަކެއް މިރޭ ފަތިހު 4 ކުން 5 ނިއްވާލުމަށް ހަމަޖެހިފައިވާ ކަމަށެވެ.
"މިއީ ދެޖެނަރޭޓަރު ބޭނުން ކުރަމުންދާ އިރު އެންމެ ފަހުން ހަދަން ޖެހޭ ޕާފޯމަންސް ޓެސްޓުތަކެއް. އަޅުގަނޑުމެން މިރޭ ބަލާނީ ޖެނަރޭޓަރުގެ ސައުންޑް ހުންނަ ގޮތް. އެހެންވެ އެހެން އެއްޗެހި ނިއްވާލަން މިޖެހެނީ. ނިއްވާލިޔަސް ކަރަންޓު ނުދިއުން ވެސް އެކަށިގެންވޭ. ޑިމާންޑް އޮންނަ ގޮތަކަށް ބަލާފައި ކަރަންޓު ކަނޑާލަން ޖެހޭނީ. އެއީ ވެސް ވަރަށް މަދު ސަރަހައްދުތަކަކުން ހެން ހީވަނީ" ސްޓެލްކޯގެ އޮފިޝަލު ވިދާޅުވިއެވެ.
ސްޓެލްކޯއިން އަލަށް ބަހައްޓާފައިވަނީ 8700 ކިލޯވަޓުގެ ދެ ޖެނަރޭޓަރެވެ.
ސްޓެލްކޯއިން މާލެއަށް ކަރަންޓު ދިނުމަށް ބޭނުން ކުރަމުން އައި ޖެނަރޭޓަރުތަކަށް ދިމާވި ބައެއް މައްސަލަތަކާއި ބޭނުންވާ ވަރަށް ކަރަންޓު ނުއުފެއްދުމުގެ ސަބަބުން މީގެ ކުޑަ ދުވަސްކޮޅެއް ކުރިން މާލޭގެ އެކި ސަރަހައްދުތަކުން ކަރަންޓު ކަނޑައިގެން ދިޔަ ދިއުން ހައްލު ކުރެވިފައިވަނީ އާ ޖެނަރޭޓަރުތަކުން ކަރަންޓު އުފައްދަން ފެށުމުންނެވެ.