ރައީސް މުއިއްޒުގެ ކެބިނެޓުގެ ނާގާބިލުކަމުން، ފިނޭންސް މިނިސްޓްރީ ނުހިންގިގެން، ފިނޭންސް މިނިސްޓްރީ އިން ބަލަހައްޓާ މާލީ ހިސާބު ބެލެހެއްޓުން އެމެރިކާގެ ސެންޓަވިއު ކިޔާ ކުންފުންޏަކާއި ހަވާލުކޮށްފިއެވެ. މާލީ ކަންކަމުގައި ލަފާ ހޯދުމުގެ ނަމުގައި، ފިނޭންސް މިނިސްޓްރީ ހިންގުމަށް އެމެރިކާގެ އިންވެސްޓްމަންޓް ބޭންކިން ފާމެއް ކަމަށްވާ ސެންޓަވިއު ދިވެހި ސަރުކާރުން އައްޔަންކޮށްފައި ވާކަން ރޮއިޓަރސް އިން ވަނީ ކަށަވަރުކޮށް ދީފައެވެ.
ސެންޓާވިއުއަކީ 2006 ވަނަ އުފެއްދި ކުންފުންޏެކެވެ. ރޮައިޓާސް އިން ބުނެފައި ވަނީ އެ ފާމުގެ މަސައްކަތް މުޅި ދުނިޔެއަށް ފުޅާ ކުރުމުގެ ގޮތުން މިވަގުތު މުވައްޒަފުން ނެގުމުގެ މަސައްކަތް ވަރަށް ބާރަށް ކުރިއަށްގެންދާ ކަމަށެވެ. ބެލެވޭ ގޮތުގައި މިހާރު ސެންޓަވިއު އިން މުއައްޒަފުން ނަގަމުން ދަނީ ރާއްޖޭގެ ފޮރިން މިނިސްޓްރީ ހިނގުމަށް ދޭންވާ މާލީ ލަފާ އެރުވުމަށް ބޭނުންވާ މުއައްޒަފުންނެވެ.
އެމެރިކާގެ ނިއު ޔޯކާއި ކެލިފޯނިއާގެ އިތުރުން، އިނގިރޭސިވިލާތުގެ ލަންޑަން އަދި ފްރާންސްގެ ޕެރިހުގައި ސެންޓަވިއުގެ އޮފީސްތައް ހިންގަ އެވެ. އެ ފާމުގެ ކްލަޔަންޓުންގެ ތެރޭގައި ޑިސްނީ، އީބޭ، ޕެރަމައުންޓާއި ޑޫޕޯންޓް އަދި ޓްރިމްބްލް ހިމެނެ އެވެ.
ރާއްޖޭގެ ޕަބްލިކް އަދި ޕަބްލިކްލީ ގެރެންޓީޑް ދަރަނި އަހަރުގެ ފުރަތަމަ ކުއާޓަރުގައި ހުރީ 8.2 ބިލިއަން ޑޮލަރުގަ އެވެ. އެއީ ރާއްޖޭގެ ޖީޑީޕީގެ 118 ޕަސެންޓެވެ. ދަރަނީގެ ބޮޑު ބަޔަކީ އިންޑިއާ އާއި ޗައިނާއަށް ދައްކަންޖެހޭ ލޯނެވެ.
ރާއްޖޭގެ މާލީ ހާލަތު ދަށްވެ، ހަރަދުތައް ކުޑަ ކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ޖޫން މަހުގެ ތެރޭގަ އެވެ.
“ދައުލަތުގެ ހަރަދުތައް ކުޑަކުރުމަށްޓަކައި ގިނަ ފިޔަވަޅުތަކެއް އެޅުމަށްވަނީ ނިންމާފައި. އެގޮތުން، ސަރުކާރުގެ ރިކަރަންޓް ހަރަދު ކުޑަކުރުމަށް އެކި ފިޔަވަޅުތައް އެޅުން ހިމެނޭ. މީގެ ތެރޭގައި، ސިޔާސީ މަގާމުތަކުގެ އަދަދު މަދުކުރުމާއި އެކި މުނާސަބަތުތަކުގައި ބާއްވާ ހަފުލާތަކަށް ކުރާ ހަރަދުތައް ކުޑަކުރުން ނުވަތަ ނުބޭއްވުން ހިމެނޭ،” ޖޫން 27، ގައި ރައީސް ވިދާޅުވެފައިވެ އެވެ.
ނަމަވެސް އޭގެ ފަހުން ވެސް، މާލީ ރިފޯމްތައް ތަންފީޒު ނުކުރެވި ހާލަތު ދިޔައީ އިތުރަށް ގޯސްވަމުންނެވެ. އޭގެ ފަހުން އޯގަސްޓު މަހުގެ ތެރޭގައި ރާއްޖޭގެ ބޭނުން ކުރެވޭ ބޭރު ފައިސާގެ ރިޒާވް އެއްކޮށް ހުސްވި އެވެ. އަދި އޭގެ ފަހުން ކްރެޑިޓް ރޭޓިން ދެ އެޖެންސީ ކަމަށްވާ ފިޗް އާއި މޫޑީސް އިން ރާއްޖޭގެ ކްރެޑިޓް ރޭޓިން ދަށް ކުރި އެވެ.
ސަރުކާރަށް ކިރިޔާ ވެސް ހިންދެމިލެވުނީ އިންޑިއާއަށް ސެޕްޓެމްބަރު މަހު ދައްކަން ޑިއުވި 50 މިލިއަން ޑޮލަރުގެ ލޯނެއް އެ ގައުމުގެ ސަރުކާރުން ރޯލްއޯވާ ކުރުމުންނެވެ. އޭގެ ފަހުން ރައީސް މުއިއްޒު މިދިޔަ ހަފުތާގައި އިންޑިއާއަށް ކުރެއްވި ދަތުރުގެ ތެރެއިން، 400 މިލިއަން ޑޮލަރު އަދި ތިން ބިލިއަން ރުޕީސްގެ ކަރަންސީ ސްވޮޕް އެގްރިމެންޓެއްގައި ވަނީ ސޮއިކޮށްފަ އެވެ.
ނަމަވެސް މިއިން ފުރިހަމަ މާލީ ހައްލެއް ނުލިބޭނެ ކަމަށް ތަޖުރިބާކާރުން ބުނެއެވެ.