ކޮންމެ އަހަރަކުވެސް އުރީދޫ މޯލްޑިވްސް އިން އިންތިޒާމް ކޮށްގެން ބާއްވާ އުރީދޫ ފަން ރަން އިއްޔެ ކާމިޔާބު ކަމާއެކު ހުޅުމާލޭގައި ނިންމާލައިފިއެވެ.
އުރީދޫ އިން ބުނީ މި ރަންގައި 6500 މީހުން ބައިވެރިވެފައިވާކަމަށާއި މި ރަން ޝަރަފުވެރިކޮށްދެއްވާފައިވަނީ ނައިބު ރައީސް ހުސައިން މުހައްމަދު ލަތީފް ކަމަށެވެ.
ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މި ކުރު ދުވުމުގައި ކޮންމެ ކިލޯމީޓަރެއް ނިމޭ ހިސާބުގައި މަޖާ ހަރަކާތްތަކާއި ފޯމް ސްޓޭޝަންތަކެއް ވަނީ ބަހައްޓާފައެވެ. މީގެއިތުރުން ކުލައާއި އޮބްސްޓަކްލް ޗެލެންޖުތައް ކުރިއަށް ގެންގޮސްފައިވާއިރު މި ހަރަކާތްތަކުގައި ހުރިހާ އުމުރު ފުރާއެއްގެ މީހުން ވަނީ ބައިވެރިވެފައެވެ.
އުރީދޫ އިން ބުނީ މި ހަރަކާތަކީ ދުޅަހެޔޮ ދިރިއުޅުމެއް އަށަގެންނެވުމަށާއި ރާއްޖޭގެ އެކި ކަންކޮޅުތަކުގައި ދިރިއުޅޭ އާއިލާތަކަށާއި ފަރުދުންނަށް ހަނދާން ނައްތާނުލެވޭ ފަދަ ވަގުތުތަކެއް އުފެއްދުމަށް އުރީދޫއިން ކުރަމުން އަންނަ މަސައްކަތުގެ ދަށުން އިންތިޒާމް ކޮށްގެން ކުރިއަށް ގެންދިޔަ ހަރަކާތެއް ކަމަށެވެ.
މި ރަންއާއި ގުޅޭ ގޮތުން އުރީދޫގެ ޗީފް އެގްޒެކެޓިވް އޮފިސާ ހާލިދު އަލް ހަމާދީ ވިދާޅުވީ މުޖުތަމައުގެ ފަރާތުން މިހާ ބޮޑު ބައިވެރިވުމަކާއި ހިތްވަރެއް ފެނުމުން ވަރަށް އުފާވި ކަމަށާއި، ފަން ރަން އަކީ ހަމައެކަނި ދުވުމަކަށް ވުރެ މާ ބޮޑު ދުވުމެއް ކަމަށެވެ.
އުރީދޫ އިން ބުނީ އުރީދޫ ފަން ރަން 2025 އޮންނާނީ ޏ. ފުވައްމުލަކުގެ ރީތި ހިތްގައިމު މާހައުލުގައި ކަމަށެވެ. އުރީދޫ އިން ވަނީ މި ރަންގެ ރަޖިސްޓްރީގެ ތަފްސީލާއި އަޕްޑޭޓް ހޯދުމަށް އުރީދޫގެ ސޯޝަލް މީޑިއާ ޗެނަލްތަކަށް ސަމާލުކަން ދިނުމަށް އިލްތިމާސްކޮށްފައެވެ.
މީގެއިތުރުން އުރީދޫ އިން ވަނީ ހުޅުމާލޭގައި ކުރިއަށް ގެންދިޔަ ފަން ރަން އަކީ ހަނދާން ނައްތާނުލެވޭ ފަދަ ތަޖުރިބާއަކަށް ހަދައިދިން ވޮލަންޓިއަރުންނާއި ޕާޓްނަރުންނާއި ބައިވެރިންނަށް ޝުކުރު އަދާކޮށްފައެވެ.