ބޯޓު ބިލްޑިންގް ދާއިރާގެ ދިވެހިންނަށް ރަހުނަކާ ނުލައި ލޯނު ދެނީ

ބޯޓު ބިލްޑިންގް ދާއިރާއިން ކުރިއަށްދާން ބޭނުންވާ ދިވެހިންނަށް ރަހުނަކާ ނުލައި ބޭންކިންގް ނިޒާމުގެ ތެރެއިން ލޯނު ނެގޭނެ އިންތިޒާމު ހަމަޖައްސަވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު ރ. އަތޮޅުގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި ރޭ އިންނަމާދޫގެ ރައްޔިތުންނާ ބައްދަލުކުރައްވާ ވަނީ ބޯޓު ބިލްޑިންގް ދާއިރާއިން ކުރިއަށް ދިއުމަށް ބޭނުންވެފައި ތިބި ދިވެހިންނަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ މާލީ ދަތިކަން ކަމުގައި ފާހަގަކުރައްވާފަ އެވެ.
އެ ގޮތުން ބޯޓު ބިލްޑިންގްގެ ދާއިރާއިން ކުރިއަށް ދިއުމަށް ބޭނުންވާ ދިވެހިންނަށް ރަހުނަކާ ނުލައި ބޭންކިންގެ ނިޒާމުގެ ތެރެއިން ލޯނު ނެގޭނެ އިންތިޒާމު ހަމަޖެހިގެން ދިއުމާއެކު ދާއިރާ ފުޅާ ކުރުމަށް ފުރުސަތު ލިބިގެންދާނެ ކަމުގައި ވިދާޅުވި އެވެ.
ރައީސް މުއިއްޒު ވިދާޅުވީ ބޯޓު ބިލްޑިންގެ ދާއިރާގައި ބިދޭސީ ޝާމިލުވުން އޮތުމަށް އެދިވަޑައިނުގަންނަވާ ކަމަށާއި މި ދާއިރާއިން ދިވެހި މަސައްކަތްތެރިން ބިނާކުރުމަށްޓަކައި އިންނަމާދޫގައި ތަމްރީނުދޭ ހާއްސަ މަރުކަޒެއް ތަރައްގީ ކުރުމަށް ގަސްތުކުރައްވާ ކަމަށެވެ.
މި ފުރުސަތު ފަހިކޮށްދެވިގެން ދިއުމާއެކު ބޯޓު ބިލްޑިންގް ސިނާއަތަކީ ދިވެހީންނަށް ހާއްސަ އަދި ހަމަ އެކަނި ދިވެހި މަސައްކަތްތެރިން ހަރަކާތްތެރިވާ ދާއިރާއަކަށްވެ ތަމްރީނު ވެފައިވާ ދިވެހިން އިތުރުވެގެންދާނެ ކަމުގައި ރައީސް ވިދާޅުވި އެވެ.
މީގެ އިތުރުން ބޯޓު ބިލްޑިންގް ސިނާއަތަށް ދިމާވެފައިވާ ބިމުގެ ދަތިކަމުގެ ގޮންޖެހުން އޮތްކަން ރައީސް ފާހަގަކުރެއްވި އެވެ. އަދި ކައުންސިލްތަކުން ކުއްޔަށް ބިން ދޫކުރަމުން އައިސްފައި ވަނީ ކުރު މުއްދަތަކަށް ކަމަށްވާތީ އެފަދަ ބިންތަކުގައި އިންވެސްޓުކޮށް، ބޮޑެތި މަޝްރޫއުތައް ހިންގުމުގައި ދަތިތަކެއް ހުރުމުން ބިމާ ބެހޭ ސިޔާސަތުގެ ތެރެއިން، ދިގު މުއްދަތަކަށް ބިންތައް ކުއްޔަށް ދޫކުރެވޭނެ މަގުތައް ކައުންސިލްތަކަށް ފަހިކޮށްދެއްވާނެ ކަމުގައި ވިދާޅުވެފަ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ