ތިލަދުންމަތީ އުތުރުބުރީ މޮޅަދޫގެ ތަރައްގީއަށް ބޭނުންވާ ކަންކަމާގުޅޭގޮތުން އެ ރަށު ކައުންސިލާއި ރައީސުލްޖުމްޙުރިއްޔާއާ މަޝްވަރާކުރައްވައިފިއެވެ.
މި މަޝްވަރާ ކުރައްވާފައިވަނީ ރައީސުލްޖުމްހޫރިއްޔާ ހއ. އަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން މޮޅަދުއަށް ވަޑައިގެންނެވެ. އެގޮތުން، މޮޅަދޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މުއައްސަސާތަކުގެ އިސްވެރިންނާ އެމަނިކުފާނު ވަނީ ބައްދަލުކުރައްވައި މޮޅަދޫގެ ތަރައްޤީއަށް އެންމެ ބޭނުންވާ ކަންކަމާ ގުޅޭގޮތުން މަޝްވަރާކުރައްވާފައެވެ.
‎މި ބައްދަލުކުރެއްވުމުގައި، މޮޅަދޫ ކައުންސިލުން ވަނީ ރަށުގެ ފެނާއި ނަރުދަމާގެ މަސައްކަތް މެދުކެނޑިފައިވުމާއި، ސްކޫލާއި ކައުންސިލް ޢިމާރާތުގެ ޖާގައިގެ ދަތިކަމުގެ އިތުރުން، ރަށުގެ ގިރާ ސަރަޙައްދުގެ މައްސަލައިގެ ކަންބޮޑުވުން ރައީސުލްޖުމްހޫރިއްޔާއާއި ހިއްސާ ކުރައްވާފައެވެ. އަދި ޞިއްޙީ މަރުކަޒު މަރާމާތު ނުކުރެވި ގިނަ އަހަރުތަކެއް ފާއިތުވެ ގޮސްފައިވުމާއެކު، ރަށަށް އައު ޞިއްޙީ މަރުކަޒެއްގެ ބޭނުންޖެހިފައިވާކަން މުއައްސަސާތަކުން ވަނީ އެމަނިކުފާނާ ހިއްސާކުރައްވާފައެވެ.
މީގެ އިތުރުން މި ބައްދަލުކުރެއްވުމުގައި ކައުންސިލުން ވަނީ، އައު ފުޓްސަލް ދަނޑަކާއި ވޮލީ ކޯޓަކާއި ކުޑަކުދިންގެ ޕާކެއްގެ އިތުރުން، ޔޫތު އެންޑް ކޮމިއުނިޓީ ސެންޓަރެއް ރަށުގައި ޤާއިމުކުރަން ބޭނުންވާކަމަށްވެސް ވިދާޅުވެފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކައުންސިލް މެންބަރުން ފާހަގަކުރެއްވި ކަންކަމަށް ހައްލު ހޯއްދަވައިދެއްވުމަށް މަސައްކަތްކޮށްދެއްވާނެ ކަމުގައި ވިދާޅުވިއެވެ.
އެ މަނިކުފާނުގެ އަރިހުގައި މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން ވަނީ މި ބައްދަލުވުމުގައި ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާއި މުއައްސަސާތަކުގެ އިސްވެރިން ފާޅުކުރެއްވި ކަންބޮޑުވުންތަކާގުޅޭ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.