ބޭންކުތައް ފިޔަވައި ސަރުކާރު ހިއްސާވާ ކުންފުނިތަކުގެ އެންމެ އިސް ވެރިންގެ މުސާރަ މި މަހުން ފެށިގެން 90،000ރ.އަށް ކުޑަކޮށްފި އެވެ.
ވީ ކިހިނެއް؟ - ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން މިގޮތަށް އަމަލުކުރަން ސަރުކާރު ކުންފުނިތަކަށް ކުންފުނިތަކަށް އަންގައި މިއަދު ސާކިއުލާއެއް ވަނީ ނެރެފަ އެވެ.
ޕީސީބީން އެގޮތަށް އެންގީ ސަރުކާރު ހިއްސާވާ ކުންފުނިތަކުގެ މުވައްޒަފުންގެ ތެރެއިން ޓެކްނިކަލް ދާއިރާތަކުގައި މަސައްކަތްކުރާ މުވައްޒަފުން ނުހިމެނޭ ގޮތަށް ކުންފުނިތަކުގެ އެންމެ އިސްވެރިންނަށް އެންމެ ބޮޑުކޮށް ދެވޭނީ 90،000ރ. ކަމަށް ރައީސް ކަނޑައެޅުއްވުމުންނެވެ.
އެއީ އިގްތިސާދީ އިސްލާހީ އެޖެންޑާގެ ދަށުން ދައުލަތުގެ ހަރަދުތައް ކުޑަކުރުމުގެ މަގުސަދުގަ އެވެ. ވެރިންގެ މުސާރަ އާއި ބައެއް އިތުރު ފިޔަވަޅުތައް އަޅަން ނިންމާފައިވަނީ ނިންމާފައިވަނީ ކުރިއަށް އޮތް ދެ އަހަރުގެ މުއްދަތަށެވެ.
ތަފްސީލު - ރައީސްގެ ނިންމުން ތަންފީޒުކުރަން އަންގައި، ޕީސީބީއިން މިއަދު ނެރުނު ސާކިއުލާގައި ބުނީ މި މަހުން ފެށިގެން ކުރިއަށް އޮތް ދެ އަހަރުގެ މުއްދަތަށް:
ބޭންކުތައް ފިޔަވައި ސަރުކާރު ހިއްސާވާ ކުންފުނިތަކުގެ ބޯޑު ޑިރެކްޓަރުންގެ ތެރެއިން (ރާއްޖެއިން ބޭރުގެ ޑިރެކްޓަރުން ފިޔަވައި) ޗެއާމަނުން، މެނޭޖިން ޑިރެކްޓަރުން އަދި ޑެޕިއުޓީ މެނޭޖިން ޑިރެކްޓަރުން ހިމެނޭހެން މަހު މުސާރަ އާއި އިނާޔަތުގެ ގޮތުގައި 90،000ރ.އަށް ވުރެ އިތުރަށް ލިބޭ ޑިރެކްޓަރުންގެ މުސާރައިން އެއަށް ވުރެ އިތުރުވާ ބައި ޑިޑަކްޝަންގެ ގޮތުގައި އުނިކޮށް، 90،000ރ.އަށް ވުރެ ބޮޑުނުވާނެ ގޮތަށް މުސާރަ އާއި އިނާޔަތް ދިނުމަށް
ސަރުކާރު ހިއްސާވާ ކުންފުނިތަކުގެ ޓެކްނިކަލް މަސައްކަތްކުރާ މުވައްޒަފުން ފިޔަވައި އެހެނިހެން މުވައްޒަފުންގެ ތެރެއިން މުސާރަ އާއި އިނާޔަތްތައް 90،000ރ.އަށް ވުރެ އިތުރުވާ ނަމަ ހަމަ އެ ގޮތަށް ބަދަލުކުރަން
މިކަމާ ގުޅިގެން ގާނޫނީ ގޮތުން މުވައްޒަފުންނާ އެކު ހެދިފައިވާ އެއްބަސްވުންތަކަށް ގެންނަން ޖެހޭ ބަދަލުތައް ގެނައުމަށް
އެނގުން މުހިންމު - ދައުލަތުގެ ދަރަނީގެ ހާލަތު މެނޭޖުކުރަން އަޅަން ޖެހޭ ފިޔަވަޅުތައް އެޅުމަށްޓަކައި މި ސަރުކާރުން އެންމެ ފުރަތަމަ އަޅަން ރޭވި ފިޔަވަޅުތަކުގެ ތެރޭގައި ސަރުކާރު ހިއްސާވާ ކުންފުނިތައް އިސްލާހު ކުރުން ހިމެނެ އެވެ.
ވޯލްޑް ބޭންކުން ރާއްޖެއާ ގުޅޭ ގޮތުން ތައްޔާރުކުރި ރިޕޯޓެއްގައި ވެސް އިސްލާހުކުރަން ލަފާދިން ކަންތައްތަކުގެ ތެރޭގައި އެކަން ހިމެނެ އެވެ.