އެޕަލްގެ ކުރިއަށް އޮތް އައިފޯން 17 ޕްރޯ ސީރީޒްގައި ޓެލެފޮޓޯ ކެމެރާއަށް ބޮޑު ބަދަލެއް ގެންނާނެކަމަށް ރިޕޯޓުތައް ބުނެ އެވެ. އައިފޯނާބެހޭ މައުލޫމާތު ލީކްކުރާ ބްލޮގައެއްކަމުގައިވާ މާޖިން ބު ނަމަކަށް ކިޔާ ޚަބަރު ހާމަކުރާ ފަރާތަކުން ބުނާގޮތުގައި، އައިފޯން 17 ޕްރޯގައި ހުންނާނީ 48 މެގަޕިކްސެލްގެ ޓެލެފޮޓޯ ލެންސްއެކެވެ. މިއީ މިހާރުގެ އައިފޯން 16 ޕްރޯ އަދި ޕްރޯ މެކްސްގައި ހުންނަ 12 މެގަޕިކްސެލްއާ އަޅާބަލާއިރު ބޮޑު ކުރިއެރުމެކެވެ.
އާ ލެންސްގައި ހުންނާނީ 3.5x އޮޕްޓިކަލް ޒޫމް (85 މިލިމީޓަރާ އެއްވަރު) ކަމަށްވާއިރު، މިއީ މިހާރު ލިބެންހުރި 5x ޒޫމް (120 މިލިމީޓަރާ އެއްވަރު) އަށްވުރެ ކުޑަ ޒޫމެކެވެ. ނަމަވެސް 85 މިލިމީޓަރުގެ ފޯކަލް ލެންތް ޕޯޓްރެއިޓް އަދި ދުވަހުން ދުވަހަށް ނަގާ ފޮޓޯތަކަށް ބޮޑަށް މާ ބޭނުންތެރި އެވެ. ސަބަބަކީ ބޭނުންވާ ފްރޭމް ހޯދުމަށް މަންޒަރާ މާ ދުރަށް ދާން ނުޖެހުމެވެ.
ސާޅީސް އަށް މެގަޕިކްސެލްގެ ސެންސަރުން ލިބޭ އިތުރު ރެޒޮލިއުޝަން ބޭނުންކޮށްގެން ޑިޖިޓަލް ކްރޮޕިން މެދުވެރިކޮށް ދިގު ފޯކަލް ލެންތެއްގެ ގޮތުގައި ސިމިއުލޭޓްކުރުމަށް އިތުރު ފުރުސަތު ލިބޭނެ އެވެ. މިއީ އާދައިގެ ޑިޖިޓަލް ޒޫމަށްވުރެ ފެންވަރު ދަށްވުން ކުޑަވާނެ ކަމެކެވެ.
މިއީ އެޕަލްއިން މިހާރުވެސް އައިފޯން 16 ގެ މައި ފިއުޝަން ކެމެރާގައި ކުރާ ކަމެކެވެ. އެގޮތުން 48 މެގަޕިކްސެލްގެ ސެންސަރުން 2x ޑިޖިޓަލް ކްރޮޕް ހަދައިގެން "ޓެލެފޮޓޯ" ކަމަށް ބުނެ މާކެޓްކުރެއެވެ. މިކަމުގެ ސަބަބުން ފެންވަރު ގެއްލުމެއް ނެތި 12 މެގަޕިކްސެލްގެ އިމޭޖެއް އުފެއްދުމަށް ހުރަހެއް ނެތެވެ.
3.5x ޓެލެފޮޓޯ ލެންސްއެއްގެ އަމަލީ ފައިދާއަކީ ޚާއްސަކޮށް ޕޯޓްރެއިޓް ފޮޓޯގްރަފީއަށް އިތުރު ބޭނުންތެރިކަމެއް ލިބުމެވެ. މިފަދަ ލެންސްއަކުން އިމާރާތްތެރޭގައި ނުވަތަ ޖާގަ ކުޑަ ތަންތަނުގައި ފަސޭހައިން ޕޯޓްރެއިޓް ފްރޭމްކުރުމަށް އިތުރު ފަސޭހަތަކެއް ލިބިގެންދާނެ އެވެ.
މި ބަދަލާއެކު، އެޕަލްއިން ގިނަވަމުންދާނީ މަތީ ރެޒޮލިއުޝަންގެ ސެންސަރުތަކާއި ކޮމްޕިއުޓޭޝަނަލް ޕްރޮސެސިންއަށް ބަރޯސާވުމެވެ. މި ރިޕޯޓު ތެދުވެއްޖެނަމަ، އައިފޯން 17 ޕްރޯއިން ލިބޭނީ އިތުރަށް ބަދަލުކުރެވޭ ޒޫމް އޮޕްޝަންތަކެކެވެ. އަދި ފޮޓޯގެ ފެންވަރު ދަށްނުކޮށް ޕޯޓްރެއިޓް ފޮޓޯގްރަފީ އިތުރަށް ބޭނުންކުރަން ފަސޭހަވާނެ އެވެ.
އައިފޯން 16 ޕްރޯ މޮޑެލްތަކުގައި މިހާރުވެސް 48 މެގަޕިކްސެލްގެ ފިއުޝަން އަދި އަލްޓްރާ ވައިޑް ކެމެރާތައް ހުރުމާއެކު، އައިފޯން 17 ޕްރޯ އަދި އައިފޯން 17 ޕްރޯ މެކްސްއަކީ 48 މެގަޕިކްސެލްގެ ތިން ކެމެރާ އެކުލެވޭ ފުރަތަމަ އައިފޯންތައް ކަމުގައި ވެގެންދާނެ އެވެ. އެޕަލްއިން އައިފޯން 17 ސީރީޒް ތަޢާރަފްކުރާނެކަމަށް ބެލެވެނީ ސެޕްޓެމްބަރުގަ އެވެ.