އިނގިރޭސިވިލާތުގައި ދިވެހި ދަރިވަރުން ކުރިން ބޭނުންކުރި ރޯޒްމަންޓު އެވެނިއު އަލުން ހަވާލުކޮށްފި

ރައީސް ޑރ. މުޙައްމަދު މުޢިއްޒު އިނގިރޭސިވިލާތުގެ ލަންޑަންގައި ހުންނަ ނުވަ ނަންބަރު ރޯޒްމޮންޓް އެވެނިއު، މޯލްޑިވްސް ސްޓޫޑަންޓްސް އެސޯސިއޭޝަން ޔޫކޭ (އެމްއެސްއޭ ޔޫކޭ) އާ އަލުން މިއަދު ހަވާލުކުރައްވައިފިއެވެ. ރައީސް އޮފީހުން ބުނީ، އެ އިމާރާތަކީ ޒަމާނުއްސުރެ، އިނގިރޭސިވިލާތުގައި ކިޔަވާ ދިވެހި ދަރިވަރުން ދިރިއުޅުމަށާއި ނާދީއެއްގެ ގޮތުގައި ބޭނުންކުރަމުން އައި ތަނެއް ކަމަށެވެ. ނަމަވެސް މީގެ ވަރަށް ފަހުން އެ ތަން ދުވަސްކޮޅަކަށް، އިނގިރޭސިވިލާތުގައި ހުންނަ ރާއްޖޭގެ ހައި ކޮމިޝަނުގެ ބޭނުމަށް ނެގި ކަމަށް ވަނީ ބުނެފައެވެ. ނަމަވެސް މިހާރު، މިއަދުން ފެށިގެން، އެ ޢިމާރާތް އެމްއެސްއޭޔޫކޭ އާ ރަސްމީގޮތުން ހަވާލުކޮށްފައިވާ ކަމަށް އެ އޮފީހުން ބުންޏެވެ. ރައީސުލްޖުމްހޫރިއްޔާ އިނގިރޭސިވިލާތައް ކުރައްވަމުންގެންދަވާ ޒިޔާރަތުގައި މިއަދު ވަނީ، އިނގިރޭސިވިލާތުގައި ކިޔަވަމުންދާ ދިވެހި ދަރިވަރުންނާއެކު މެންދުރުގެ ފަރީއްކޮޅެއްގައި ބައިވެރިވެވަޑައިގެންފައެވެ. މި ފަރީއްކޮޅުގައި އެމަނިކުފާނު ވަނީ، ދަރިވަރުންގެ ކަންބޮޑުވުންތައް އަޑުއައްސަވައި، ދަރިވަރުންގެ ސިއްޙަތާއި ދިރާސީ މަސައްކަތްތަކާބެހޭ މަޢުލޫމާތު އޮޅުންފިލުއްވާފައެވެ. އަދި، މި ސަރުކާރުން، ދަރިވަރުންނަށް ހުރި ދަތިތައް ލުއިކޮށްދެއްވުމަށް މަސައްކަތްކޮށްދެއްވާނޭކަމުގެ ޔަޤީންކަން އެމަނިކުފާނު ވަނީ ދެއްވާފައެވެ. ރާއްޖެއިން ބޭރަށް ކުރައްވާ ދަތުރުފުޅުތަކުގައި، އެ ގައުމެއްގައި ދިރިއުޅޭ ދިވެހި ދަރިވަރުންނާ ބައްދަލުކުރެއްވުމަކީ ރައީސް މުއިއްޒު އިސްކަންދެއްވާ ކަމެކެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ