ހަނދުމަކޮށްދިނުމެއް!: މިސްކިތަށްދިޔައިރު ޖަމާޢަތް ފެށިފައިވާތީ ފަތިސް ނަމާދުގެ އިހުސުންނަތް ނުކޮށް ޖަމާޢާތުގައި ނަމާދު ކުރުމަށްފަހު ސުންނަތް ކުރަން އޮތް މަގު-

ފަތިސްނަމާދު ގެ ކުރިން  އޮންނަ (އިހުސުންނަތުގެ) ދެރަކްޢަތަކީ ވަރަށް މަތިވެރި، ދަރަޖަ ބޮޑު ދެރަކްޢަތެވެ. ކީރިތި ރަސޫލާ-ޞައްލަﷲ ޢަލައިހިވަސައްލަމަ- ދަތުރުމަތީގައިވެސް އަދި އެނޫން ދުވަސްތަކުގައިވެސް ދޫކޮށް ނުލައްވާ ދެރަކްޢަތެވެ. އަދި އެދެރަކްޢަތަކީ ދުނިޔެ އާއި ދުނިޔޭގައިވާހާ ތަކެއްޗަށްވުރެ މާތްކަން ބޮޑު ދެރަކްޢަތް ކަމުގައި ޙަދީޘް ގައި އައިސްފައިވެއެވެ. 
ފަތިސްނަމާދުގެ ކުރިން މި ދެރަކްޢަތް ނުކުރެވިއްޖެނަމަ ފަހުންވެސް ކުރެވިދާނެއެވެ. ގައިސް ބިން ޢަމްރު-ރަޟިޔަﷲ ޢަންހު- ގެ ކިބައިން ރިވާވެގެންވެއެވެ. ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ނިކުންނެވި ތަނުން ގަމަތްދީފިއެވެ. ތިމަންކަލޭގެ ފާނު ކީރިތި ރަސޫލާ-ޞައްލަﷲ ޢަލައިހިވަސައްލަމަ- ގެ އަރިހުގައި ނަމާދުކޮށްފީމެވެ. ރަސޫލާ-ޞައްލަﷲ ޢަލައހި ވަސައްލަމަ- މިސްކިތުން ނިކުމެވަޑައިގަންނަވަނިކޮށް ތިމަން ކަލޭގެފާނު ނަމާދު ކުރައްވަނިކޮށް ފެނިވަޑައިގެން ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ޙަދީޘް ކުރެއްވިއެވެ. "އޭ ގައިސެވެ. މަޑުކޮށްލާށެވެ. އެއްވަގުތެއްގައި ދެނަމާދުތޯއެވެ؟" ތިމަންކަލޭގެފާނު ދެންނެވީމެވެ. "ތިމަންކަލޭގެފާނު ފަތިސްނަމާދުގެ އިހު ސުންނަތުގެ ދެރަކްޢަތް ނުކޮށް ހުރީމާ ކޮށްލަނީއެވެ"، ދެން ކީރިތި ރަސޫލާ-ޞައްލަﷲ ޢަލައިހި ވަސައްލަމަ- ވަކި އެއްޗެއް ވިދާޅުނުވެ ވަޑައިގެންފިއެވެ.
އަލްއިމާމުލް ޚައްޠާބީ-ރަޙިމަހުﷲ- ވިދާޅުވިއެވެ: "މި ޙަދީޘް އިން ބަޔާންވާ ގޮތުގައި ފަތިސްނަމާދު ގެ އިހު ސުންނަތް ނުކުރެވިއްޖެމީހާ، ނަމާދުފަހުން، އިރުއެރުމުގެ ކުރިންވެސް ކުރިވިދާނެއެވެ". والله أعلم.
 
- ޑރ. މުޙައްމަދު އިޔާޟް ޢަބްދުއްލަޠީފް
އަރުޝީފަށް ނެގީ
އެންމެފަހުން އަޕްޑޭޓްކުރީ