އދ.ގެ ކޮމިޝަން އޮން ދަ ސްޓޭޓަސް އޮފް ވިމެންގެ މެމްބަރުކަމަށް ފުރަތަމަ ފަހަރަށް ދިވެހިރާއްޖެ ވަނީ ހޮވިފައެވެ. މިއީ އެމެރިކާގެ ނިއުޔޯކްގައި ބޭއްވުނު އިންތިޚާބުގައި، 2026-2030 ދައުރުގެ އޭޝިއާ ޕެސިފިކް ގްރޫޕަށް ހޮވުނު 5 މެމްބަރުންގެ ތެރެއިން އެއް މެމްބަރެވެ.
މި ކާމިޔާބީއާ ގުޅިގެން ޚާރިޖީ ވުޒާރާއިން ނެރުއްވި ބަޔާނުގައި ވިދާޅުވެފައިވަނީ، "މިއީ މިންތީގެ ހަމަހަމަކަމަށާއި އަންހެނުން ބާރުވެރި ކުރުމަށް ރާއްޖެއިން ދެމުންދާ އަހަންމިއްޔަތުކަން ރަމްޒުކޮށްދޭ ކަމެއް" ކަމަށެވެ. ރާއްޖޭގެ އިތުރުން މި ދައުރަށް ޤަތަރު، ޖަޕާން، ޗައިނާ އަދި މޮންގޯލިއާވެސް ވަނީ ހޮވިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި ރާއްޖެއިން ބައިނަލްއަޤްވާމީ އިންތިޚާބެއްގައި ބައިވެރިވެ ހޮވުނު ފުރަތަމަ ފަހަރު ކަމަށްވާ މި ކޮމިޝަނަކީ، ސިޔާސީ، އިޤްތިޞާދީ، އިޖްތިމާޢީ އަދި ތަޢުލީމީ ދާއިރާތަކުގައި އަންހެނުންގެ ޙައްޤުތައް ކުރިއެރުވުމަށް އުފައްދާފައިވާ ކޮމިޝަނެކެވެ.
މިކަމާ ގުޅިގެން ރައީސް ޑރ.މުޢިއްޒު އެމަނިކުފާނުގެ ރަސްމީ އެކްސް އެކައުންޓުގައި އާންމުކުރެއްވި ފޯސްޓެއްގައި ވިދާޅުވެފައިވަނީ، "މިއީ ލިބުނު ފަޚުރެއް" ކަމަށާއި، "އަންހެނުންގެ ޙައްޤުތަކާއި އަންހެނުން ބާރުވެރިކުރުވުމާ ގުޅުންހުރި ކަންކަމުގައި ކޮމިޝަނަށް އެހީތެރިކަން ފޯރުކޮށްދިނުމަށް ދިވެހިރާއްޖެއިން ތައްޔާރަށް އޮތް" ކަމަށެވެ.
އެ މަނިކުފާނުގެ މި ޕޯސްޓުގައި، އެ ކޮމިޝަނަށް ދެން އިންތިޚާބުވި އިތުރު ޤައުމުތަކަށް މަރުޚަބާ ދަންނަވާ، އަންހެނުންގެ ޙައްޤުތަކާއި އަންހެނުން ބާރުވެރިކުރުވުމާ ގުޅުންހުރި ކަންކަމުގައި ކޮމިޝަނަށް އެހީތެރިކަން ފޯރުކޮށްދިނުމަށް ދިވެހިރާއްޖެއިން ތައްޔާރަށް އޮތްކަމުގައި ވިދާޅުވިއެވެ. އެ މަނިކުފާނުގެ ޕޯސްޓުގައި، ދިވެހިރާއްޖެއިން މި ވޭތުވެދިޔަ އަހަރުތަކުގައި ޤައުމީ އަދި ބައިނަލްއަޤްވާމީ ފެންވަރުގައި އަންހެނުންގެ ހައްޤުތަކާއި ދަރަޖަ ކުރިއެރުވުމުގެ މަގުގައި ގިނަގުނަ ކުރިއެރުންތަކެއް ހޯދައިފާވާކަމުގައި ވިދާޅުވިއެވެ. އަދި މި މަގުގައި ދިވެހިރާއްޖެއިން އެންމެހައި ބައިވެރިންނާ ގުޅިގެން މަސައްކަތްކޮށް ކޮމިޝަންގެ މަސައްކަތްތައް އިތުރަށް ހަރުދަނާކޮށް، މިހާރަށްވުރެ ޝާމިލުކަން ބޮޑު މުސްތަޤުބަލަކަށް ވާސިލުވުމަށް އުންމީދު ކުރައްވާކަމުގައި އެ މަނިކުފާނު ވިދާޅުވިއެވެ.