ސުވާލު. ސިޙުރުގެ އުނދަގޫވާ މީހާ ނަމާދުކުރުން އޮތީ މިސްކިތުގައިތޯ ނޫނީ ގޭގައިތޯ؟ 
ޖަވާބު: ފިރިހެނަކު ކަމަށްވެފައި ބަންގީގެ އަޑުއިވޭ ކަމަށް ވަނީނަމަ، މިސްކިތަށް ޖަމާޢަތަށް ދިއުމަށް ރަސޫލް ޞައްލަﷲ ޢަލައިހި ވަސައްލަމް ވަރަށް ބޮޑަށް ބާރުއަޅުއްވައިފައިވޭ. ލޯފަން ބޭފުޅަކު ކީރިތި ރަސޫލް ޞައްލަﷲ ޢަލައިހި ވަސައްލަމްގެ އަރިހަށް ވަޑައިގެން ތިމަންނާ މިސްކިތަށް ގެންގޮސްދޭނެ މީހަކު ނެތޭ އެހެންވީމަ ތިމަން ގޭގައި ނަމާދުކުރަންތޯ ސުވާލުކުރެއްވުމުން ވެސް އެ ކަލޭގެފާނު ޙަދީޘްކުރައްވައިފައިވަނީ، ބަންގީގެ އަޑުއިވޭހެއްޔޭ؟ އެހެންވިއްޔާ ބަންގީގެ އަޑުއިވޭ ކަމަށް ވަނީނަމަ. ޞަޙާބީ ދަންނަވަނީ އާދެހޭ ތިމަންނާއަށް ބަންގީގެ އަޑުއިވެޔޭ. ޙަދީޘްކުރައްވަނީ ބަންގީގެ އަޑުއިވޭ ކަމަށް ވަނީނަމަ، ބަންގިއަށް އިޖާބަދޭށޭ. (ޖަމާޢަތުގެ ނަމާދަށް ދާށޭ!)  
މާނައަކީ އެހައިވެސް ބޮޑަށް ރަސޫލް ޞައްލަﷲ ޢަލައިހި ވަސައްލަމް ބަންގީގެ އަޑުއިވިއްޖެ ކަމަށް ވަނީނަމަ، މިސްކިތަށް ދިއުމަށް ވަރަށް ބޮޑަށް ބާރުއަޅުއްވައިފައިވޭ. ދަތުރުވެރިޔާއަކީ އެއީ ލުއިފަސޭހަތަކެއް ލިބިފައިވާ މީހެއް. އެހެން ނަމަވެސް އެ މީހެއް ވެސް ރަށެއްގައި މަޑޮކޮށްގެން ހުއްޓައި، އެ ރަށުގައި ނަމާދަށް ބަންގީގެ އަޑު އޭނާއަށް އިވިއްޖެ ކަމުގައި ވަނީނަމަ، މިސްކިތަށް ޖަމާއަތަށް ނަމާދަށް ދިއުމަށް އިސްލާމްދީނުގައި ބާރުއަޅުއްވައިފައިވަނީ. 
އެހެންވީމާ ސިޙުރުގެ އުނދަގޫ ހުރި ކަމުގައި ވީނަމަވެސް، އޭގެ މައްޗަށް ގަދަވެގަނެ މިސްކިތަށް ގޮސް، ޖަމާޢަތުގައި ބައިވެރިވެގެން ނަމާދުކުރެވޭތޯ މަސައްކަތްކުރާނީ. އެ ގޮތަށް އެކަން ކުރީމާ ﷲ ގެ ރަޙުމަތާ އެކުގައި އޭނާ އެ އުނދަގުލުން ސަލާމަތްވުމަށް ވެސް އޮތް ބާރަކަށް ވެސް އިންޝާ ﷲ ތަޢާލާ އެ ކަން ވެގެންދާނެ. ވަﷲ އަޢުލަމް. 
- ޑރ. މުޙައްމަދު އިޔާޟް ޢަބްދުއްލަޠީފް